Trowstu den sma di brokosaka
1 Noiti ete na ini a historia fu libisma, a de so taki libisma abi so furu trowstu fanowdu leki now. Neleki Yesus, wisrefi e du muiti fu yepi „den wan di brokosaka”.—Yes. 61:1.
2 Fa fu trowstu sma: Te wi wani trowstu sma, dan den sani di wi e taki na ini a preikiwroko no musu broko den saka, ma a musu gi den deki-ati. Te wi e taki nanga sma, wi no musu taki tumusi furu fu den ogri sani di e pasa na grontapu èn fu den falsi kerkileri. Na presi fu dati, wi musu taki moro furu fu den tru tori fu Bijbel èn fu den tumusi moi pramisi fu Gado di e trowstu sma. Ma, disi no wani taki dati wi no musu taki fu Armagedon. A wroko di wi kisi fu du na fu meki ’a yari fu bun wani bekènti fu a sei fu Yehovah èn a dei fu atibron fu a sei fu wi Gado’, èn ’fu warskow na ogrisma gi na ogri fasi fu en’. Ma a warskow di wi e warskow sma gi Armagedon èn a pori di a o tyari kon, no musu de moro prenspari leki a bun nyunsu fu Gado Kownukondre.—Yes. 61:2; Esek. 3:18; Mat. 24:14.
3 Preiki oso-fu-oso: Nofo tron wi e miti sma di brokosaka fu di den e siki, fu di den lasi wan lobiwan na ini dede, fu di den e si taki kruktudu e pasa na ala sei, noso fu di den abi moni problema. Leki sma di e waka baka Krestes, wi e „firi sari” gi den sma di wi e miti na ini a preikiwroko, èn wi e sori taki wi e firi gi den (Luk. 7:13; Rom. 12:15). Aladi wi e leisi wán noso tu bijbeltekst di abi fu du nanga a problema fu na ososma, toku wi musu de „gaw fu yere”, èn na so fasi wi e gi a sma na okasi fu taki fa a e denki fu sani (Yak. 1:19). Te wi e arki na ososma fosi, dan a o de moro makriki gi wi fu trowstu en.
4 Na ini a takimakandra di yu abi nanga na ososma, yu kan suku a yoisti ten fu taki disi kande: „Mi sa wani leisi wan tu bijbeltekst gi yu di sa gi yu deki-ati.” Gebroiki a koni fu man si sani krin. Disi o yepi yu fu no sori a sma tapu ibri fowtu denki di a abi. Na presi fu dati, wi wani gi sma deki-ati èn wi wani trowstu den, fu di wi e gebroiki bijbeltekst fu tranga den. Te a abi fu du nanga a tori disi, dan yu kan gebroiki a buku Redeneren aan de hand van de Schrift bladzijde 25-28 na a ondro-edeprakseri „aanmoediging”. Noso yu kan gi na ososma a traktaat di nen Trowstu gi den wan di brokosaka. Yu kan luku wan tu sani fu a traktaat nanga en, so taki a kan kisi deki-ati fu dati.
5 Suku okasi fu trowstu trawan: Yu sabi wan sma na ini a birti, na wrokope, na skoro, noso na ini a famiri fu yu di abi trowstu fanowdu? A ben o bun fu meki muiti fu go luku den sma disi na den oso, so taki yu kan trowstu den nanga yepi fu Bijbel. Te yu sabi san e meki den firi brokosaka, dan yu kan sreka yusrefi fu taki fu a tori dati. Na so wan tu preikiman ben skrifi brifi, noso den ben bel sma fu trowstu den. Fu di wi abi trutru lobi gi tra sma, meki wi sa wani sori den a lobi dati, èn nanga yepi fu Bijbel wi sa wani gi den a trowstu di den abi fanowdu.—Luk. 10:25-37.
6 Iya, wi kisi a wroko fu trowstu den sma di e sari fu di wan sma fu den dede. Boiti dati, wi musu meki den firi prisiri baka, èn wi musu gi den a howpu gi wan koloku tamara. Disi na a trowstu di sma na heri grontapu abi fanowdu. Te wi e taki nanga prisiri fu den furu moi sani di Gado pramisi, dan dati sa trowstu opregtisma èn a sa gi den howpu. Meki wi hori na prakseri ala ten taki a de fanowdu fu trowstu den sma di brokosaka.