„Du bun gi ala sma”
1 „Preiki a wortu fu Gado dorodoro” èn ’De wan sma di e du furu bun wroko’ (Kol. 1:25; 1 Tim. 6:18), ben de den tu tori fu den inlegvel na ini Wi Kownukondre diniwroko fu februari nanga maart 2002. Na ini den Kownukondre diniwroko dati wi ben kisi deki-ati fu meki tranga muiti fu yepi nyun sma fu kon na a Memrefesa. Wi ben kisi deki-ati tu fu yepi den wan di no e preiki moro fu bigin wroko makandra baka nanga a gemeente, èn fu yepi den pikin fu wi nanga den bijbelstudenti di doro den markitiki fu tron preikiman fu a bun nyunsu. A no de fu taki dati wi ben abi bun bakapisi di wi ben meki tranga muiti fu du dati. Ma now, „so langa a ten bun gi wi ete, meki wi du bun gi ala sma”.—Gal. 6:10.
2 Aksi den fu kon baka: Na ini a kontren fu a bijkantoro na ini Sranan, moro leki 4000 sma kon na a Memrefesa ala yari, aladi den a no preikiman fu a bun nyunsu. Den sma disi di e kon ibri yari e sori taki den wani fu kon sabi moro. San wi fu wi sei musu du dan fu yepi den sma disi di „abi a yoisti denki fu a têgo libi” fu kon tron „bribiman”? (Tori 13:48) Gi den deki-ati fu kon baka na den gemeente konmakandra, so esi leki a kan.
3 Fu san ede yu no e kari den sma disi fu kon na a Gemeente Bukustudie pe den kan nyan bun fu wan tumusi moi takimakandra fu a profeititori fu Yesaya? Efu yu nanga a sma na famiri noso efu yu sabi a sma bun èn yu musu hori wan lezing na a Theokrasia Diniwroko-skoro, dan kande yu kan kari en fu kon arki te yu sa abi wan prati. Fruteri a sma san na den nen fu den publiki taki di o hori na ini den wiki di e kon. (Wan schema fu den publikitaki musu de na a bord pe a gemeente e poti den sani di musu meki bekènti.) Suku okasi fu yepi a sma fu kisi a tranga lostu fu anbegi Yehovah. A no de fu taki dati efu a no e studeri Bijbel ete nanga wan sma na ini a gemeente, dan yu kan aksi en na wan switifasi fu studeri nanga en.
4 Tan gi deki-ati na den wan di no e preiki moro: Furu fu den sma di e kon na a Memrefesa, na sma di gi densrefi abra na Yehovah kaba. Ma a kan taki wan tu fu den no e preiki a bun nyunsu moro. Toku, Paulus gi wi a deki-ati fu „du bun . . . spesrutu gi den wan di de na ini a srefi bribi leki wi” (Gal. 6:10). Fu dati ede wi musu broko wi ede na a fosi presi nanga den wan di no e preiki moro.
5 A kan taki son wan fu den teki a rai nanga a deki-ati di den ben kisi fu owruman nanga trawan, fu teki prati baka na a preikiwroko. Efu den owruman gi yu a frantwortu fu yepi wan preikiman di bigin preiki baka, dan a bun fu hori na prakseri taki a lobi di yusrefi abi gi Yehovah èn gi a preikiwroko, sa yepi a sma dati fu kisi ensrefi baka. Sori en san na den difrenti fasi fa yu e du a preikiwroko so taki a kan gi en prisiri, sosrefi taki a kan tan preiki go doro, èn te fu kaba taki a kan kisi den blesi di Yehovah e gi.
6 Yepi nyun preikiman fu bigin bun: Di wan uma di ben wani sabi moro ben frustan taki a ben feni a tru organisâsi fu Gado, dan a ben wani fu bigin nanga a preikiwroko wantewante. Baka di a kon frustan san na den sani di a ben sa abi fu du fosi, dan na uma disi taki: „Mi wani bigin nanga dati nownowde.” Efu yu e studeri Bijbel nanga wan sma di doro den markitiki fu bigin nanga a preikiwroko, dan yu musu yepi a sma fu „bigin nanga dati nownowde”, so taki yu kan yepi en fu bigin bun. Yepi en tu fu kon abi a gwenti fu sreka ensrefi èn fu teki prati doronomo na a preikiwroko ibri wiki.
7 Efu yu eigi pikin tron wan preikiman di no dopu ete, dan wroko makandra nanga en so taki a kan go na fesi akruderi a yari fu en èn akruderi den sani di a man du. Efu yu meki muiti fu yepi a pikin nomo, dan a kan fruwondru yu srefi te yu e si o bun a man taki nanga sma, fa a e leisi Bijbel, èn o bun a e pristeri sma den buku fu wi. Te a pikin fu yu ben abi wan moi takimakandra nanga wan sma, dan leri en fa fu tyari wan gobaka èn fa fu sorgu gi sma di wani sabi moro.
8 Yusrefi kan du moro na ini a diniwroko: A fasi fa yu libi de e gi yu pasi fu du moro na ini a preikiwroko, srefi baka a pisi ten fu a Memrefesa? Yu man wroko wan, noso tu yuru moro langa na ini a preikiwroko ibri wiki? Yu e luku na tapu a kalender fu yu fu si efu yu kan go na ini a yepi-pionierwroko baka? Noso yu kan seti yu libi na so wan fasi taki yu kan go na ini a furuten diniwroko? Ala muiti di wi e du na ini a diniwroko, kan yepi wan sma te fu kaba fu teki a waarheid! (Tori. 8:26-39) Te wi e luku den dei di de na wi fesi, dan a bun fu tan „du muiti ala ten fu du bun gi makandra èn gi ala tra sma”.—1 Tes. 5:15.
[Faki na tapu bladzijde 3]
Tan yepi:
□✔ Sma di kon na a Memrefesa
□✔ Preikiman di bigin preiki baka
□✔ Nyun preikiman di no dopu ete