Yepi trawan fu kon de bekwaam na ini na kobroiki fu na Wortu fu Gado
1 Yehovah seti bun furu sani fu leri wi fu du wi eigi diniwroko na wan bun fasi. Te wi e meki kobroiki fu den seti fu en, dan ’srefi den futu fu wi de klari’ (Ps. 37:23). Na so fu eksenpre na teyokrasia diniwroko skoro fu wan pisiten fu pikinmoro feifitenti yari kba e gi leri na wan progressief fasi na ini na koni fu fa fu taki èn fa fu gi leri na sma. Disi ben kon de bun dorodoro nanga na alawiki dienstkonmakandra nanga en praktis lezing, demo nanga takimakandra.
2 Wi e nyanbun fu den fisiti di kringopziener e tyari kon geregeld. Na dienstopziener e fisiti ibri bukustudiegrupu èn e gi deki-ati na wan lobi fasi fu yepi meki den koni fu wi na ini na publiki diniwroko kon moro bun. Makandra nanga ala disi, dan tin minuut praktis leri e gi na ibri velddienst konmakandra san e gi wi deki-ati èn bun rai fu a dei dati (Hebr. 10:23-25). Fu den sortu sani disi di en organisâsi seti e kon a krin na lobi sorgu fu Yehovah gi den sma di a gi na komando fu preiki na bun nyunsu.
YEPI YONGU SMA NANGA BEIBRI STUKAMAN
3 Yongu nanga nyun preikiman abi geregeld yepi fanowdu fu wan sma na ini na publiki diniwroko. Ala di wi alamala ten na ten kan gi yepi, toku na moro prenspari frantiwortu de tapu den papa nanga mama èn den sma di e gi den sortu sma disi beibristudi (Gal. 6:6; Ef. 6:4). Wan sma no e kon koni fu en srefi ini na kobroiki fu na beibri, baka wan pisiten èn baka te a kisi ondrofeni. Kontrari fu dati, yepi nanga a gi fu leri na wan systematisch èn lobi fasi de fanowdu.
4 Wan sma musu kisi yepi fu wan tra sma bifo a e teki prati trutru na ini na dienst. Luku syatu Tori fu takimakandra. Yepi den sma di doro den marki fu go na ini na velddienst, fu leri wan eenvoudig pristeri. Kande den kan kobroiki soso wán fu den beibri tekst di wi rikomanderi te leki den kisi moro ondrofeni èn frutrow. Ala di yu e wroko nanga den makandra na ini a dienst, teki ten a mindri tu doro fu prèise den èn fu gi den rai na wan switi fasi fu a fasi fa den kan tyari kenki kon. Poti krakti a tapu na fanowdu fu hori alaten wan yeyefasi fu begi. — Ef. 6:18, 19.
5 Ala di furu gewoon pionier nanga tra preikiman di abi moro furu ondrofeni de ini na dienst tapu mindriwiki dei, toku a de wan sani fu prèise te den preikiman disi di abi koni kan fiti a schema fu den so, taki ten na ten den kan horibaka gi na velddienst ini na kba fu na wiki. Den sortu persoonlijk ofrandi disi fu na sei fu den, tra sma di nanga ala prisiri ben sa wani go a fesi sa warderi srefisrefi, fu di den sa wroko makandra nanga den na ini na dienst. — Preyk. 4:9, 10.
6 Wan dei wi alamala ben de nyun èn no ben abi ondrofeni na ini na velddienst. Furu fu wi ben kisi deki-ati nanga leri fu preikiman ofu pionier di ben abi moro ondrofeni. Na disiten bekwaamheid fu wi nanga prisiri di kon de moro furu na ini na dienst de langalanga wan bakapisi fu na yepi dati (Odo 27:17; Tori. 20:35). Meki na warderi fu wi fu san Yehovah du gi wi fu di a ben gi wi leri na ini na dienst tapu wan bun fasi, pusu wi fu gi wi srefi fu yepi trawan fu kon de moro bekwaam ini na kobroiki fu Yehovah Wortu.