Wi e prisiri fu gi wisrefi na ini a diniwroko fu Yehovah!
1 Na apostel Paulus ben prisiri fu ’gi ensrefi dorodoro’ so taki a ben kan du en Kresten diniwroko (2 Kor. 12:15). Neleki Paulus, na so furu Kresten na ini a ten disi e wroko tranga leki pionier. Trawan musu du furu fu di den abi a frantwortu fu sorgu gi den osofamiri, ma toku den e meki ten fu preiki ibri wiki. Srefi den wan di siki seryusu èn di no man du so furu moro, e horibaka gi Kownukondre afersi. A e gi wi deki-ati trutru fu si fa a pipel fu Yehovah e gi densrefi na ini a diniwroko fu en, awinsi den yongu noso owru, èn awinsi na ini sortu situwâsi den de.
2 Lobi gi tra sma: Te wi e du ala san wi man fu dini Yehovah èn te wi e sori lobi gi en nanga tra sma, dan wi sa abi wan krin konsensi. Fu di Paulus ben gi ensrefi fu preiki a bun nyunsu, meki a ben kan taki nanga prisiri: „Mi e teki unu leki kotoigi tide taki mi no abi a brudu fu nowan sma na mi tapu” (Tori. 20:24, 26; 1 Tes. 2:8). Te wi e du ala san wi man na ini a preikiwroko, dan dati sa yepi wi fu no abi brudu-paiman.—Esek. 3:18-21.
3 Te wi e wroko tranga fu yepi trawan, wi o de koloku (Tori. 20:35). Wan brada ben taki: „Te mi wroko wan heri dei gi Yehovah èn mi e go na oso na mofoneti, dan mi weri trutru. Toku mi de koloku èn mi e taigi Yehovah tangi taki a gi mi sowan prisiri wroko di no wan sma kan puru fu mi.”
4 Lobi gi Gado: A moro prenspari reide fu san ede wi e gi wisrefi na ini a diniwroko fu Yehovah na taki a e plisi wi hemel Tata. Fu di wi lobi Gado meki wi e hori wisrefi na den komando fu en, èn disi wani taki tu dati wi e preiki èn e meki disipel (1 Yoh. 5:3). Srefi te sma no wani arki wi, noso te wi e kisi gens, wi sa tan wroko tranga gi Yehovah nanga prisiri.
5 Now a no a ten fu draidrai, fu di wi e libi na ini a ten fu a kotiwroko (Mat. 9:37). Nofo tron te wan gronman musu du a kotiwroko, a e wroko bun langa fu koti den sani di a prani, bika efu a e draidrai, den sani o pori. Na so a de tu taki na ini a ten disi fu a kotiwroko, furu ten no de moro fu preiki. Sobun, meki wi alamala hori na prakseri na ini sortu ten wi e libi, èn meki wi tan du tranga muiti fu du a preikiwroko.—Luk. 13:24; 1 Kor. 7:29-31.