Meki a glori fu Yehovah bekènti
1 A psalm skrifiman ben taki: ’Singi gi Yehovah, un sma fu heri grontapu. . . . Meki a glori fu en bekènti na mindri den nâsi, èn fruteri den wondruwroko fu en na ala pipel.’ Te wi e prakseri san Yehovah ben du, san a e du now, èn san a sa du gi wi ete, dan wi ati e pusu wi fu meki a glori fu en bekènti!—Ps. 96:1, 3.
2 Na ini a diniwroko fu wi: Yehovah Kotoigi abi a grani fu tyari a nen fu Gado èn fu prèise en nen na mindri ala sma na heri grontapu (Mal. 1:11). Disi de kontrari a fasi fa kerki tiriman fu Krestenhèit e tyari densrefi, fu di na wan heimemre fasi den puru a nen fu Gado na ini den bijbelvertaling fu den! Fu meki sma kon sabi a nen fu Gado na wan tumusi seryusu wroko, fu di sma musu abi bribi te den e kari a nen dati, efu den wani kisi frulusu na ini a bigi banawtu di e kon (Rom. 10:13-15). Boiti dati, na soso te a nen fu Gado kon santa, dan vrede kan kon na hemel nanga grontapu. Iya, ala den wroko fu Gado abi fu du nanga a nen fu en.
3 „Yehovah bigi èn a musu kisi prèise srefisrefi.” Ma efu sma wani „gi Yehovah a glori di en nen musu kisi”, dan den musu sabi tru tori fu en (Ps. 96:4, 8). Ma son sma e taki dati Gado no de (Ps. 14:1). Trawan e si en leki wan sma di no abi krakti, noso den e feni taki a no e broko en ede nanga den afersi fu libisma. Te wi e yepi opregtisma fu kisi soifri sabi fu a Mekiman fu wi, fu den prakseri fu en, èn fu den moi fasi fu en, dan wi e gi Yehovah glori.
4 Nanga a fasi fa wi e tyari wisrefi: Wi e gi Yehovah grani te wi e libi akruderi den regtfardiki markitiki fu en. Sma e si fa wi e tyari wisrefi na wan bun fasi (1 Petr. 2:12). Fu eksempre, te wi hori wi skin nanga wi krosi krin èn te wi e tyari wisrefi na wan fasi di fiti, dan disi kan meki taki sma e taki bun fu wi. Disi e gi wi na okasi fu taki nanga den fu den winimarki di wan sma e kisi te a e libi akruderi den gronprakseri di skrifi na ini Gado Wortu (1 Tim. 2:9, 10). Wi e prisiri srefisrefi te trawan e ’si den bun di wi e du èn te den e gi glori na wi Tata di de na hemel’!—Mat. 5:16.
5 Meki a de so, taki ala dei wi e taki èn e du sani di e gi glori na a bigi Gado fu wi, bika na so fasi wi e gi yesi na a prisiri kari disi: „Singi gi Yehovah, blesi a nen fu en. Fruteri sma ibri dei fu a bun nyunsu fu a frulusu di a e gi.”—Ps. 96:2.