Yepi trawan fu ’gi yesi nanga den heri ati’
1. San Yehovah wani taki den anbegiman fu en musu du?
1 Efu wi wani anbegi Yehovah na wan fasi di a feni bun, dan a de prenspari fu gi yesi na en (Deut. 12:28; 1 Petr. 1:14-16). Heri esi a krutu fu Yehovah sa kon na tapu „den sma di no sabi Gado èn na tapu den sma di no e gi yesi na a bun nyunsu” (2 Tes. 1:8). Fa wi kan yepi trawan fu ’gi yesi nanga den heri ati’ na den leri fu Gado Wortu?—Rom. 6:17.
2. Fu san ede a de prenspari fu yepi trawan fu kisi wan tranga bribi?
2 Yepi den fu kisi wan tranga bribi èn fu abi moro lobi: Bijbel e sori wi taki te wan sma e gi yesi, dan dati abi furu fu du nanga bribi. Na apostel Paulus ben taki fu ’a komando fu a têgo Gado, so taki sma ben kan gi yesi na en fu di den e bribi’ (Rom. 16:26). Hebrewsma kapitel 11 e taki fu bun furu eksempre fu sma di sori bribi. Furu fu den sma disi ben sori a bribi disi fu di den handri akruderi san Yehovah ben wani den fu du (Hebr. 11:7, 8, 17). Na a tra sei, te wan sma no e gi yesi, dan dati e kon fu di a no abi nofo bribi (Yoh. 3:36; Hebr. 3:18, 19). Wi musu kon kisi a koni fu gebroiki Gado Wortu bun, so taki wi kan yepi trawan fu kisi a sortu bribi di o meki taki den o gi yesi.—2 Tim. 2:15; Yak. 2:14, 17.
3. (a) San a gi di wi e gi yesi abi fu du nanga lobi? (b) Fa wi kan yepi den bijbelstudenti fu kon kisi lobi gi Yehovah?
3 A gi di wi e gi yesi abi fu du sosrefi nanga a lobi di wi abi gi Gado (Deut. 5:10; 11:1, 22; 30:16). „Disi na san a lobi fu Gado wani taki,” na so 1 Yohanes 5:3 e taki, „dati wi e hori wisrefi na den komando fu en; ma toku den komando fu en no de wan hebi.” Fa wi kan yepi bijbelstudenti fu kon kisi lobi gi Yehovah? Suku okasi na a studie fu meki den kisi moro warderi gi den fasi fu Yehovah. Sori den taki yusrefi abi furu warderi gi Gado. Yepi a studenti fu prakseri fa ensrefi kan kisi wan banti nanga Yehovah. Lobi gi Yehovah na a moro prenspari sani di o yepi trawan èn di o yepi wi tu fu gi yesi na en nanga wi heri ati.—Mat. 22:37.
4. (a) Fu san ede a de prenspari taki wi de wan eksempre gi trawan? (b) San wi musu du fu ’gi yesi nanga wi heri ati’?
4 Nanga yepi fu na eksempre di wi e gi: Wan bun fasi fa wi kan gi trawan deki-ati fu gi yesi na a bun nyunsu, na te wisrefi de wan eksempre. Ma wi musu tan meki muiti fu ’gi yesi nanga wi heri ati’ (1 Kow. 3:9; Odo 4:23). San disi wani taki? Furu yu ati nanga yeye sani, fu di yu e studeri Bijbel doronomo èn fu di yu e go doronomo na den konmakandra (Ps. 1:1, 2; Hebr. 10:24, 25). Suku fu abi demakandra nanga den wan di de na ini wánfasi na ini a tru anbegi (Odo 13:20). Abi wan prati doronomo na a preikiwroko, èn abi a tranga winsi fu yepi sma na ini a kontren fu yu. Aksi Yehovah na ini begi fu tiri yu so taki yu kon kisi wan bun ati (Ps. 86:11). Luku bun nanga sani di kan pori yu ati, soleki prisiriten pe sma e du sani di no fiti noso pe den e du ogri-ati sani. Meki muiti fu du sani di e tyari yu moro krosibei na Gado èn di sa meki taki yu kisi wan moro tranga banti nanga en.—Yak. 4:7, 8.
5. Sortu blesi den sma e kisi di e gi yesi?
5 Yehovah ben gi na owruten pipel fu en a dyaranti taki den ben o kisi blesi efu den ben e arki en sten (Deut. 28:1, 2). Na a srefi fasi Yehovah e gi bogobogo blesi na „den wan di e gi yesi na en leki tiriman” na ini a ten dipi (Tori. 5:32). Fu dati ede, nanga yepi fu den sani di wi e leri sma èn nanga yepi fu na eksempre di wisrefi e gi, wi o meki muiti fu yepi trawan fu gi yesi nanga den heri ati.