San yu e si leki a moro prenspari sani na ini yu libi?
1 Fa yu ben o piki na aksi dati? A tru taki wi alamala wani poti Kownukondre afersi na a fosi presi na ini wi libi (Mat. 6:33). Ma wi kan aksi wisrefi, ’A de so taki den bosroiti di mi e teki e sori taki mi e du disi trutru?’ Bijbel e gi wi deki-ati fu ’tan buweisi sortu sma wi de’ (2 Kor. 13:5). Fa wi kan buweisi taki wi e poti a Kownukondre na a fosi presi na ini a wi libi?
2 A fasi fa wi e gebroiki wi ten: Wi kan bigin fu ondrosuku fa wi e gebroiki wi ten (Ef. 5:15, 16). Omeni ten wi e gebroiki ibri wiki fu abi demakandra nanga trawan, fu luku telefisi, fu go tapu Internet, noso fu du sani di wi lobi fu du na ini wi fri ten? Efu wi ben o skrifi na tapu papira omeni ten wi e gebroiki gi den sortu sani disi, èn efu wi ben o teki a ten dati gersi nanga a ten di wi e gebroiki na ini na anbegi fu Gado, dan kande wi o skreki. A de so taki wi e wroko moro langa soso fu kan bai moimoi sani, èn taki disi e meki taki wi no e du a santa diniwroko so furu moro? Omeni leisi wi e misi den konmakandra noso a preikiwroko soso fu abi prisiriten den satra nanga sonde?
3 Poti den moro prenspari sani na a fosi presi: Furu fu wi no abi nofo ten fu du ala sani di wi wani du. Fu dati ede, efu wi wani poti Kownukondre afersi na a fosi presi na ini wi libi, dan wi musu ondrosuku san wi e si leki prenspari sani, èn baka dati wi musu poti ten fu du „den moro prenspari sani” (Fil. 1:10). Den prenspari sani disi na a studeri di wi musu studeri Gado Wortu, a preikiwroko, a sorgu di wi musu sorgu gi wi osofamiri, èn den Kresten konmakandra (Ps. 1:1, 2; Rom. 10:13, 14; 1 Tim. 5:8; Hebr. 10:24, 25). A tru taki tra sani bun gi wi tu, soleki fu oefen wi skin èn fu abi prisiriten di fiti (Mark. 6:31; 1 Tim. 4:8). Ma den sani disi no musu prenspari moro Kownukondre afersi.
4 Wan yongu brada ben poti Kownukondre afersi na a fosi presi di a bigin nanga a furuten diniwroko. A du disi, na presi fu teki moro hei skoroleri fu sreka ensrefi gi wan grontapuwroko. A leri wan tra tongo èn a froisi go dini na wan presi pe moro preikiman ben de fanowdu. A ben taki: „Mi e prisiri srefisrefi dyaso. A preikiwroko e gi mi prisiri srefisrefi! Mi e winsi taki ibri yongusma ben o du a wroko disi, so taki den kan firi san mi e firi. Nowan enkri tra sani de leki fu dini Yehovah nanga ala den sani di wi abi.” Iya, te wi e poti a Kownukondre na a fosi presi, dan wi e kisi blesi; ma san de moro prenspari, na taki a e plisi wi hemel Tata, Yehovah.—Hebr. 6:10.