Yepi den bijbelstudenti fu kisi warderi gi den tumusi moi fasi fu Yehovah
1 Te wi e du a preikiwroko, dan wi no e leri sma den prenspari tru tori fu Bijbel wawan. Wi e yepi sma fu kon sabi fa Yehovah de trutru, èn wi e yepi den fu kisi warderi gi den tumusi moi fasi fu en. Te reti-atisma e kon sabi fa Gado de trutru, dan disi abi so furu krakti na den tapu, taki den de klariklari fu kenki den libi fu ’waka na wan fasi di Yehovah feni bun, so taki den kan plisi en dorodoro’.—Kol. 1:9, 10; 3:9, 10.
2 A nyun buku di wi kisi fu studeri Bijbel nanga sma: Na a bigin kaba, a Bijbel leri-buku e poti prakseri na den fasi fu Yehovah. Na ini a fosi kapitel kaba, wi e kisi piki tapu den aksi: Gado e broko en ede nanga yu trutru?, Fa Gado tan?, èn Wi man kon krosibei na Gado? A kapitel dati e poti prakseri tu na a santafasi fu Yehovah (par. 10), a retidu nanga sari-ati fu en (par. 11), a lobi fu en (par. 13), nanga a makti fu en (par. 16). A kapitel e sori tu taki Yehovah abi sari-ati nanga switifasi, taki a de klariklari fu gi pardon, taki a abi pasensi, èn taki a de loyaal (par. 19). Paragraaf 20 e taki syatu fu den sani disi: „O moro yu e kon sabi Yehovah, o moro a sa kon tron wan trutru sma gi yu. Yu sa abi moro reide fu lobi en èn fu firi taki yu de krosibei na en.”
3 Fa wi kan gebroiki a Bijbel leri-buku fu yepi bijbelstudenti fu kon krosibei na Yehovah? Baka te wi taki fu wan paragraaf di e poti prakseri na wan fu den fasi fu Gado, dan wi kan aksi a studenti: „San disi e leri yu fu a fasi fa Yehovah de?”, noso „Fa disi e sori taki Gado e broko en ede nanga yu?” Efu ten na ten wi e poti den sortu aksi disi gi a studenti, dan wi e leri den fu denki dipi fu den sani di den e leri èn wi e yepi den fu kisi moro warderi gi den tumusi moi fasi fu Yehovah.
4 Gebroiki a faki na a kaba fu ibri kapitel: Na a kaba fu ibri kapitel, poti prakseri na a faki: „San Bijbel e leri wi”. Aksi a studenti fu taki nanga en eigi wortu san a leri fu ibri penti. Poti prakseri na den bijbeltekst di kari. Fu gi a studenti a deki-ati fu taki san de na ini en ati, dan son leisi yu kan aksi en: “Fa yu e prakseri fu den sani di Bijbel e leri fu a penti disi?” Te yu e du disi, dan yu no e poti krakti wawan tapu den prenspari penti fu a kapitel, ma yu e kon si fa a studenti e prakseri trutru. Disi sa yepi a studenti fu bigin kisi wan banti nanga Yehovah.