Drai sma poeroe foe doengroe go na leti
1 Jeje doengroe e tapoe a grontapoe (Jes. 60:2). Sensi di libisma fadon ini sondoe, Satan, „a gado foe a seti foe sani disi,” hori sma na ini jeje doengroe, nanga a lagi di sma kon lagi na moreelfasi, leki bakapisi.—2 Kor. 4:4.
2 Wi e firi sari-ati neleki Jesus, foe di now wi kon kisi a leti nanga nanga jepi foe na waarheid? (Mat. 9:36) Efoe a de so, dan wi sa froestan na prenspari fasi foe na ordroe di a ben gi na apostel Paulus foe ‘opo den sma ai èn drai den poeroe foe doengroe go na leti èn foe a makti foe Satan go na Gado’.—Tori. 26:6-18.
LETI DEN JEJE ÈN ATI
3 Foe di wi e froestan taki Satan e breni na jeje foe den di de ini katibo ondro en èn e meki na ati foe den de sondro firi, dan san wi kan doe foe jepi den? Wi moesoe doro den jeje nanga ati foe den nanga a Wortoe foe Gado. Paulus ben begi efoe den ai foe na ati foe den Efese sma ben mag foe kisi a leti (Ef. 1:17, 18). Wan moro krakti sani no de foe doro na ati, leki a Wortoe foe Gado (Hebr. 4:12). A sabi disi moesoe gi oenoe reide foe leri foe gebroiki na bijbel na wan koni fasi te wi e taki nanga trawan.
4 Joe piki tapoe den aksi di e kon now sa jepi joe foe kon abi moro boen bakapisi ini a diniwroko. Joe e sreka joe srefi boen tapoe a velddienst? Joe e poti ten na wan sei foe oefen so taki te foe kaba joe kan kon froetrow nanga span fasi foe meki wan takimakandra bigin lolo? Joe poti leki marki gi joesrefi, foe kon sabi na Tori foe takimakandra di wi e hori now èn joe e proeberi foe gebroiki en? Joe e proeberi foe taki nanga a krakti foe overtoigi sma, te joe e taki foe a Bijbel na den doro?—Tori. 17:2.
NA WAKTITOREN WAN JEPI
5 Na tijdschrift Na Waktitoren jepi miljoenmiljoen sma foe drai komoto foe a doengroe go na a leti. A e meki wi si fa wi kan gebroiki den moreel gronprakseri foe a bijbel, fa wi kan froestan den profeititori gi oenoe ten èn fa wi moesoe kan si a difrenti a mindri a troe nanga a falsi kerki foe kan waka na wan fasi di Jehovah feni boen.
6 San na bijbel waarheid, di Na Waktitoren e djompo gi, ben abi leki froktoe? Nanga jepi foe soifri sabi foe Gado nanga en Manpikin ala sortoe sma e feni jepi foe kisi kibri (Joh. 17:3; 1 Tim. 2:4). Wan leisiman ben skrifi: ‘Mi abi toemoesi foeroe warderi gi Na Waktitoren! Den tori ben moesoe jepi ibriwan sma foe si krin ini sortoe ten wi e libi. Mi e taigi oenoe boen foeroe tangi foe den foeroe ondrosoekoe, studie nanga wroko di e go na ini a sreka foe a tijdschrift Na Waktitoren, di abi troetroe jeje njanjan.’
7 Efoe wi e go oso-foe-oso, e teki prati na a gi kotoigi na strati ofoe e gi okasi kotoigi na kompe wrokoman, skoro kompe nanga famiriman, dan wi abi wan prati ini a panja foe a waarheid di kan meki sma kon fri (Joh. 8:32). Na Waktitoren na wan speroetoe wrokosani di kan jepi den foe kisi fri èn foe kon si taki na howpoe foe den tapoe têgo libi e kon troe, foe di a e drai den poeroe foe doengroe go na leti.