Go na fesi na ini a preikiwroko
1 Wi hemel Tata e prisiri te den futuboi fu en e go na fesi na ini a tru anbegi. Disi abi fu du nanga a fasi fa den e tron bun preikiman di e preiki a bun nyunsu nanga bun bakapisi. Paulus ben gi na owruman Timoteyus a deki-ati fu tan meki muiti so taki ala sma ben o man si taki a e go na fesi (1 Tim. 4:13-15). Wi alamala musu meki muiti fu du wi diniwroko na wan moro bun fasi, srefi wi di de preikiman di abi furu ondrofeni.
2 Poti marki gi yusrefi: Te wi wani go na fesi, dan wi musu poti marki gi wisrefi. San na wan tu marki di wi kan poti gi wisrefi? Kande wi kan du muiti fu gebroiki a yeye feti-owru fu wi, a Bijbel, na wan moro bun fasi (Ef. 6:17). Wi e du a diniwroko na difrenti fasi. Kande wi musu du muiti fu du a diniwroko moro bun na wan fu den fasi disi. Disi kan de fu du stratiwroko, fu gi kotoigi nanga yepi fu telefon, noso fu gi kotoigi na bisnis kontren. Kande wi kan meki muiti fu tyari gobaka na wan moro bun fasi. Wan tra moi marki di wi kan suku fu doro na fu bigin èn fu hori bijbelstudie na wan moro bun fasi.
3 Sani di seti: Den gemeente konmakandra, spesrutu a Theokrasia Diniwroko-skoro nanga a Diniwroko Konmakandra, na konmakandra di seti fu meki wi tron moro bun preikiman. Te wi e du tranga muiti fu sreka wisrefi gi den konmakandra disi, te wi e go na den, èn te wi e fiti den rai di wi e kisi, dan trutru wi sa kisi furu wini.—2 Kor. 9:6.
4 Wi musu yepi makandra sosrefi fu go na fesi (Odo 27:17). Te wi e wroko makandra nanga tra preikiman, èn te wi e arki fa den e taki nanga sma na ini a preikiwroko, dan dati sa yepi wi fu go na fesi. Boiti dati, kande wi bukustudie-opziener kan seti sani fu yepi wi fu go na fesi. A de wan blesi fu kisi yepi fu wan pionier di abi ondrofeni, noso fu kisi yepi fu wan tra preikiman. Disi sa meki taki wi kan du a diniwroko na wan moro bun fasi èn taki wi kisi moro prisiri na ini a preikiwroko! Wan nyun preikiman de na a bukustudie fu wi? Kande wi kan aksi en fu wroko makandra nanga wi.
5 A moro prenspari wroko di e du na ini a ten disi na a Kresten diniwroko. Te wi e gi Yehovah wi „srakti-ofrandi fu prèise”, dan wi wani du ala san wi man na ini wi diniwroko (Hebr. 13:15). Efu wi e du muiti fu go na fesi na ini a diniwroko, dan wi sa tron wrokoman „di no abi fu syen fu noti èn di e gebroiki a wortu fu waarheid na wan reti fasi”.—2 Tim. 2:15.