Yu aksi sma efu den sabi trawan di wani sabi moro?

Efu yu e hori wan bijbelstudie nanga wan sma now, dan fu san ede yu no e aksi en efu a sabi mati, famiriman, noso tra sma di ben o wani sabi tu san Bijbel e leri? Nofo tron a studenti sa kari wan tu nen fu sma di a sabi. Te yu e go na den sma dati fu aksi efu den wani studeri Bijbel, dan kande yu kan kari a studenti en nen, efu a gi primisi fu du dati. Yu kan taki: „[Nen fu a studenti] e prisiri fu a bijbelstudie fu en, èn a prakseri taki kande yu sosrefi wani kisi wini fu wan bijbelstudie, sondro taki yu abi fu pai fu dati.” Dan sori en syatu fa wan bijbelstudie e hori nanga yepi fu a Bijbel leri-buku.

Efu yu abi wan studenti di e go na fesi, dan kande yu kan gi en deki-ati fu fruteri mati nanga memre fu en famiri fa a bijbelstudie e hori, efu den wani sabi moro. Kande a kan aksi den efu den wani kon sidon arki te ensrefi abi bijbelstudie. Efu dati no kan, dan kande a studenti kan seti sani so taki yu kan miti den sma disi fu sori den fa wan bijbelstudie e hori. Na so fasi, a studenti e kisi deki-ati fu bigin fruteri tra sma san a e leri fu Bijbel.

Te yu e go doronomo na sma, dan kande densrefi kan gi yu den nen fu tra sma di wani sabi moro. Disi den kan du awansi densrefi no e studeri Bijbel doronomo ete. Te yu e gi den a Bijbel leri-buku, dan yu kan poti na aksi disi: „Yu sabi tra sma di ben o wani wan fu den buku disi?”

Fu di a kaba de krosibei, meki wi wani du ala san wi man fu yepi sma fu yere èn fu teki a bun nyunsu. Yu e aksi sma efu den sabi trawan di wani sabi moro?