Kon kisi bun gwenti na yeye fasi, èn kisi furu blesi
1. Fu san ede a bun fu ondrosuku den sani di yu gwenti du na ini na anbegi fu Yehovah?
1 Di yu tron wan Kresten, dan kande yu du furu muiti fu kisi a gwenti fu du sani di abi fu du nanga na anbegi fu Yehovah. Kande yu kisi a gwenti fu studeri Bijbel, fu teki prati na den Kresten konmakandra nanga a preikiwroko, èn fu begi. Fu di Yehovah blesi a muiti di yu du, meki yu kisi wan moro bun banti nanga en. Kande yu dopu wan tu yari kaba. Di yu ben e studeri fu tron wan Kresten, dan yu kon kisi bun gwenti na ini na anbegi fu Yehovah. Ma yu abi den gwenti disi ete?
2. Sortu wini wi e kisi te wi e leisi Bijbel ibri dei?
2 Ondrosuku den sani di yu gwenti fu du: Yu abi a gwenti fu leisi wan pisi fu Gado Wortu ibri dei? Wi e kisi furu wini te wi e du disi! (Yos. 1:8; Ps. 1:2, 3) Na ini Israel fu owruten, ibri kownu ben musu skrifi a Wet abra gi ensrefi, èn a ben musu leisi en „ala den dei fu en libi”. Sortu wini a ben o kisi? A ben o kisi trutru sakafasi èn a ben o leri fu frede Yehovah, so taki a no drai gowe libi den komando fu En (Deut. 17:18-20). Na so a de tu na ini a ten disi, taki te wi e leisi Bijbel ibri dei, disi e yepi wi fu tan sondro fowtu na ini na ogri èn kruka grontapu disi. A e yepi wi sosrefi fu de srekasreka fu du a preikiwroko.—Fil. 2:15; 2 Tim. 3:17.
3. Sortu wini wi e kisi te wi e go na den konmakandra doronomo?
3 Yesus ben abi a gwenti fu go na a snoga, pe sma ben taki fu den Buku fu Bijbel (Luk. 4:16). A no de fu taki dati disi gi en a krakti fu kakafutu gi den tesi di a ben o kisi. Wi sosrefi e kisi deki-ati fu den Bijbel leri di wi e kisi na den gemeente konmakandra, èn fu a moi ’deki-ati di wi e gi makandra’ (Rom. 1:12). Te wi e kon makandra nanga den brada nanga sisa fu wi, dan dati e yepi wi fu pasa den muilek lasti dei disi (Hebr. 10:24, 25). Yu abi a gwenti ete fu go na ala den konmakandra?
4. Sortu wini wi e kisi te wi e teki prati na a preikiwroko ibri wiki?
4 Den Buku fu Bijbel e fruteri wi taki den apostel ben meki a bun nyunsu bekènti ’ibri dei na ini a tempel èn na ibri oso’ (Tori. 5:42). Kande wi no man preiki ibri dei. Ma yu denki taki yu kan seti sani, so taki yu kan teki prati na a preikiwroko ibri wiki, na wán noso tra fasi? Te wi du disi, dan wi sa man gebroiki Gado Wortu moro bun, èn wi sa kisi ondrofeni di sa gi wi deki-ati te wi e prati den tru tori fu Bijbel nanga trawan.
5. Fu san ede a de tumusi prenspari fu begi Yehovah doronomo?
5 A profeiti Danièl ben kisi furu blesi fu di a ben dini Yehovah na wan ’loyaal fasi’ en heri libi langa. A ben abi a gwenti fu begi Yehovah doronomo (Dan. 6:10, 16, 20). Na a srefi fasi, te wi e tan begi Yehovah fayafaya, dan a sa blesi wi nanga en santa yeye (Luk. 11:9-13). Boiti dati, Yehovah fu en sei sa kon krosibei na wi, so taki wi kan kisi wan krosibei banti nanga en (Ps. 25:14; Yak. 4:8). Disi na trutru wan bigi blesi! Fu dati ede, meki wi du tranga muiti fu tan abi bun gwenti na ini na anbegi fu Yehovah. Na so fasi wi sa kisi furu blesi fu Yehovah.