„A e gi krakti na a sma di weri”
1 Ten na ten wi alamala e kon weri. Wi no e kon weri wawan fu di wi e wroko noso fu di wi e du tra sani, ma wi e kon weri sosrefi fu den problema di wi e kisi na ini den ’muilek ten disi di tranga fu pasa’ (2 Tim. 3:1). Leki futuboi fu Yehovah, fa wi e kisi a krakti di de fanowdu so taki wi man tan du wi diniwroko? Wi e kisi krakti fu di wi e frutrow tapu Yehovah di „tranga srefisrefi” (Yes. 40:26). A sabi san wi abi fanowdu èn a wani yepi wi trutru.—1 Petr. 5:7.
2 Den sani di Yehovah seti fu yepi wi: Yehovah e gi wi krakti nanga yepi fu en santa yeye, èn a srefi tranga krakti dati a gebroiki fu meki hemel nanga grontapu. A yeye fu Gado e yepi wi fu „kisi krakti baka” te wi e kon weri (Yes. 40:31). Aksi yusrefi: ’O ten ben de a lasti leisi di mi begi Yehovah spesrutu fu en santa yeye, fu gi mi krakti fu du mi wroko leki Kresten?’—Luk. 11:11-13.
3 Wi e kisi leri fu Yehovah te wi e leisi Gado Wortu ibri dei, e denki dipi fu en, èn te wi e studeri den Kresten publikâsi fu wi doronomo. Disi sa meki wi kon tranga „leki wan bon di prani pe watra e lon pasa, di e gi en eigi froktu te en ten doro, èn den wiwiri fu en no e kon flaw, èn ala san a e du sa waka bun”.—Ps. 1:2, 3.
4 Yehovah e gebroiki wi brada nanga sisa tu di kan ’de wan yepi gi wi, èn di kan gi wi tranga’ (Kol. 4:10, 11). Wi brada nanga sisa e tranga wi na den gemeente konmakandra fu di den e taki sani di e gi wi deki-ati, den e gi moi piki, èn den e hori moi lezing (Tori. 15:32). Spesrutu den Kresten owruman e yepi wi so taki wi kan tan dini Yehovah, èn den e gi wi deki-ati so taki wi e kisi krakti baka.—Yes. 32:1, 2.
5 A diniwroko: Efu yu e firi taki yu e kon weri, dan no tapu nanga preiki! Te wi e du a preikiwroko doronomo, wi e kisi moro krakti leki te wi ben o du tra sani (Mat. 11:28-30). Efu wi e preiki a bun nyunsu, dan dati sa yepi wi fu tan poti prakseri na Gado Kownukondre. A sa yepi wi tu fu hori a têgo libi na prakseri èn den moi blesi di dati sa tyari kon.
6 Furu sani de fu du ete, bifo na ogri grontapu disi kisi pori. Wi abi furu reide fu tan go doro nanga wi diniwroko, èn wi e frutrow taki ’Gado sa gi wi a krakti’ fu tan du dati (1 Petr. 4:11). Nanga a yepi fu Yehovah wi o kaba wi wroko, bika „a e gi krakti na a sma di weri”.—Yes. 40:29.