’De wan sma di e du furu bun wroko’
1 Na ini den lasti yari fu en fayafaya diniwroko, dan na apostel Paulus ben wroko krosibei makandra nanga Timoteyus èn nanga Titus. Paulus ben skrifi wan brifi go na ala tu fu den, fu gi den deki-ati. A ben taigi Titus taki „den sma di e bribi na ini Gado” abi fu „tan prakseri fa den kan du bun” (Tit. 3:8). A ben taigi Timoteyus taki den wan di e poti den frutrow tapu Gado, musu de sma ’di e du furu bun wroko’ (1 Tim. 6:17, 18). Disi na tumusi bun rai gi wi alamala! Ma san o pusu wi fu du bun sani na ini wi libi? Sortu difrenti bun wroko wi kan du na ini den dei di e kon?
2 Den sani di e pusu wi fu de sma di e du furu bun wroko na, a bribi nanga a lobi di wi abi gi Yehovah, nanga a tumusi moi howpu di a e gi wi (1 Tim. 6:19; Tit. 2:11). Spesrutu na ini a pisi ten disi fu a yari, wi musu memre fu san ede Yehovah ben seni en Manpikin, Yesus, kon na grontapu. A ben kon fu sori taki en Tata abi a reti fu tiri èn fu gi ala libisma di e poti bribi na ini en na okasi fu kisi têgo libi (Mat. 20:28; Yoh. 3:16). A sani disi sa kon na fesi krinkrin na a Memrefesa fu a dede fu Krestes tapu 28 maart. A no de so dan, taki a howpu di wi abi fu kisi têgo libi e pusu wi fu de sma ’di e du furu bun wroko’? A no de fu taki! Ma sortu wroko wi kan du nownow kaba?
3 Bun wroko di wi kan du na ini maart èn sosrefi baka dati: A no de fu taki dati wi sa de na a Memrefesa. Yehovah Kotoigi na heri grontapu e si a fesa disi leki a moro prenspari fesa fu a yari (Luk. 22:19). Ma wi wani prati a prisiri di wi sa abi na a fesa dati nanga so furu sma leki wi man. Luku a diniwroko raportu na ini a Jaarboek 2002. Drape yu sa si taki a yari di pasa, na ini furu kondre na heri grontapu, a nomru fu sma di ben de na a Memrefesa ben de dri, fo, noso feifi tron moro leki a nomru fu preikiman. Na son presi a ben de moro furu srefi. A no de fu taki dati fu man doro a marki dati, ala sma na ini den gemeente ben wroko tranga fu prati den kari gi a Memrefesa so furu leki den man, na ini a heri kontren di den kisi fu preiki. Fu dati ede, fu bigin nanga tide te go miti 28 maart, wi wani du so furu leki wi man fu kari sma fu kon na a Memrefesa, fu di wi wani yepi den fu leri fu a howpu di wi abi fu kisi frulusu.
4 A kan taki na ini a mun april alen no sa kon so furu. Fa wi kan gebroiki a moi ten dati fu kon de sma ’di e du furu bun wroko’? Fu di wi sa tan teki prati na a preiki di wi e preiki a bun nyunsu, iya, fu di wi sa de „fayafaya gi tumusi bun wroko” (Tit. 2:14; Mat. 24:14). Kande yu no man de na ini a yepi-pionierwroko na ini maart. Ma yu denki taki yu sa man du dati na ini april noso mei, noso na ini ala tu mun? A kan taki yu de na ini a pionierwroko kaba na ini a mun maart. Yu denki taki yu kan go doro na ini den mun di e kon baka dati?
5 Son brada nanga sisa di e du grontapuwroko, kon si taki te den de na pasi e go na wrokope, dan den kan preiki wan heri yuru noso moro srefi. Den e du stratiwroko èn den e taki nanga sma di e wroko na bisnispresi di e opo frukufruku mamanten. Son wan fu den e seti sani na so wan fasi, taki den kan gebroiki pikinso fu a ten di den kisi fu nyan te brekten, fu preiki gi sma. Son brada nanga sisa feni fasi fu gebroiki a pisi ten dati fu studeri nanga tra wrokoman. Furu sisa di no e du grontapuwroko ben man poti ten na wan sei fu go na ini a preikiwroko, te den pikin fu den de na skoro. Wan tu dei na ini a wiki, den e opo pikinso moro fruku fu du den osowroko. Na so fasi den abi moro ten na ini a dei dati fu du a preikiwroko èn fu gi sma leri.—Ef. 5:15, 16.
6 Srefi efu a de so taki yu no man de na ini a yepi-pionierwroko, dan toku yu kan luku efu yu kan seti sani na so wan fasi taki yu kan du moro na ini a preikiwroko. Na a fasi dati yu kan du ala san yu man ’fu du bun, fu de sma di e du furu bun wroko, fu lobi fu gi, èn fu de klariklari fu prati’ a waarheid nanga trawan.—1 Tim. 6:18.
7 Memre taki a meki fu disipel na wan bun wroko tu: Ibri yari yu abi sma di wani sabi moro fu Bijbel di e kon na a Memrefesa. Unu denki taki unu kan seti sani so taki wan tu brada nanga sisa kan poti spesrutu prakseri na den sma di no abi wan bijbelstudie ete? Unu kan seti sani fu go baka na den sma disi, so taki unu kan yepi den fu go na fesi na yeye fasi? A kan taki wan tu fu den sma di e kon na a Memrefesa na sma di abi famiriman di de Kotoigi. Trawan kan de sma di ben studeri na ini a ten di pasa. Kande wan sma musu gi den deki-ati nomo fu bigin baka nanga a studie èn fu bigin go na den konmakandra doronomo. A ben sa gi wi bigi prisiri efu den tron futuboi fu Yehovah di e wroko fayafaya makandra nanga wi!
8 Fu di wi sa du moro na ini a preikiwroko na ini a mun maart èn na ini a ten baka dati sosrefi, dan a no de fu taki dati wi sa preiki gi moro furu sma. Kande den sma disi wani kon sabi moro fu Bijbel èn fu dati ede wi musu go baka na den. Pruberi fu poti wan aksi gi den te yu e gowe. Pramisi den taki yu sa gi den a piki a tra leisi di yu o kon fu fisiti den. Efu wi du disi, dan wi sa opo na okasi gi wisrefi fu tyari wan gobaka. A ben sa de wan bun sani, efu wi no wakti tumusi langa fu go baka na a sma. Efu wi no ben man bigin wan oso-bijbelstudie a fosi leisi di wi miti a sma, dan efu a kan, dan wi wani pruberi fu du dati te wi e go baka na a sma a tra leisi.
9 Te wi e du stratiwroko, wi musu tan suku fasi fu opo wan takimakandra nanga sma. Furu preikiman di miti nanga sma na stratiwroko di ben wani sabi moro fu Bijbel, ben kisi a nen, na adres, nanga a telefon-nomru fu den sma disi. Efu a de so taki a sma di yu miti no e libi na ini a kontren fu yu, dan yu kan teki a papira di nen ’Te bezoeken adres’ (S-43) di de fu kisi na a Kownukondre konmakandra-presi. Yu kan skrifi a nen fu a sma na tapu èn gi a papira disi na a sekretarsi fu yu gemeente, di sa seni en go na a gemeente di de na ini a kontren pe a sma e libi. Efu a sekretarsi no man du dati, dan a sa seni a papira nanga na adres fu a sma go na a bijkantoro, fu den seni en go na a gemeente di musu kisi en. Na so wan fasi wi kan yepi den wan di wani sabi moro fu Bijbel.
10 Efu a sma gi yu en telefon-nomru, ma a no taigi yu pe a e libi, dan a bun fu pruberi fu meki wan gobaka nanga yepi fu telefon. Sreka na fesi san yu wani taki nanga a sma èn sreka yusrefi bun tapu a pisi tori dati. Sorgu taki yu abi yu Redeneren-buku pe yu kan teki en esi-esi efu a de fanowdu. Son brada nanga sisa studeri nanga sma nanga yepi fu telefon èn den ben abi tumusi bun bakapisi. Na a fasi disi den ben yepi den wan di yu no e feni na oso so makriki. Wan sisa ben bigin aksi den umasma di a ben e miti na ini na oso-fu-oso wroko èn di ben wani arki, san na a telefon-nomru fu den. Leki bakapisi fu dati a ben man bigin tu bijbelstudie.
11 Wroko makandra nanga den owruman fu yepi den wan di no e preiki moro: Nanga den heri ati èn na wan lobi-ati fasi, den owruman wani yepi den wan disi. Furu fu den sma disi bigin fu go baka na den konmakandra, sondro fu wan sma taigi den. Den kon si fu san ede a de fanowdu fu abi krosibei demakandra nanga na organisâsi fu Yehovah, èn fa dati kan de wan kibri gi den na yeye fasi, soleki fa Psalm 91 e taki. Son wan fu den sma disi de so fara now taki den kan bigin baka nanga a preikiwroko. Efu tra sma di no e preiki moro de na a Memrefesa a mun disi, dan kande den wani fu wan sma kon studeri Bijbel baka nanga den. Efu dati de so, dan den owruman sa seti sani so taki wan sma kan studeri nanga den sma disi di wani kisi yepi. Efu yu kisi a kari fu gi yepi na a fasi disi, dan den brada sa warderi en trutru taki yu e du a muiti dati.—Rom. 15:1, 2.
12 Tan ’du bun’: Furu sma di ben de na ini a yepi-pionierwroko wan mun langa, noso moro langa, ben kon si taki a preikiwroko fu den go na fesi na ini den mun baka dati. Den ben miti nanga sma di ben wani sabi moro fu Bijbel èn den ben si taki a ben de fanowdu fu go baka na den sma dati. Disi ben gi den deki-ati fu meki moro muiti fu de na ini a preikiwroko moro furu, so taki den kan go baka na den wan di ben wani sabi moro fu Bijbel. Son wan fu den preikiman disi ben man opo bijbelstudie, èn dati ben yepi den fu de na ini a preikiwroko moro furu srefi.
13 Trawan di den ben meki moro muiti fu du a preikiwroko èn fu meki disipel ben feni so furu prisiri, taki dati ben gi den deki-ati fu luku moro fini san na den sani di de moro prenspari na ini a libi fu den. Leki bakapisi fu dati, son wan fu den ben man seti sani na so wan fasi taki den no ben abi fu du so furu grontapuwroko moro èn taki den ben kan tron yepipionier di e wroko ibri mun. Trawan ben man tron gewoon pionier. Den ben poti ala den frutrow tapu Gado èn no tapu sani fu grontapu. Den ben kon si taki Yehovah blesi den trutru, fu di den ben ’lobi fu gi, èn fu di den ben de klariklari fu prati sani nanga trawan’. Dati ben tranga a howpu fu den taki den ben o kisi a „trutru libi” (1 Tim. 6:18, 19). A no de fu taki, dati o moro sma e go na ini a pionierwroko, o moro a heri gemeente e kisi wini fu dati. Pionier na sma di lobi fu taki nanga trawan fu den sani di den e ondrofeni na ini a preikiwroko. Disi e meki taki sani e waka moro bun na ini a gemeente èn taki ala sma e du a preikiwroko nanga moro prisiri.
14 Meki a de so taki wi alamala de sma ’di e du furu bun wroko’ na a pisi ten fu a Memrefesa èn baka dati tu. Wi sa man du dati, te wi e pruberi fu du moro furu na ini a Kresten diniwroko. Meki wi sori bigi warderi gi san Yehovah du gi wi, di a gi wi a howpu fu kisi têgo libi na ini wan regtfardiki, nyun grontapu.—2 Petr. 3:13.