„Koloku fu a sma di e tan horidoro te tesi e miti en”
1 Ala Kresten e kisi tesi (2 Tim. 3:12). Den tesi disi kan de siki, moni problema, frufolgu, noso tra sani. Satan e tyari tesi kon na wi tapu so taki wi no o de fayafaya moro, wi no o du wi Kresten diniwroko bun moro, noso wi o tapu fu dini Gado (Yob 1:9-11). Te tesi e miti wi èn wi e horidoro, dan fa dati o meki taki wi o de koloku?—2 Petr. 2:9.
2 Sreka yusrefi gi tesi: Yehovah gi wi en Wortu fu waarheid, pe a libi nanga den leri fu Yesus skrifi na ini. Te wi e arki Yesus èn te wi e du san a e taki, dan wi sa abi wan tranga bribi èn wi sa de srekasreka te tesi o miti wi (Luk. 6:47-49). Wi e kisi deki-ati tu fu wi brada nanga sisa, den gemeente konmakandra nanga den buku di e taki fu Bijbel di a getrow èn koni srafu e tyari kon na doro. Wi e begi Gado doronomo tu.—Mat. 6:13.
3 Yehovah gi wi howpu tu. Te wi abi wan tranga bribi na ini den pramisi fu Yehovah, a howpu fu wi sa tron leki ’wan ankra gi a sili, a o de seiker èn a o tranga’ (Hebr. 6:19). Na ini Bijbel ten, sipi no ben e gowe fu a lanpe sondro wan ankra, srefi te a weer ben moi. Efu wan bigi winti ben o kon wantronso, dan a sipi no ben o naki panya na a syoro pe furu ston de efu den ben o trowe na ankra na ini se. Na so a de tu taki, te wi abi wan tranga bribi na ini den pramisi fu Gado now, dan dati sa yepi wi fu man horidoro te problema e miti wi. Wi kan kisi problema wantronso. Aladi den sma na ini Listra ben de klariklari fu arki Paulus nanga Barnabas, toku a situwâsi kenki wantewante di den Dyu di ben frufolgu den kon na Listra.—Tori. 14:8-19.
4 Wi o de koloku te wi e horidoro: Te wi e tan du a preikiwroko srefi te sma e gens wi, dan wi sa de koloku. Wi e prisiri fu di wi de warti nofo fu kisi syen fu Krestes nen ede (Tori. 5:40, 41). Efu wi e horidoro te wi e kisi tesi, dan dati o yepi wi fu kisi moro sakafasi, fu gi yesi moro bun, èn fu horidoro na wan moro bun fasi (Deut. 8:16; Hebr. 5:8; Yak. 1:2, 3). Te wi e horidoro, dan dati e leri wi fu frutrow tapu Yehovah, fu frutrow taki a sa du san a pramisi wi, èn fu suku kibri na en.—Odo 18:10.
5 Wi sabi taki tesi de fu wan syatu pisi ten nomo (2 Kor. 4:17, 18). Den tesi di wi e kisi e gi wi na okasi fu sori o bigi a lobi de di wi abi gi Yehovah. Efu wi e horidoro te wi e kisi tesi, dan wi kan gi Satan wan piki tapu den sani di a taki. Fu dati ede, wi e tan horidoro! „Koloku fu a sma di e tan horidoro te tesi e miti en, bika te Yehovah feni en bun, dan a o pai en nanga libi.”—Yak. 1:12.