A preikiwroko fu wi—Wan wroko di e sori taki wi e firi gi sma
1 Yesus ben si taki den ipi-ipi sma di ben arki a boskopu fu en „ben waka bruyabruya leki skapu di no abi skapuman” (Mat. 9:36). Na wan safu-ati fasi èn nanga lobi, Yesus ben leri den sma den markitiki fu Yehovah, a ben trowstu den, èn na wan lobi-ati fasi a ben e yepi den fu kon kisi wan banti nanga Gado. Te wi e denki dipi fu a fasi fa Yesus ben e handri nanga sma, dan wi e leri fu denki èn firi neleki en, èn disi sa de krin fu si na a fasi fa wi e du wi diniwroko.
2 Teki ten fu prakseri fa Yesus ben e handri di sma di ben de na nowtu, kon suku yepi na en (Luk. 5:12, 13; 8:43-48). A ben firi gi sma di ben abi spesrutu yepi fanowdu (Mark. 7:31-35). A ben sabi fa trawan ben firi èn a ben sori taki a ben broko en ede nanga den. A no ben luku san den sma ben weri noso fa den ben tan, ma a ben si fa den sma ben de trutru na ini den ati (Luk. 7:36-40). Iya, na wan soifri fasi Yesus ben sori taki a e firi gi sma, neleki fa wi Gado e du dati.
3 „A ben sari den”: Yesus no ben du a diniwroko fu en leki wan plekti nomo. A ben „sari den” sma (Mark. 6:34). Na ini a ten disi, wi no e tyari wan boskopu gi sma nomo, ma wi e du muiti fu yepi sma fu no lasi a warti libi fu den. Du muiti fu kon frustan fu san ede sma e handri na wan spesrutu fasi. Fu san ede den sma e broko den ede nanga sani, noso fu san ede den e denki tra sani nomo? A de so taki falsi kerki fesiman no sorgu bun gi den èn taki den fesiman disi kori den na yeye fasi? Te wi e broko wi ede nanga tra sma trutru, dan dati kan meki taki den wani arki a bun nyunsu.—2 Kor. 6:4, 6.
4 Te wi e firi gi sma, dan dati kan naki den ati. Fu gi wan eksempre: Wan uma ben sari fu di en uma-pikin, di ben abi dri mun, lasi en libi. Di tu Kotoigi kon na en oso, dan a kari den kon na inisei soso fu sori den taki den sani di den e fruteri fu Gado, namku fu san ede A e gi pasi taki sma e pina, no tru. Ma bakaten, na uma taki: „Nanga furu sari-ati den ben arki mi, èn di den ben e gowe, mi ben firi so bun, taki mi taigi den fu kon baka na mi wan tra leisi.” Yu e meki muiti fu sori sari-ati gi ala sma di yu e miti na ini a preikiwroko?
5 Te wi e leri fu abi sari-ati gi sma, dan wi o man trowstu den trutru. Te wi e du disi, dan wi e prèise Yehovah „a Tata di abi bigi sari-ati”.—2 Kor. 1:3.