„San yu ben o piki?”
1. Sortu problema furu fu wi abi?
1 A de so taki yu lobi Gado Wortu, ma taki yu e feni en muilek fu memre spesrutu Bijbel tori, noso spesrutu bijbeltekst? Yu wani taki den pikin fu yu kon frustan den prenspari tori nanga leri di de na ini Bijbel? Na artikel „Test uw kennis” (San yu ben o piki?) di de fu feni ibri mun na ini na Ontwaakt! tapu bladzijde 31, kan yepi yonguwan nanga owruwan fu kon leri sabi Gado Wortu moro bun.—Tori. 17:11.
2. Fa wi kan gebroiki den difrenti pisi fu na artikel „Test uw kennis”?
2 Fa yu kan gebroiki na artikel disi na wan bun fasi? Na Ontwaakt! fu yanuari 2006 ben gi wi den rai disi: ’Luku bladzijde 31 fu a tijdschrift disi . . . Son sani di skrifi drape de spesrutu gi yongu leisiman, ma son sani di skrifi drape na gi sma di sabi moro sani fu Bijbel. A pisi „Wanneer in de geschiedenis?” (O ten disi pasa na ini a historia?) sa yepi yu fu si krin o ten den sma di kari na ini Bijbel ben libi, èn o ten prenspari sani pasa. Den piki fu a pisi „Uit deze Ontwaakt!” (Na ini na Ontwaakt! disi) de fu feni na ini a heri tijdschrift. Ma den piki fu furu tra aksi sa de fu feni tapu wan spesrutu bladzijde pe den skrifi na so wan fasi, taki yu musu drai a tijdschrift fosi yu man leisi den. A ben o bun fu ondrosuku sani fosi, bifo yu luku den piki fu den aksi. Baka dati yu kan fruteri trawan san yu leri. Yu kan gebroiki a nyun artikel disi, „Test uw kennis”, fu hori Bijbel takimakandra nanga wan grupu sma, noso nanga yu osofamiri.’
3. Fa son osofamiri kisi wini fu na artikel disi, èn sortu pisi fu na artikel yu feni moi?
3 Furu osofamiri lobi fu gebroiki na artikel disi gi na a osofamiri studie fu den. Wán mama skrifi: „Te mi masra nanga mi e hori wi osofamiri studie nanga den pikin fu wi, dan wi e gebroiki a pisi tu pe den musu suku prenki na ini a tijdschrift. Na so a studie e tron wan prisiri sani gi na umapikin fu wi di abi dri yari. A de wan prisiri fu si fa a e teki en eigi Ontwaakt!, èn fa a e drai luku ala den bladzijde teleki a feni a prenki di a e suku.” Wan papa na ini Brasyonkondre taki: „Mi nanga mi boi di abi seibi yari, trutru lobi a pisi disi na ini na Ontwaakt! A yepi Moises fu poti yesi arki, fu suku den bijbeltekst, fu frustan den prenki, èn fu memre den ten pe spesrutu sani pasa.” Ashley di abi aiti yari, skrifi: „Grantangi gi na artikel „Test uw kennis” na a bakasei fu Ontwaakt! Mi e leri furu fu Bijbel nanga yepi fu na artikel disi.”
4. Fa wan osofamiri kan gebroiki na artikel disi leki wan pisi fu den osofamiri studie?
4 Fu san ede yu no e gebroiki na artikel „Test uw kennis” wanwan leisi na yu osofamiri studie? Yu kan gebroiki na Index noso a Watchtower Library tapu CD-ROM fu suku den piki fu wan tu fu den muilek aksi. Te yu e du disi, dan yu e leri den pikin fu yu fa densrefi kan ondrosuku sani finifini. Efu yu abi pikin di de moro owru, dan yu kan gi den a wroko fu suku den piki fu den pisi „Wie ben ik?” (Suma na mi?) noso „Wanneer in de geschiedenis?” bifo na osofamiri studie. Na a ten fu a studie den kan fruteri den trawan san den feni. Te papa nanga mama e gebroiki na artikel disi na wan bun fasi, dan dati na wán fasi fa den e poti a Wortu fu Gado dipi na ini den pikin, èn den e yepi den pikin fu kon sabi „den santa buku” te den yongu ete.—2 Tim. 3:15; Deut. 6:7.