A Sani Dati E Tapu Wi fu Preiki?

¹ A moro bigi pisi fu sma abi furu fu du na ini a libi. Yehovah Kotoigi no abi ten srefisrefi fu di densrefi abi furu fu du. Wi musu studeri Gado Wortu, wi musu go na den gemeente konmakandra, èn teki prati na a preikiwroko. Boiti dati, wi abi fu du wi grontapuwroko, osowroko noso skorowroko, èn furu tra frantwortu; ala den sani disi e teki ten. A sani disi muilek spesrutu gi den wan di de leki edeman fu osofamiri.

² Fu di na ekonomia situwâsi na son presi no de so bun, meki edeman fu osofamiri abi fu wroko furu yuru baka makandra èn den abi fu wroko tranga fu kan abi moni. Te a grontapu wroko fu den e teki furu fu den ten èn krakti, dan furu ten èn krakti no e tan abra gi a preikiwroko. Fu di den abi a frantwortu fu sorgu gi den osofamiri na materia sei, meki son wan fu den edeman feni taki den no sa man du furu na ini a diniwroko (1 Tim. 5:8). A tru taki wi e kisi furu kwinsi na ini a ten disi fu man feni den sani di de fanowdu na ini a libi. Ma a grontapuwroko di wan sma e du no abi fu tron wan sani di e tapu en fu preiki a bun nyunsu (Mark. 13:10). Fu dati ede wi musu ondrosuku fa wi eigi situwâsi de trutru.

³ A fasi fa sani de na ini a grontapu disi e tan kenki doronomo. Dati kan meki na edeman fu wan osofamiri gi tumusi furu ten na a wroko fu en, fu di a wani abi nofo moni te a sa miti nanga wan sani di pasa onfruwakti (1 Kor. 7:31). A kan gersi leki a du fu moro furu grontapuwroko e sorgu gi moro sani na materia sei noso taki a e gi moro okasi fu go na presi pe sma e go fu koiri noso fu abi prisiriten. Ma na osofamiri fu yu sa kon moro koloku èn abi moro prisiri efu yu e gebroiki a ten fu yu soso fu man du den sani disi; ala di yeye afersi èn a fisiti fu konmakandra doronomo e go na baka? A no de fu taki dati wi wani tan fara fu iniwan sani di ben sa kan tyari wi yeye fasi kon na ini kefar. A de wan koni sani fu handri akruderi a warskow fu Yesus fu ’tyari gudu kon na wan gi wisrefi na hemel’ èn fu kon ’gudu ini Gado ai’.​—Mat. 6:19-21; Luk. 12:15-21.

⁴ Suku Kownukondre Afersi Fosi: Yesus ben leri den bakaman fu en fu poti yeye afersi na a fosi presi. A ben gi den a deki-ati: „No broko un ede noiti èn taki: ’San wi sa nyan?’ noso: ’San wi sa dringi?’ noso: ’San wi sa weri?’” Fu san ede meki a ben sa taki dati? A ben fruklari: „Bika un hemel Tata sabi taki unu abi ala den sani disi fanowdu.” Efu wi abi na overtoigi disi, dan no wan sani sa de di e tapu wi fu du san Yesus e taki baka dati: „Fu dati ede, tan suku fosi a kownukondre nanga en regtfardikifasi, èn ala den [tra] sani disi unu sa kisi tu.” Gado sa sorgu gi dati! (Mat. 6:31-33) A ten disi a no fu meki sani puru wi prakseri na so wan fasi taki wi e broko wi ede pasa marki nanga a sorgu gi den sani di de fanowdu fu tan na libi, noso a firi fu abi wan switi libi na ini wan seti fu sani di sa pasa gowe heri esi.​—1 Petr. 5:7; 1 Yoh. 2:15-17.

⁵ A moro prenspari reide fu san ede wi e du grontapuwroko na fu sorgu gi den sani di wi abi fanowdu na materia sei. Ma o furu wi abi fanowdu? Na apostel Paulus ben skrifi: „Te wi abi nyanyan, krosi nanga wan presi fu tan, dan wi sa de tevrede nanga den sani disi.” Wi e meki muiti fu kisi moro leki dati? Efu dati de so, dan a kan taki wi sa koti den bakapisi di Paulus ben taki fu dati: „Den sma di abi a fasti bosroiti fu kon gudu, e kon ini wan tesi èn wan trapu èn furu don èn takru lostu, di e meki sma fadon go na ini pori” (1 Tim. 6:8, 9; Mat. 6:24; Luk. 14:33). Fa wi o sabi taki a sani di e tapu wi na wi eigi gridi lostu?

⁶ Efu a de so taki wi abi wan pikin prati nomo na a preikiwroko noso wi no e si taki a de fanowdu fu tyari òfer gi a bun nyunsu fu di wi e feti baka grontapu sani, dan a de fanowdu fu tyari kenki kon na ini den sani di wi e si leki den moro prenspari sani (Hebr. 13:15, 16). Wan moro bescheiden fasi fu libi sa de wan bigi yepi fu puru a sani disi na pasi di e tapu wi fu du wi preikiwroko. Ala ten te wi e luku fa wi sa gebroiki wi ten nanga wi krakti, dan Kownukondre afersi musu de a moro prenspari sani di wi e hori na prakseri.

⁷ A Wroko Di No Abi Lasi: Den wortu fu Paulus e gi wi a deki-ati fu abi ala ten „furu fu du na ini a wroko fu Masra, fu di unu sabi taki a wroko fu unu no de fu soso ini a tori fu Masra” (1 Kor. 15:58). A moro prenspari „wroko fu Masra” na a Kownukondre preikiwroko nanga a wroko di abi fu du nanga a meki fu disipel (Mat. 24:14; 28:19, 20). Fu man du so furu leki wi man, dan ibri wiki wi musu poti ten na wan sei spesrutu gi a preikiwroko èn wi musu pruberi fu no gebroiki a ten dati gi no wan tra sani (Ef. 5:15-17). Dan no wan grontapuwroko noso no wan tra sani sa tapu wi fu du wi diniwroko.

⁸ Te wi gi wisrefi fu prati a Bijbel waarheid nanga tra sma, dan wi e ondrofeni a moro bigi koloku di e kon fu di wi e gi trawan sani (Tori. 20:35). Te wi e feti na baka a Kownukondre preikiwroko, dan wi kan luku go na a tamara nanga frutrow, „bika Gado no de onregtfardiki, so taki a sa frigiti a wroko fu unu èn a lobi di unu ben sori gi a nen fu en”.​—Hebr. 6:10.