San Bijbel e taki fu den rampu di e miti libisma?

Piki fu Bijbel

Gado e broko en ede nanga wi. A no en e meki den rampu di e pasa now miti wi. Te a Kownukondre fu Gado o puru pina, dan a o puru den rampu disi tu. Ma nownow kaba Gado e trowstu den wan di e kisi fu du nanga rampu.​—2 Kor. 1:3

• Fu san ede wi kan de seiker taki den rampu di e pasa, no de wan strafu fu Gado?

• A de so taki den rampu di e pasa nownow e sori taki wi e libi na ini den lasti dei?

• Fa Gado e yepi den sma di kisi fu du nanga rampu?

• Yu denki taki Bijbel kan yepi wi fu sreka wisrefi gi rampu?

• Bijbeltekst di kan trowstu den wan di kisi fu du nanga rampu

Fu san ede wi kan de seiker taki den rampu di e pasa, no de wan strafu fu Gado?

Den rampu di e miti sma e difrenti fu a fasi fa Gado ben e strafu sma ini a ten di pasa

• Rampu e miti bun sma nanga ogri sma. Ma Bijbel e sori taki Gado ben kiri soso den ogri sma. Di Gado ben pori den foto Sodom nanga Gomora a ben kibri Lot nanga den tu umapikin fu en (Genesis 19:29, 30). Gado e si na ati fu sma, dati meki a ben kiri soso den ogri sma fu a ten dati.​—Genesis 18:23-​32; 1 Samuel 16:7.

• Furu leisi wi no e sabi na fesi o ten wan rampu o pasa. Ma Gado e warskow den ogriwan na fesi fosi a pori den. Den wan di ben arki ben kisi kibri.​—Genesis 7:​1-5; Mateyus 24:38, 39

• Son leisi na den sani di libisma srefi e du e meki taki rampu pasa. Fa so? Den e pori a grontapu èn den e bow oso na presi pe gronseki, frudu nanga tra rampu e pasa (Openbaring 11:18). Wi no kan taki dati na Gado meki den fowtu disi.​—Odo 19:3.

A de so taki den rampu di e pasa nownow e sori taki wi e libi na ini den lasti dei?

Iya. Bijbel ben taki na fesi dati rampu ben o pasa na a „kaba pisi fu a grontapu”, noso na ini den „lasti dei”(Mateyus 24:3; 2 Timoteyus 3:1). Yesus ben taki disi fu a ten fu wi: „Na ini a wan presi baka a trawan angriten nanga gronseki o de” (Mateyus 24:7). Heri esi Gado o tyari wan kaba kon na rampu nanga a pina di libisma e pina.​—Openbaring 21:3, 4.

Fa Gado e yepi den sma di kisi fu du nanga rampu?

• Nanga yepi fu en wortu Bijbel. Bijbel e sori taki Gado e broko en ede nanga wi èn taki a e sari te wi e pina (Yesaya 63:9; 1 Petrus 5:6, 7). A e taki tu fu a ten te rampu no o pasa moro.​—Luku „Bijbeltekst di kan trowstu den wan di kisi fu du nanga rampu.”

• Gado e gebroiki den futuboi fu en fu yepi sma. Den futuboi fu Gado e teki na eksempre fu Yesus. Bijbel ben taki dati Yesus o trowstu den wan „di e firi brokosaka”, nanga ala „den sma di e sari” (Yesaya 61:1, 2). Den futuboi fu Gado e meki muiti fu du a srefi sani.​—Yohanes 13:15.

  Baka te wan rampu pasa den e gi den sma san den abi fanowdu tu.​—Tori fu den apostel 11:28-30; Galasiasma 6:10.

Yu denki taki Bijbel kan yepi wi fu sreka wisrefi gi rampu?

Iya. Bijbel a no wan buku di skrifi fu sreka wi gi rampu, ma toku rai de na ini di kan yepi wi fu du dati. Luku wan tu eksempre:

• Sreka na fesi. Bijbel e taki: „A koniwan si taki ogri o miti en èn a go kibri” (Odo 22:3). A bun fu sabi na fesi san yu o du na ini muilek situwâsi. Yu kan sreka wan rampu tas di yu kan tyari gwe wantewante efu wan rampu pasa. Taki nanga yu osofamiri pe un o miti efu wan rampu pasa.

• Si yu libi leki a moro prenspari sani. Bijbel e taki: „Wi no tyari noti kon na grontapu èn wi no man teki noti fu en tyari gowe tu” (1 Timoteyus 6:7, 8). No draidrai fu gwe libi yu oso nanga gudu te wan rampu de fu pasa. Yu musu hori na prakseri taki a libi fu yu prenspari moro leki iniwan tra sani.​—Mateyus 6:25.