Foe san ede wi alamala moesoe prèise Gado?

HALELUJAH! A wortoe disi de bekènti srefisrefi gi moro foeroe foe den sma di e go na kerki na ini krestenheit. Wan toe foe den e bari en boen tranga na den sonde konmakandra foe den. Ma o foeroe foe den sabi san a wortoe wani taki troetroe? Foe taki leti, a de wan Hebrew wortoe gi „Prèise Jah!” A de wan krinkrin prèise nanga prisiri babari gi a Mekiman, di nen Jehovah.a

A wortoe „Halelujah” de foe si foeroe tron na ini bijbel. Foe san ede? Bika so foeroe reide de foe prèise Gado. Jah (Jehovah) na a Mekiman èn a Sorgoeman foe a kefalek bigi universum (Psalm 147:4, 5; 148:3-6). Na en ben meki den ecosistema di e meki man libi na grontapoe (Psalm 147:8, 9; 148:7-10). Èn a abi spesroetoe belangstelling gi a libisma famiri. Efoe wi e doe a wani foe en, dan a e blesi wi èn e horibaka gi wi na ini a libi disi èn a e gi wi a seiker howpoe gi wan moro betre libi srefi di moesoe kon ete (Psalm 148:11-14). Na Jah (Jehovah) di ben meki sma skrifi den wortoe disi: „Na den regtfardiki sma sa abi grontapoe, èn den sa libi na tapoe foe têgo.” — Psalm 37:29.

Foe dati ede, a froemane gi na ala sma: „Halelujah!” „Prèise Jah, oen pipel!” (Psalm 104:35; foetoewortoe) Ma a de wan sari sani taki a no ala sma wani handri na tapoe a froemane. Na ini a ten disi sma e pina. Foeroe foe den abi angri, e siki, noso e kisi kwinsi. Foeroe sma abi foeroe sari foe di den e gebroiki drug na wan fowtoe fasi noso sopi noso leki bakapisi foe a hoeroedoe di den e doe noso foe a opo di den e opo densrefi kontrari makti. Wan reide de foe san ede den wan disi moesoe prèise Gado?

’Jehovah wawan ben kan gi mi howpoe’

Ija, reide de. Jehovah e kari ibri sma, sondro foe misi wan, foe kon sabi en, foe leri foe doe en wani, èn foe njan boen foe den blesi di e meki sma wani prèise en. Èn foeroe sma e handri na tapoe dati. Teki Adriana leki eksempre, na Guatemala. Di Adriana ben abi seibi jari, en mama ben dede. Sjatoe na baka dati, en papa ben gowe libi en. Di a ben abi tin jari a ben bigin wroko foe kan sorgoe gi ensrefi. Foe di en mama ben taigi en foe dini Gado èn a kerki, meki Adriana ben abi demakandra nanga difrenti katolik groepoe, ma di a ben abi 12 jari a Katolik Kerki ben broko en saka èn a ben go moksi ensrefi nanga wan strati groepoe foe sma di e doe ogri. A ben bigin e smoko, e gebroiki drug, èn e foefoeroe. Foe san ede so wan jongoe meisje leki dati ben sa wani prèise Gado?

A sisa foe Adriana ben bigin studeri bijbel nanga Jehovah Kotoigi, ma Adriana ben lafoe en. Ne a tanta foe den ben dede. Na a beri foe en tanta, froeferi aksi ben e broeja Adriana. Pe en tanta ben go? A ben de na hemel? A ben go na ini wan faja hel? A ben broeja en srefisrefi, èn Adriana ben go na a pikin kerki foe a beripe foe begi gi jepi, èn a ben gebroiki a nen foe Gado, Jehovah, soleki fa en sisa ben leri en.

Sjatoe na baka, a ben bigin studeri bijbel nanga Jehovah Kotoigi èn ben e fisiti den kresten konmakandra foe den. Disi ben gi en wan heri njoen fasi foe si a libi, èn nanga deki-ati a ben broko a matifasi di a ben abi nanga a strati groepoe foe sma di e doe ogri. Adriana di abi pikinmoro 25 jari now, e taki: „Na lobi gi Jehovah wawan ben meki mi gowe libi so wan takroe fasi foe libi. Jehovah wawan di abi a foeroe sari-ati ben kan gi mi a howpoe foe têgo libi.” Ala di Adriana ben abi problema na ini a bigin foe en libi, tokoe a abi heri boen reide foe prèise Gado.

Wan situwâsi di de moro moeilek srefi leki dati skrifi kon foe Oekraine. Wan man e sidon na strafoe-oso e wakti a dedestrafoe foe en. A ben firi sari nanga ensrefi? A ben firi brokosaka? Nôno, kontrari foe dati. Di Jehovah Kotoigi ben miti en no so langa pasa èn a ben kisi pikinso sabi foe Jehovah, a ben aksi den foe den fisiti en mama. Now a e skrifi den bika a jere taki den ben doe san a ben aksi den. A e skrifi: „Grantangi taki oenoe ben fisiti mi mama. A ben de a moro prisiri njoensoe di mi ben kisi na ini a jari di pasa.”

A e skrifi foe ensrefi nanga den kompe strafoeman na soema a gi kotoigi: „Now wi e bribi na ini Gado èn wi e proeberi foe handri akroederi a bribi foe wi.” A e tapoe en brifi: „Grantangi taki oenoe e leri wi san lobi wani taki èn foe kisi bribi. Efoe mi e tan na libi, mi sa jepi oenoe na ini a preikiwroko toe. Tangi foe Gado taki oenoe de èn taki oenoe e jepi tra sma foe lobi Gado èn foe bribi na ini en.” A man disi go na wan moro hei kroetoebangi foe den teki bosroiti teige a dedestrafoe foe en. Ma awansi a kisi a dedestrafoe ofoe a e tan foeroe jari na ini strafoe-oso, a abi reide troetroe foe prèise Gado.

’Ala di mi breni, tokoe mi man si’

Loekoe now wan krakti tini meisje di wantewante so no ben man si moro. Dati na san pasa nanga Gloria di e libi na Argentina. Wantewante so Gloria ben kon breni di a ben abi 19 jari, èn noiti moro a ben man si baka. Di a ben abi 29 jari a ben go libi nanga wan man èn sjatoe na baka a ben kisi bere. A ben prakseri now taki en libi wani taki wan sani. Ma di a ben lasi en pikin, a ben bigin poti aksi. A ben aksi ensrefi: ’Foe san ede disi e pasa nanga mi? San mi doe? Gado de troetroe?’

Na a ten disi, toe Kotoigi foe Jehovah ben kon na en doro. A ben bigin studeri bijbel èn ben leri foe a pramisi foe bijbel taki na ini a njoen grontapoe, den breniwan sa si baka (Jesaja 35:5). Disi ben de wan kefalek moi froewakti gi Gloria! A ben prisiri srefisrefi, spesroetoe di en masra ben agri foe seti a trowlibi foe den akroederi wet. Dan en masra ben kisi wan mankeri èn ben kon malengri, èn a ben moesoe tan na ini wan rolstoeroe. Nownowde a breni oema disi moesoe wroko tranga foe kisi den sani di a abi fanowdoe. Boiti dati, a e doe ala wroko na oso, èn a e sorgoe so srefi gi den persoonlijk sani foe en masra. Tokoe Gloria e prèise Jehovah! Nanga a jepi foe den kresten brada nanga sisa foe en, a e studeri a bijbel di meki gi breni sma, èn den kresten konmakandra na a Kownoekondre zaal e gi en foeroe deki-ati. A e taki: „A de wan moeilek sani foe froeklari, ma ala di mi breni, tokoe a de leki mi man si.”

Son tron sma e kisi froefolgoe te den e prèise Gado. Wan oema na Krowâsia ben prisiri di a ben leri foe Gado, ma en masra ben gens a njoen bribi foe en èn a masra ben gowe libi en, èn ben teki na oemapikin foe den di abi wán jari, gowe nanga en. Foe di a no ben abi tanpresi, èn foe di en masra nanga famiri ben gowe libi en, sondro wan oso, wan wroko, noso srefi en pikin, a no ben sabi san a moesoe doe biginbigin. Ma a lobi di a abi gi Gado ben jepi en, ala di a ben abi pikinso kontakti nomo nanga en oemapikin teleki a pikin oemapikin gro kon bigi. Na oema disi ben feni a „peri foe bigi waarde” èn a no ben sa wani gowe libi en (Mateus 13:45, 46). Fa a ben tan hori a prisiri foe en na ini den moeilek ten disi? A e taki: „Prisiri na wan froktoe foe a jeje foe Gado. Wi kan kweki en awansi fa a situwâsi lontoe wi de, neleki fa prani kan gro na ini wan spesroetoe oso pe den e kweki den, awansi fa a weer kan de na dorosei.”

Na Finland, ondrosoekoe foe datra ben sori taki Markus di ben abi siksi jari, ben abi wan siki na en titei di den no man dresi. Sjatoe na baka a ben moesoe tan na ini wan rolstoeroe. Wan toe jari na baka en mama ben tjari en go na wan man foe wan Pinkster gemeente di ben kon bekènti na foeroe sma foe di a man ben e froeklari taki a man dresi siki sma. Ma a no ben man dresi Markus na wan wondroe fasi. Foe dati ede Markus no ben abi belangstelling moro gi Gado èn a ben bigin studeri sani di abi foe doe nanga sabidensi nanga tra grontapoe afersi. Dan pikinmoro feifi jari na baka, wan oema na ini wan rolstoeroe makandra nanga wan jonkoeman, ben kon na a oso pe Markus ben tan. Den ben de Jehovah Kotoigi. Now Markus ben de wan atheistsma, ma a no ben abi trobi foe taki foe relisi èn a ben kari den kon na inisei.

Baka ten, wan trowpaar ben fisiti en, èn wan bijbelstudie ben bigin. Te foe kaba, a krakti foe bijbel waarheid ben kenki a fasi fa Markus ben si sani, èn a ben froestan taki ala di a ben malengri, a ben abi reide troetroe foe prèise Gado. A ben taki: „Mi breiti srefisrefi bika mi feni waarheid èn na organisâsi di Jehovah e gebroiki. Now mi libi abi wan marki èn a wani taki wan sani. Den feni wan tra lasi skapoe èn a no wani gowe libi na ipi foe Jehovah!” — Teki gersi Mateus 10:6.

Meki wi alamala „prèise Jah”

Disi na wan toe nomo foe den foeroe ondrofenitori di wi kan froeteri foe sori taki libisma na ini a ten disi, awansi na ini sortoe situwâsi den de, kan abi reide foe prèise Gado. Na apostel Paulus ben tjari en kon na krin na a fasi disi: „A gi di wan sma e gi ensrefi na ini a dini foe Gado, boen gi ala sani, foe di a abi wan pramisi gi a disiten libi èn a libi di moesoe kon ete (1 Timoteus 4:8). Efoe wi e doe a wani foe Gado, a sa meki a „pramisi gi a disiten libi” kon troe. A no de foe taki, a no sa meki den pôtiwan kon goedoe noso meki den sikiwan kon gosontoe na ini a seti foe sani disi. Ma a e gi en jeje na den wan di e dini en, so taki den kan feni prisiri èn tevredefasi awansi sortoe situwâsi den de na ini. Ija, srefi na ini „a disiten libi”, den sikiwan, den wan di e kisi kwinsi, èn den pôtiwan kan abi reide foe prèise Gado.

Ma fa a de nanga a libi „di moesoe kon ete”? Ija, a prakseri di wi e prakseri wawan foe en moesoe meki wi prèise Gado na a moro faja fasi! A e naki wi ati te wi e prakseri foe a ten te wi no sa sabi pôtifasi; te „no wan sma di e libi drape sa taki: ’Mi siki’”; èn te Jehovah Gado „sa figi poeroe ala watra na den ai, èn dede no sa de moro, no wan sari, no wan babari, no wan pen no sa de moro. Den fositen sani pasa kaba” (Jesaja 33:24; Openbaring 21:3, 4; Psalm 72:16). Fa joe e prakseri foe den pramisi disi foe Gado?

Wan jonkoeman na El Salvador ben teki wan traktaat foe bijbel di ben tjari wan toe foe den sani disi kon na krin. A ben taigi a Kotoigi di ben gi en a sani disi: „Misi, san a traktaat disi e taki, boen toemoesi foe de troe.” Foeroe sma e piki na a fasi dati. Ma den pramisi disi na foe a Sma di ben meki na universum, di ben meki a natuurlijk fasi fa sani e waka na wi grontapoe, èn di e jepi srefi den pôtiwan nanga den sikiwan foe feni prisiri. Wi kan bribi san a e taki. A jonkoeman disi di wi ben taki foe en kaba na fesi, ben studeri bijbel nanga Jehovah Kotoigi èn a ben kon si taki disi de troe. Efoe joe no abi wan bijbelstudie ete, dan wi e gi joe a deki-ati foe doe dati toe. Dan, meki a de so taki joe sa de drape na in a njoen grontapoe te a disiten seti foe sani pasa gowe, èn te ala mekisani kan moksi densrefi e bari: „Halelujah!” „Prèise Jah, oen pipel!” — Psalm 112:1; 135:1.

[Foetoewortoe]

[Prenki na tapoe bladzijde 5]

Meki a de so, taki joe de drape te ala mekisani e moksi densrefi e bari: „Halelujah!”