Te yu e firi leki yu no man moro

„A firi disi no ben e gwe. Dati meki mi ben denki taki a moro bun efu mi kiri misrefi.”—Adriana, Brasyonkondre.

OITI yu ben firi so takru taki yu no ben wani libi moro? Dan yu kan frustan fa Adriana ben e firi. Ala yuru Adriana ben e prakseri ala sortu sani, a ben e sari doronomo èn a ben lasi-ati. Di Adriana go na datra, den kon si taki a ben depressief.

Luku a tori fu Kaoru fu Yapan. A man disi ben e sorgu gi en papa nanga mama di ben owru kaba èn di ben e sikisiki. A e taki: „Na a ten dati a druk na wroko ben hebi srefisrefi. Te fu kaba mi no ben e firi fu nyan moro èn mi no ben e sribi bun. Mi bigin denki taki efu mi dede, dan ala sani kaba.”

Wan man fu Nigeria di nen Ojebode, e taki: „Ala ten mi ben e sari so te taki mi ben e krei. Dati meki mi bigin suku wan fasi fu kiri misrefi.” Koloku taki Ojebode, Kaoru, nanga Adriana no kiri densrefi. Ma ibri yari dusundusun sma e du dati.

PE YU KAN FENI YEPI

Furu sma di e kiri densrefi na mansma èn furu fu den ben e syen tumusi fu suku yepi. Yesus ben taki dati sikisma musu go na datra (Lukas 5:31). Sobun, efu yu e firi so, dan no syen fu suku yepi. Furu sma di depressief kon si taki datrayepi e yepi den fu firi moro bun. Ojebode, Kaoru, nanga Adriana kisi datrayepi èn now sani e go moro bun nanga den.

Datra kan gi wan depressief sma dresi, noso den kan meki a sma fruteri fa a e firi. Na so den kan kon sabi fa fu yepi en fu denki tra fasi. Te wan sma depressief, dan a prenspari taki den famiriman nanga mati e pruberi fu frustan a situwâsi fu en, fu abi pasensi nanga en èn fu yepi en. A moro bun mati di wan sma kan abi, na Yehovah Gado di e gi wi bun yepi na ini en Wortu, Bijbel.

WAN LUSU DE?

Nofo tron, sma di depressief musu kisi datrayepi wan heri pisi ten èn den musu tyari wan tu kenki kon na ini den libi. Ma efu yu depressief, dan neleki Ojebode, yu kan fruwakti taki wan ten o kon pe yu o de koloku. A e taki: „Mi e fruwakti fu si a ten te nowan sma na grontapu o siki moro, soleki fa skrifi na Yesaya 33:24.” Neleki Ojebode, yu kan feni trowstu te yu e prakseri a ten te wi o abi „wan nyun grontapu”, pe „pen” no o de moro (Openbaring 21:1, 4). Na a ten dati, nowan pen noso siki o de moro, sma no o firi brokosaka moro èn den no o sari moro. Den sani di ben e hati yu no o de moro. Noiti moro yu o ’memre den sani dati èn den no o abi krakti moro na yu tapu’.—Yesaya 65:17.

Bijbeltekst di kan yepi yu

Gado e frustan fa yu e firi.

„Mi, Yehovah, na yu Gado di e grabu yu reti-anu hori. Mi na a sma di e taigi yu: ’No frede. Misrefi o yepi yu.’”—Yesaya 41:13.

Yehovah e frustan moro leki iniwan tra sma fa wi e firi èn a wani yepi wi.

Denki dipi fu Gado Wortu.

„[Elia] aksi Gado fu dede. A taki: ’. . . Ke Yehovah, meki mi dede.’”—1 Kownu 19:4.

Ojebode e taki: „Mi denki dipi fu Gado Wortu èn a sani dati yepi mi. Mi kon si taki a profeiti Elia ben e firi neleki fa mi ben e firi.”

Leri wan sani fu sma na ini Bijbel.

„Mi [Yesus] begi fayafaya gi yu [Petrus] taki yu no o lasi a bribi fu yu.”—Lukas 22:32.

Baka di na apostel Petrus ben taki dri leisi dati a no sabi Yesus, dan a sani dati hati en srefisrefi èn a bari krei. Kaoru e taki: „Di mi prakseri san Petrus du èn fa Yesus begi gi en, dan dati yepi mi fu si taki Yehovah nanga Yesus ben e broko den ede nanga a fasi fa Petrus ben e firi. Dati gi mi deki-ati.”

Noiti moro yu o ’memre den sani dati èn den no o abi krakti moro na yu tapu’.—Yesaya 65:17