Mi wani dede—Bijbel man yepi mi te mi abi a firi fu wani kiri misrefi?
A piki fu Bijbel
Iya! Bijbel na wan buku di komoto fu Gado „di e trowstu den sma di e firi brokosaka” (2 Korentesma 7:6). Aladi Bijbel a no wan buku di skrifi fu yepi sma di siki na den frustan, toku a yepi furu sma di ben abi a firi fu kiri densrefi. Den moi rai na ini Bijbel kan yepi yu tu.
Sortu Bijbeltekst kan yepi yu te yu abi a firi fu kiri yusrefi?
San yu musu du te wan mati e taigi yu taki a wani kiri ensrefi?
San mi musu du efu mi ben pruberi wan leisi kaba fu kiri misrefi?
Sortu moi rai Bijbel e gi?
● Taigi sma fa yu e firi.
San Bijbel e taki: „Wan trutru mati e sori lobi ala ten. En na wan brada di gebore fu te nowtu de.”—Odo 17:17.
San disi wani taki: Wi abi yepi fu tra sma fanowdu te wi e firi brokosaka.
Efu yu no e taigi trawan fa yu e firi, dan a kan kon so hebi gi yu taki yu no man tyari a lai yu wawan. Ma te yu e fruteri trawan fa yu e firi, dan a no e hebi so moro gi yu èn kande disi o yepi yu srefi fu si sani tra fasi.
Pruberi fu du disi: Taki nanga wan sma tide ete, kande nanga wan famiriman noso wan mati di yu e frutrow.a Kande yu kan skrifi tu fa yu e firi.
● Suku datrayepi.
San Bijbel e taki: „Gosontu sma no abi datra fanowdu, ma na siki sma abi datra fanowdu.”—Mateyus 9:12.
San disi wani taki: Te wi siki, wi musu suku datrayepi.
Te wan sma abi a firi fu wani kiri ensrefi, dan a kan taki a e siki na en frustan noso taki a e feti nanga den firi fu en. A no abi fu syen fu disi, leki fa a no ben o syen tu te a abi wan siki na en skin. Datra man dresi sma di siki na den frustan noso di e feti nanga den firi fu den.
Pruberi fu du disi: Suku datrayepi so esi leki yu man.
● Hori na prakseri taki Gado e broko en ede nanga yu.
San Bijbel e taki: „A no de so, taki sma e seri feifi pikin fowru gi tu sensi di no warti furu? Toku Gado no e frigiti nowan fu den. . . . No frede, unu warti moro leki furu pikin fowru.”—Lukas 12:6, 7.
San disi wani taki: Yu prenspari gi Gado.
Kande yu abi a firi taki nowan sma lobi yu, ma Gado sabi fa yu e firi. A e broko en ede nanga yu, srefi te yu abi a firi taki yu no wani libi moro. Psalm 51:17 e taki: „Mi Gado, yu no o tapu yu ai gi wan sma di firi brokosaka, noso gi wan sma di lasi-ati.” Gado wani taki yu e libi, fu di a lobi yu.
Pruberi fu du disi: Suku buweisi na ini Bijbel di e sori taki Gado lobi yu. Fu eksempre, luku kapitel 24 fu a buku di nen Kon krosibei na Yehovah, wan buku di o yepi yu fu ondrosuku Bijbel.
● Begi Gado.
San Bijbel e taki: „Trowe ala un hebi na en tapu, bika a e broko en ede nanga unu.”—1 Petrus 5:7.
San disi wani taki: Dyaso Gado e aksi yu fu fruteri en san de tapu yu ati èn fu no kibri noti gi en.
Gado kan meki yu firi korostu èn a kan gi yu a krakti fu horidoro (Filipisma 4:6, 7, 13). Na so a e horibaka gi sma di e suku yepi na en èn di e begi en nanga den heri ati.—Psalm 55:22.
Pruberi fu du disi: Begi Gado tide ete. Gebroiki en nen Yehovah èn taigi en fa yu e firi (Psalm 83:18). Aksi en fu yepi yu fu horidoro.
● Denki dipi fu a howpu di Bijbel e gi wi fu a tamara.
San Bijbel e taki: „A howpu fu wi de leki wan ankra gi wi libi. A tranga èn a e hori wi tanapu.”—Hebrewsma 6:19.
San disi wani taki: A kan taki a wan leisi yu e firi bun, ma wan tra leisi yu e firi brokosaka baka. Na so a e go nanga langa èn yu e firi neleki te yu de ini wan sipi di den skwala fu se e naki go-kon. Ma a howpu di Bijbel e gi kan yepi yu fu kisi yusrefi baka.
A howpu disi a no wan sani di wi e winsi nomo, ma wi kan bribi en trutru fu di Gado pramisi wi taki a o puru ala sani di e meki wi firi sari.—Openbaring 21:4.
Pruberi fu du disi: Kon sabi moro fu a howpu di Bijbel e gi. Leisi na artikel „Echte hoop op betere tijden.”
● Du wan sani di yu lobi.
San Bijbel e taki: „Wan ati di e prisiri, bun leki dresi.”—Odo 17:22.
San disi wani taki: Te wi e du sani di e meki wi firi prisiri, dan dati kan bun gi wi na frustan sei èn na emotioneel sei.
Pruberi fu du disi: Du wan sani di yu lobi du. Fu eksempre, arki poku di e meki yu firi bun, leisi wan sani di e gi yu deki-ati, noso du wan tra sani di yu lobi. Yu o firi moro bun te yu e du wan sani fu yepi tra sma, srefi efu na wan pikin sani yu e du gi den.—Tori fu den apostel 20:35.
● Sorgu yusrefi bun.
San Bijbel e taki: „Te wi e oefen a skin, dan dati bun gi wan tu sani nomo.”—1 Timoteyus 4:8.
San disi wani taki: A bun fu oefen wi skin, fu sribi nofo èn fu nyan gosontu nyanyan.
Pruberi fu du disi: Teki wan steifi waka, awinsi na gi 15 miniti nomo.
● Hori na prakseri taki den firi di wi abi now nanga tra sani ini wi libi kan kenki.
San Bijbel e taki: „Unu no sabi fa a libi fu unu o de tamara.”—Yakobus 4:14.
San disi wani taki: A kan taki wan problema di hebi gi wi èn di sori srefi leki wi no o man lusu en, de fu wan syatu pisi ten nomo.
Awinsi a gersi leki den problema fu yu no o kisi wan lusu, toku sani kan kenki bakaten. Sobun, du ala san yu man fu horidoro (2 Korentesma 4:8). A kan taki baka wan pisi ten a fruferi situwâsi fu yu o kenki, ma efu yu kiri yusrefi, dan yu no man kenki noti moro.
Pruberi fu du disi: Leisi tori na ini Bijbel fu sma di ben firi so brokosaka taki den ben wani dede. Yu o si fa a libi fu den kon moro bun, nofo tron na wan fasi di noiti den ben denki. Luku wan tu eksempre.
Bijbel e taki fu sma di ben wani dede?
Iya. Bijbel e taki fu wan tu sma di taki wan sortu sani leki disi: „Mi wani dede.” Gado no bari den fu dati, ma a yepi den. A kan du a srefi gi yu.
Elia
● Suma ben de Elia? Elia ben de wan profeiti di ben abi deki-ati. Ma toku a ben e firi brokosaka son leisi. Yakobus 5:17 e taki dati „Elia ben de wan man di ben abi den srefi firi leki wi”.
● Fu san ede a ben wani dede? Wan leisi Elia ben denki taki a ben de en wawan. A ben frede èn a ben abi a firi taki a no warti noti. Dati meki a begi: „Yehovah, meki mi dede.”—1 Kownu 19:4.
● San yepi en? Elia taigi Gado fa a e firi. Fa Gado gi en deki-ati? Gado taigi Elia taki a e broko en ede nanga en èn a sori en a makti fu En. Gado taigi Elia tu taki a ben de fanowdu ete èn a gi en wan bun yepiman di ben man sorgu bun gi en.
▸ Leisi a tori fu Elia: 1 Kownu 19:2-18.
Yob
● Suma ben de Yob? Yob ben de wan gudu osofamiri edeman di ben e dini a tru Gado nanga en heri ati.
● Fu san ede a ben wani dede? Ini wan syatu pisi ten omeni ogri sani miti Yob èn a heri libi fu en kon kenki. A lasi ala den gudu fu en. Di wan rampu pasa, ala den pikin fu en lasi libi. A kisi wan takru siki. Te fu kaba, sma taigi en taki na ensrefi meki taki den problema disi miti en. A sani disi hati Yob srefisrefi èn a taki: „Mi e tegu gi a libi disi. Mi no wani libi.”—Yob 7:16.
● San yepi en? Yob begi Gado èn a taki nanga tra sma (Yob 10:1-3). Elihu, wan mati di ben abi sari-ati, gi en deki-ati èn a yepi en fu si a situwâsi fu en na wan tra fasi. Ma a moro prenspari sani na taki Yob arki a rai fu Gado èn a meki Gado yepi en.
▸ Leisi a tori fu Yob: Yob 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.
Moses
● Suma ben de Moses? Moses ben de wan fesiman fu Israel fu owruten èn a ben de wan profeiti di ben lobi Gado.
● Fu san ede a ben wani dede? A wroko fu Moses ben hebi, ala ten baka sma ben e krutu en èn te fu kaba a kon weri. Dati meki a bari kari gi Gado: „Betre yu kiri mi.”—Numeri 11:11, 15.
● San yepi en? Moses taigi Gado fa a e firi. Gado lekti a wroko fu Moses so taki a no ben hebi so furu moro gi en.
▸ Leisi a tori fu Moses: Numeri 11:4-6, 10-17.
a Efu yu e tan denki nomo fu kiri yusrefi èn yu no abi nowan sma fu taki fu a firi disi, dan bel go na wan presi pe den e yepi sma di abi den firi disi.