Gebroiki na bijbel ini a velddienst
1 Den wortoe di skrifi nanga jepi foe santa jeje èn di de ini na bijbel, kan abi wan bigi krakti tapoe libisma. Foe dati-ede, den fosi jarihondro kresten ben meki wan boen gebroiki foe den Boekoe di den ben meki a boen njoensoe bekènti. Paulus ben e ‘taki-go-taki-kon nanga jepi foe den Boekoe’ èn ben e froeklari èn ben boeweisi den penti foe en foe di a ben sori go na bijbeltekst (Tori. 17:2, 3). Di Apollos ben e gi kotoigi na den djoe, „a ben sori nanga jepi foe Den Boekoe taki Jesus ben de a Krestes”.—Tori. 18:24-28.
2 Ini a ten disi Jehovah Kotoigi e waka baka na eksempel disi. So leki fa skrifi na ini Na Waktitoren foe 1 maart 1986, blz. 26: „Te den e teki prati na a poebliki diniwroko, dan den wani meki den sma e froestan taki a boskopoe di den e preiki no e kon foe densrefi, ma e kon foe Gado eigi Wortoe. Foe dati-ede den e meki wantewante gebroiki foe na bijbel èn efoe a kan pikinso nomo, den e leisi na ini en, gi trawan.” Joe e meki wan dorodoro gebroiki foe a bijbel ini joe diniwroko?
FOE SAN-EDE A ABI BOEN BAKAPISI
3 Foe san-ede a bijbel abi so boen bakapisi? Foe di a de Gado Wortoe èn, a man foe si den prakseri èn den sani di a ati wani (Hebr. 4:12). Wan sma en troe boeweigi foe ati e kon a krin te a e kisi foe doe nanga na bijbel waarheid. A e hari reti-ati sma. Di foe eksempel, den ben aksi wan jongoe trowpaar di ben go esi-esi na fesi ini a dini foe Jehovah, foe san-ede den ben doe so esi tapoe a boen njoensoe, den ben piki: „Na bijbel ben doe dati.” Di den preikiman di ben kon na den doro, ben poti den prakseri tapoe na bijbel, den ben kon sabi a sten foe „a toemoesi boen herder”.—Joh. 10:14; w78 1/9 blz. 22, 23 [Bakratongo].
4 Joe e firi sontron taki joe no koni nofo te joe gebroiki joe bijbel ini a velddienst? Wan boen programa foe studeri nanga joesrefi pe joe abi na ini toe, sreka èn fisiti foe gemeentekonmakandra, sa meki joe krari gi ibri boen wroko èn sa gi joe froetrow srefisrefi (2 Tim. 3:16, 17). Patna ini a diniwroko èn den memre foe wan osofamiri kan loekoe makandra a Tori foe takimakandra. So srefi moro foeroe foe den inleiding a tapoe bladzijde 9-15 foe na Taki-go-taki-kon-boekoe abi wan tekst di kan gebroiki na a bigin foe a takimakandra. Foe san-ede joe no ben sa oefen wan toe foe den inleiding? Gebroiki san de praktis èn e wiki a belangstelling foe den sma na ini joe kontren.
GEBROIKI JOE FROESTAN FOE KROETOE SANI BOEN
5 Wanwan tron wi sa wani aksi na oso sma foe teki en eigi bijbel èn soekoe wan tekst nanga wi. Gebroiki joe froestan foe kroetoe sani boen ini den sortoe omstandigheid disi. (Loekoe Taki-go-taki-kon-boekoe blz. 78, par. 1, nanga blz. 308, par. 3.) Efoe a de fanowdoe foe wi meki en sjatoe, dan wi kan bosroiti foe leisi soso wan foe den tekst foe wi Tori foe takimakandra. Èn efoe a de krin foe si taki a oso sma de druk bezig, dan kande makriki wi kan kari wan pisi foe wan prakseri lin di fiti, ala di wi e meki a kon sabi taki a komoto foe a bijbel. Jesus nanga den apostel no ben abi wan foe den Hebrew Boekoe gi densrefi di den ben kan tjari nanga den na ini a preikiwroko. Tokoe den ben e kari foeroe pisi foe den. So srefi wi moesoe doe moeiti foe leri tekst na ede, so taki wi abi den wantron foe gebroiki den ini wi diniwroko.
6 Paulus ben e gi Timoteus deki-ati foe ‘gebroiki a Wortoe foe waarheid a wan soifri fasi’ (2 Tim. 2:15). Na deki-ati disi de so srefi gi wi ini a ten disi. Wi moesoe waka baka Jesus nanga den apostel foe di wi e meki foeroe tron gebroiki foe na bijbel ini a velddienst. Efoe a kan dan leisi na ini gi den sma, ma efoe a de fanowdoe taki en na ede. Te wi e doe disi na wan fasi di e wroko boen, dan a sa kon a krin taki wi na Gado dinari èn taki a boskopoe foe wi gron tranga ini en Wortoe.