Joe abi „wan ati di e gi jesi”?
DI SALOMO ben tron a kownoe foe Israèl foe owroeten, dan a ben firi taki a no ben bekwaam nofo. Foe dati ede a ben aksi Gado, koni nanga sabi (2 Kroniki 1:10). Salomo ben begi toe: „Joe moesoe gi a foetoeboi foe joe wan ati di e gi jesi foe kroetoe a pipel foe joe.” (1 Kownoe 3:9) Efoe Salomo ben abi „wan ati di e gi jesi”, dan a ben sa waka baka wet nanga gronprakseri foe Gado èn a ben sa feni blesi foe Jehovah.
Wan ati di e gi jesi no de wan hebi, ma a de wan fonten foe prisiri. Na apostel Johanes ben skrifi: „Disi na san a lobi gi Gado wani taki, dati wi e hori den komando foe en; èn tokoe den komando foe en no de wan hebi lai.” (1 Johanes 5:3) Seiker, wi moesoe gi jesi na Gado. Bika efoe joe loekoe en boen, dan Jehovah na wi Gran Kriaman. Na En abi grontapoe nanga ala den sani di de na grontapoe, srefi ala solfroe nanga ala gowtoe. So boen, wi no kan gi Gado noti troetroe na materia sei, ala di a e gi pasi meki wi gebroiki wi moni na wan fasi foe sori a lobi foe wi, gi en (1 Kroniki 29:14). Jehovah e froewakti foe wi taki wi lobi en èn taki wi e waka nanga sakafasi nanga en, foe di wi e doe a wani foe en. — Mika 6:8.
Di wan man ben aksi Jesus Krestes sortoe komando na a moro bigi komando foe a Wet, a ben taki: „Joe moesoe lobi Jehovah, joe Gado, nanga joe heri ati èn nanga joe heri sili èn nanga joe heri froestan. Disi na a moro bigi èn fosi komando.” (Mateus 22:36-38) Wán fasi foe sori a lobi dati, na foe gi jesi na Gado. Foe dati ede a sa moesoe de a begi foe iniwan foe wi taki Jehovah gi wi wan ati di e gi jesi.
Den ben abi wan ati di e gi jesi
Boen foeroe eksempre de na ini bijbel foe den wan di ben abi wan ati di e gi jesi. Foe eksempre, Jehovah ben taigi Noa foe bow wan boen bigi ark so taki libi ben kan kisi kibri. Disi ben de wan kefalek bigi wroko di ben teki so wan 40 noso 50 jari foe kaba en. Srefi nanga ala den njoen ten tranga wrokosani nanga tra wrokosani di de foe kisi now, a ben sa de wan koni bow-wroko foe bow so wan bigi stroektoeroe di ben sa kan drifi tapoe watra. Boiti dati, Noa ben moesoe warskow sma di sondro tweifri ben spotoe nanga en èn ben lafoe en. Ma a ben gi jesi te na ini den moro finifini tori srefi. Bijbel e taki: „A ben doe leti so.” (Genesis 6:9, 22; 2 Petrus 2:5) Noa ben sori en lobi gi Jehovah foe di a ben gi jesi na wan getrow fasi gi foeroe jari langa. Fa dati na wan moi eksempre gi wi alamala!
Loekoe a famiri-edeman Abraham. Gado ben taigi en foe froisi komoto foe a goedoe foto Ur foe den Kaldewsma go na wan kondre di a no ben sabi ete. Abraham ben gi jesi sondro foe aksi-aksi sani (Hebrewsma 11:8). En heri libi moro fara, en nanga en osofamiri ben libi na ini tenti. Baka foeroe jari leki wan dorosei-sma na ini a kondre, Jehovah ben blesi en nanga en wefi Sara, di ben gi jesi, nanga wan boi di ben nen Isak. Fa Abraham di ben abi 100 jari ben moesoe lobi en boi di a ben kisi na tapoe en owroe dei! Wan toe jari na baka, Jehovah ben aksi Abraham foe òfer Isak leki wan bron-ofrandi (Genesis 22:1, 2). A prakseri di Abraham ben moesoe prakseri foe so wan sani nomo, ben moesoe gi en pen. Tokoe, a ben tan gi jesi bika a ben lobi Jehovah èn a ben abi bribi taki a pramisi siri ben sa kon nanga jepi foe Isak, srefi efoe Gado ben moesoe opo en baka na dede (Hebrewsma 11:17-19). Ma di Abraham ben de foe kiri en boi, Jehovah ben tapoe en èn a ben taki: „Now mi sabi taki joe e frede Gado foe di joe no kibri joe manpikin, a wan-enkri wan foe joe, gi mi.” (Genesis 22:12) Foe di a ben gi jesi, dati meki sma ben kon sabi Abraham di ben abi frede gi Gado, leki „a mati foe Jehovah”. — Jakobus 2:23.
Jesus Krestes na wi moro boen eksempre foe wan sma di gi jesi. Di a ben libi na hemel bifo a ben tron wan libisma, a ben prisiri foe gi jesi na en Tata na hemel (Odo 8:22-31). Leki libisma Jesus ben gi jesi na Jehovah na ini ala sani, èn ben prisiri ala ten foe doe En wani (Psalm 40:8; Hebrewsma 10:9). Dati meki Jesus ben kan taki a troe sani taki: „Mi no e doe no wan sani sondro foe wan sma taigi mi; ma soleki fa a Tata ben leri mi, na so mi e taki den sani disi. Èn en di seni mi, de nanga mi; a no gowe libi mi foe misrefi tan mi wawan, foe di ala ten mi e doe den sani di e plisi en.” (Johanes 8:28, 29) Te foe kaba, foe meki a soevereinfasi foe Jehovah kon regtfardiki èn foe froeloesoe a libismafamiri di e gi jesi, dan Jesus ben wani foe gi en libi èn ben kisi foe doe nanga a moro sjen fasi foe dede nanga pen. Foe troe, „di a ben de ini a fasi foe wan libisma, a ben saka ensrefi èn ben gi jesi te na dede, ija, dede na wan pina-oedoe” (Filipisma 2:8). Disi na troetroe wan moi eksempre foe a sori di wan sma e sori wan ati di e gi jesi!
A no nofo foe gi jesi afoe-afoe nomo
A no ala sma di taki dati den gi jesi na Gado, troetroe gi jesi toe. Loekoe kownoe Saul foe Israèl foe owroeten. Gado ben gi en a komando taki a ben moesoe figi ala den godelowsoe Amalekietsma poeroe (1 Samuèl 15:1-3). Ala di Saul ben pori den leki wan nâsi, tokoe a ben kibri a kownoe foe den èn a ben kibri wan toe foe den skapoe nanga den kaw. Samuèl ben aksi: „Foe san ede dan joe no gi jesi na a sten foe Jehovah?” Di Saul ben piki, a ben taki: „Ma mi gi jesi na a sten foe Jehovah . . . A pipel [foe Israèl] ben teki foe a goedoe den skapoe nanga kaw, den wan di den ben froekisi . . . foe den tjari srakti-ofrandi gi Jehovah.” Foe poti krakti na tapoe a gi di wan sma moesoe gi jesi dorodoro, Samuèl ben piki: „Jehovah e prisiri a srefi nanga bron-ofrandi èn nanga srakti-ofrandi, leki nanga a gi di wan sma e gi jesi na a sten foe Jehovah? Loekoe! A moro betre foe gi jesi, leki foe gi wan srakti-ofrandi, a moro betre foe poti prakseri, leki a fatoe foe manskapoe; bika tranga-ede fasi na a srefi leki a sondoe foe loekoeman-wroko, èn go na fesi na wan asranti fasi, na a srefi leki a gebroiki foe obia krakti nanga terafim. Foe di joe ben trowe a wortoe foe Jehovah, dati meki na a srefi fasi a sa trowe joe leki kownoe.” (1 Samuèl 15:17-23) Fa Saul ben lasi foeroe srefisrefi foe di a no ben abi wan ati di e gi jesi!
Srefi a koni kownoe Salomo, di ben begi foe kisi wan ati di e gi jesi, no ben tan gi jesi na Jehovah. Kontrari foe a wani foe Gado, a ben trow nanga oema foe dorosei-kondre èn dati ben tjari en so fara taki a sondoe teige Gado (Nehemia 13:23, 26). Salomo ben lasi a boen-ati foe Gado foe di a no ben tan abi wan ati di e gi jesi. Fa dati na wan warskow gi wi!
Disi no wani taki dati Jehovah e aksi volmaaktifasi foe den libisma foetoeboi foe en. „A e hori na prakseri taki wi na doti.” (Psalm 103:14) Wi alamala seiker sa meki fowtoe wanwan leisi, ma Gado kan si efoe troetroe wi wani plisi en nanga wi heri ati (2 Kroniki 16:9). Efoe wi e meki fowtoe foe di wi de onvolmaakti ma abi berow baka dati, dan wi kan aksi pardon tapoe a gron foe a loesoe ofrandi foe Krestes, èn abi na overtoigi taki Jehovah „sa gi foeroe pardon”. (Jesaja 55:7; 1 Johanes 2:1, 2) A jepi foe lobi-ati kresten owroeman kan de fanowdoe toe so taki wi kan kon boen baka na jejefasi èn abi wan gosontoe bribi èn wan ati di e gi jesi. — Titus 2:2; Jakobus 5:13-15.
O boen joe e gi jesi?
Leki foetoeboi foe Jehovah, foeroe foe wi sondro tweifri e firi taki wi abi wan ati di e gi jesi. Wi kan prakseri na wisrefi: Mi no abi wan prati na a Kownoekondre preikiwroko? Mi no e tanapoe kánkan te den sortoe bigi tori leki neutraalfasi e opo ede kon? Èn a no de so taki mi e fisiti kresten konmakandra doronomo, neleki fa na apostel Paulus ben gi tranga foe dati? (Mateus 24:14; 28:19, 20; Johanes 17:16; Hebrewsma 10:24, 25) Foe troe, a pipel foe Jehovah leki wán groepoe e sori wan ati di e gi jesi ini den sortoe prenspari tori disi.
Ma fa a de nanga a fasi fa wi e tjari wisrefi na ini afersi foe ala dei, kande na ini afersi di gersi pikinpikin afersi? Jesus ben taki: „A sma di de getrow ini a moro pikin sani, de getrow toe ini foeroe sani, èn a sma di de onregtfardiki ini a moro pikin sani, de onregtfardiki toe ini foeroe sani.” (Lukas 16:10) Foe dati ede, ibriwan foe wi ben sa doe boen foe aksi ensrefi: Mi abi wan ati di e gi jesi ini den moro pikin sani noso ini afersi di trawan no sabi srefi foe dati?
A psalm singiman ben sori taki srefi na ini na inisei foe en oso, pe tra sma no ben si en, a ’ben waka ini a soifri reti fasi foe en ati’ (Psalm 101:2). Te joe e sidon na joe oso, dan kande joe kan leti a telefisi èn bigin loekoe wan film. Drape kaba, a gi di joe moesoe gi jesi, ben kan kisi tesi. A film kan bigin abi sekshoeroedoe na ini. Joe sa tan loekoe, e taki na joesrefi taki disi na den sortoe film di den e sori na ini a ten disi? Noso joe ati di e gi jesi, sa boeweigi joe foe hori joe srefi na a bijbel komando foe, ’no meki hoeroedoe nanga ala sortoe libi di no krin noso bigi-ai no taki srefi na oen mindri’? (Efeisesma 5:3-5) Joe sa kiri a TV, srefi efoe a film span srefisrefi? Noso joe sa drai go na wan tra kanari efoe wan foe den programa e sori ogri di e doe nanga tranga? „Jehovah srefi e ondrosoekoe a regtfardikiwan èn so srefi a godelowsoewan,” na so a psalm singiman ben singi, „èn ibriwan sma di lobi tranga ogridoe, En sili e tegoe foe en srefisrefi.” — Psalm 11:5.
Wan ati di e gi jesi e tjari blesi kon
A no de foe taki dati foeroe kontren de ini a libi pe wi kan ondrosoekoe wisrefi nanga boen bakapisi, foe loekoe efoe troetroe wi e gi jesi na Gado nanga wi ati. A lobi foe wi gi Jehovah, sa moesoe boeweigi wi foe plisi en èn foe doe san en e taigi wi na ini en Wortoe, bijbel. Wan ati di e gi jesi, sa jepi wi foe tan hori wan boen matifasi nanga Jehovah. Foe troe, efoe troetroe wi e gi jesi, dan ’den wortoe foe wi mofo nanga den dipi prakseri foe wi ati, sa kon de wan prisiri na Jehovah’. — Psalm 19:14.
Foe di Jehovah lobi wi, meki a e leri wi foe gi jesi gi wi eigi boen. Èn wi e kisi bigi winimarki efoe wi e poti prakseri nanga wi heri ati na tapoe leri foe Gado (Jesaja 48:17, 18). Foe dati ede, nanga ala prisiri, meki wi teki a jepi di wi hemel Tata e gi nanga jepi foe en Wortoe, en jeje, nanga en organisâsi. Wi e kisi so boen leri taki a gersi leki wi e jere wan sten baka wi, e taigi wi: „Disi na a pasi. Waka na tapoe, oen pipel.” (Jesaja 30:21) Foe di Jehovah e gi wi leri nanga jepi foe bijbel, den kresten poeblikâsi, nanga den gemeente konmakandra, meki wi poti prakseri, gebroiki san wi leri, èn „gi jesi na ini ala sani”. — 2 Korentesma 2:9.
Wan ati di e gi jesi sa abi leki bakapisi foeroe prisiri nanga foeroe blesi. A sa gi wi vrede foe jeje, bika wi sa sabi taki wi e plisi Jehovah boen èn e prisiri en ati (Odo 27:11). Wan ati di e gi jesi sa de wan kibri gi wi te wi e kisi tesi foe go doe san fowtoe. So boen, foe troe wi moesoe gi jesi na wi hemel Tata èn wi moesoe begi: „Gi a foetoeboi foe joe wan ati di e gi jesi.”
[Prenki na tapoe bladzijde 29]
Foe a Self-Pronouncing Edition of the Holy Bible, di abi a King James versie nanga den Revised versie