Yu e opo taki gi Gado Wortu?
1 Na ini a grontapu disi sma e taki furu tron dati Bijbel no tru. Ma tru Kresten e opo taki gi Gado Wortu fayafaya. Wi abi na overtoigi taki „na Gado srefi ben meki sma skrifi ala den sani di de na ini Gado buku”. Dati meki wi e agri nanga Yesus Krestes di ben taigi Yehovah na ini begi: „Yu wortu na waarheid” (2 Tim. 3:16; Yoh. 17:17). Fa wi kan opo taki gi Gado Wortu na wan bun fasi?
2 Leri bijbeltekst na ede: Wi kan de seiker taki Yesus ben studeri Gado Wortu fayafaya. Disi ben meki taki a ben man gi leri komoto fu Bijbel na ini en diniwroko (Luk. 4:16-21; 24:44-46). Fa wi kan sorgu taki wi e hori bijbeltekst na ede di wi man gebroiki bun? Wi musu leisi Bijbel ibri dei, èn dan wi musu denki dipi fu wan tekst di e gi wi spesrutu deki-ati noso di wi kan gebroiki na ini a diniwroko. Te wi e sreka wisrefi gi den konmakandra, wi musu suku den tekst di kari na ini na artikel èn wi musu leisi den langalanga komoto fu Bijbel. Kande wi kan sreka wisrefi fu gi wan piki fu wan fu den tekst. Na den konmakandra, wi musu leisi na ini wi Bijbel makandra nanga a takiman te a e leisi den tekst. Te wi e leri bijbeltekst na ede dan dati sa yepi wi fu „gebroiki a wortu fu waarheid na wan reti fasi”.—2 Tim. 2:15.
3 Gebroiki Bijbel fu gi wan piki: Te wi e preiki, wi musu gebroiki Bijbel fu gi sma wan piki. Fu eksempre, efu a kan, wi musu pruberi fu leisi wan tekst èn taki fu en nanga na ososma. Efu a sma e poti wan aksi noso efu a no e agri nanga wan sani, dan a bun fu gebroiki Bijbel fu piki a sma. Efu a sma no abi ten fu arki, toku wi kan pruberi fu fruteri en wan sani fu Bijbel. Wi kan taki disi: „Fosi mi gowe, grantangi gi mi na okasi fu leisi a tekst disi gi yu di skrifi na ini Bijbel.” Efu a kan, leisi langalanga fu Bijbel èn meki na ososma leisi a tekst makandra nanga yu.
4 Di wan preikiman ben sori wan ososma wan tu tekst fu Bijbel fu buweisi taki a Dri-wánfasi no tru, dan na ososma taki: „Mi heri libi mi go na kerki, ma mi no ben sabi taki a sani disi ben skrifi na ini Bijbel!” A ben breiti taki a ben kan bigin studeri Bijbel. Yesus ben taki dati en skapu ben o arki en sten (Yoh. 10:16, 27). A moro bun fasi fa wi kan meki opregtisma kon sabi san na a waarheid, na fu meki den leisi tekst langalanga fu Bijbel. Fu dati ede, meki wi opo taki gi Gado Wortu fu waarheid!