„Tan du disi fu memre mi”
Wi sa memre a dede fu Yesus tapu 2 april
1. Fu san ede 2 april 2007 na wan prenspari dei?
1 Tapu 2 april 2007, milyunmilyun sma na grontapu sa kon makandra fu memre a dede di Yesus dede leki srakti-ofrandi. Yesus dede fu di a ben de wan sma di ben sori taki en hemel Tata abi a reti fu tiri hemel nanga grontapu. Na a fasi disi Yesus buweisi sosrefi taki Satan Didibri na wan leiman fu di Satan ben taki dati libisma e dini Gado soso fu man kisi wini gi densrefi (Yob 2:1-5). A Memrefesa e memre wi sosrefi taki Yesus „gi en sili leki wan lusu-paiman fu frulusu furu sma”, fu di a dede leki wan libisma sondro sondu (Mat. 20:28). Fu dati ede, Yesus ben komanderi en disipel: „Tan du disi fu memre mi” (Luk. 22:19). Yu abi warderi gi a moi kado disi fu Gado, èn a de so taki disi e naki yu ati fu bigin sreka sani fu memre a lobi di Gado sori na wan kefalek moi fasi gi wi?—Yoh. 3:16.
2. Fa wi kan sreka wi ati gi a Memrefesa?
2 Sreka yu ati: Te wi e prakseri san ben pasa nanga Yesus na ini den lasti dei di a ben de na grontapu leki libisma, dan wi kan sreka wi ati gi a Memrefesa disi (Esra 7:10). Na ini Ondrosuku den Buku fu Bijbel èn na tapu a kalender fu 2007, wan spesrutu schema fu leisi Bijbel de fu feni di sa yepi wi fu du disi. Wi kan leisi san ben pasa ibri dei na ini a pisi ten di Yesus dede. Den dei èn den sani di kari na ini den Bijbel tori e kruderi nanga a kalender fu den Dyu, di e teri wan dei fu sondongo te go miti sondongo. Den brada hori a sani disi na prakseri èn disi de fu si na a schema fu leisi Bijbel na a ten fu a Memrefesa. Efu wi e poti prakseri na den sani di wi e leisi na a Bijbel leisipisi èn efu wi e begi èn denki dipi fu a fasi fa Gado lobi wi, dan wi sa kisi furu wini fu a Memrefesa.
3. Fa wi kan yepi sma di wani sabi moro, èn sma di tapu nanga a diniwroko fu den fu kisi wini fu a Memrefesa?
3 Gi trawan wan kari fu kon: Na inibere pisi fu Wi Kownukondre diniwroko fu februari e taki fu wan spesrutu kotoigiwroko di sa hori fu gi sma wan kari gi a spesrutu konmakandra disi. Yu seti sani kaba fu teki prati dorodoro na a kotoigiwroko disi? Yu skrifi den nen fu den sma di yu wani gi wan kari, èn a de so taki yu bigin kari den kaba? Seti sani fu go fruku na a Memrefesa, so taki yu kan gi wan switikon na den sma di yu kari, ma sosrefi tra sma. Yu kan sidon nanga den, èn yu kan sorgu taki den abi wan Bijbel nanga wan singibuku. Meki den kon leri sabi trawan na ini a gemeente. Baka a konmakandra yu musu teki ten fu piki den aksi di den abi. Gi den wan kari fu kon na a spesrutu publikitaki di sa hori tapu 15 april. Den owruman spesrutu sa meki muiti fu gi wan kari na den sma di ben abi demakandra nanga a gemeente, ma di tapu nanga a diniwroko fu den. Den sa gi den wan kari gi a Memrefesa nanga a spesrutu publikitaki.
4. Fa wi kan yepi sma fu tan gro na yeye fasi baka a Memrefesa?
4 Yepi den nyunwan nanga preikiman, di tapu nanga a diniwroko, fu go na fesi: A takiman na a Memrefesa sa taki syatu fu a seti di de fu studeri Bijbel nanga sma, èn fu gi den sma di no e studeri so langa ete a deki-ati fu tan teki leri fu Yehovah. Yu kan gebroiki den sani di a e taki fu aksi den sma di yu kari gi a Memrefesa efu den wani leri moro fu Yehovah. Efu den no e studeri Bijbel ete, dan baka a Memrefesa yu musu go wantewante na den èn yu musu sori den fa den kan kisi wan bijbelstudie sondro fu pai gi dati. Efu den wani gro na yeye fasi, dan den musu go na den gemeente konmakandra tu (Hebr. 10:24, 25). Gi den a deki-ati fu bigin go na den konmakandra doronomo. Den owruman musu seti sani fu go na den brada nanga sisa di tapu nanga a diniwroko fu den, ma di kon na a Memrefesa. Den owruman musu yepi den fu poti prakseri na den sani di kon na fesi na ini a lezing. Disi kan gi den deki-ati fu bigin wroko makandra baka nanga a gemeente.
5. Sortu wini wi e kisi te wi de na a Memrefesa?
5 A Memrefesa e gi wi na okasi fu prakseri dipi fu den sani di Yehovah nanga Yesus du gi wi. Te wi e denki dipi fu a tori disi, dan wi e kisi moro lobi gi den èn disi sa de fu si na a fasi fa wi e tyari wisrefi (2 Kor. 5:14, 15; 1 Yoh. 4:11). Now na a ten fu bigin sreka wisrefi èn den sma di wani sabi moro, gi a moro prenspari okasi di wi e kisi fu „meki a dede fu Masra bekènti”.—1 Kor. 11:26.