Yepi na a yoysti ten
1 Fu di Yeyses abi wan opregti broko-ede gi a gemeente, meki a sa gi en alaten „yepi na a yoysti ten” (Hebr. 4:16). Furu fu na fanowdu yepi e gi nanga yepi fu „presenti na ini sma”, so leki ben pramisi na ini Efeysiya sma 4:8, 11, 12. Ini ibri gemeente a dienstopziener de so wan presenti.
2 Fa a dienstopziener kan yepi unu? Na difrenti fasi: (1) A e du muyti fu wi alamala tan sabi na prensparifasi fu na preykiwroko èn a meki fu disipri. (2) A e broko en ede taki, nanga yepi fu den gemeente bukustudi-grupu sani e seti gi wan bun orga èn tiri na ini a preykiwroko. (3) Nanga belangstelling a e hori ay a tapu, taki wan fu wi e kisi a persoonlijk yepi di de fanowdu fu meki den bun bakapisi fu wi leki bedinari kon moro bun.
DEN FISITI FU A DIENSTOPZIENER
3 Boyti a tumusi bun yepi di a gemeente bukustudi seti e gwenti fu gi, dan spesrutu sani seti gi wi fu kisi yepi leki aparti sma. A gwenti de taki a dienstopziener e hori wan gemeente bukustudi, ma wan leysi ini wan mun, dan na presi taki a e wroko nanga en eygi grupu, a e wroko wan wiki makandra nanga wan fu den tra gemeente bukustudi. A sma di e asisteri en e hori a studi a wiki dati te a no de. A e fruteri a studieleider na fesi taki a sa fisiti den, so taki a grupu kan meki den fanowdu plan fu kan nyanbun dorodoro fu den aktiviteit fu a wiki dati.
4 Ini a spesrutu wiki disi a bukustudi sa hori 45 miniti akruderi a fasi fa den gwenti fu hori en. Disi e gi a dienstopziener a okasi fu hori wan taki fu 15 miniti di e gi deki-ati èn di abi leki marki fu yepi wi fu meki go-na-fesi na ini wi evangeliwroko. A de prenspari taki ala preykiman makandra nanga den wan di e kon pas de na tapu a bukustudi.
5 Ala preykiman na ini a grupu di a dienstopziener e fisiti, musu seti sani fu abi wan dorodoro prati na a preykiwroko na a ten fu a spesrutu fisiti disi, spesrutu na a kba fu na wiki. Pe a fiti, dan sani kan seti ini a wiki dati fu preyki na neti. Wan fu den sani di a dienstopziener e poti leki marki, de fu wroko ini a velddienst nanga so meni preykiman leki a kan. Kande a kan go nanga son wan fu wi na den gobaka ofu beybristudi fu wi. Ibriwan sma di abi yepi ofu deki-ati fanowdu na ini a diniwroko, kan go na en. So srefi wi kan nyanbun fu a fisiti fu en fu di wi e de tapu den velddienstkonmakandra di a e hori a wiki dati gi a grupu.
6 A dienstopziener e teki a ten fu taki nanga a studieleider fu na aktiviteit fu a grupu. Den e luku den fasti velddienst seti fu de seyker, taki den sani orga na wan praktis fasi, di bun gi ala sma. Efu son wan abi yepi ofu deki-ati fanowdu fu abi wan doronomo prati na a diniwroko dan en srefi kan taki nanga den èn gi den na wan switifasi wantu ray di sa yepi den fu go na fesi. A dienstopziener kan seti sani fu fisiti makandra nanga a studieleider den sma di no de geregeld. A kan luku so srefi den beybristudi rapport fu a grupu. Kande den kan go nanga son preykiman na den beybristudi fu den èn gi den deki-ati na yeye sey.
7 Den fisiti fu a dienstopziener no sa furu na ini gemeente di abi furu bukustudi. Fu dati-ede alasma musu du moro muyti leki san a gwenti fu nyanbun dorodoro fu en fisiti. Efu a e fisiti unu, dan unu musu poti prakseri tapu den ray di a e gi fu meki yu diniwroko kon moro bun èn du fayafaya muyti fu kobroyki den bifo a tra fisiti. A e taki fu en srefi taki a de na ini a gemeente fu yepi wi awasi oten. Na ini gemeente pe pikinso gemeente bukustudi de, a dienstopziener sa du muyti fu fisiti ibri grupu no moro mendri leki wan leysi na ini siksi mun.
8 Efu wi de klariklari fu wroko makandra nanga a dienstopziener èn fu horibaka gi en nanga wi heri ati te a e fisiti wi gemeente bukustudi, dan disi sa yepi wi fu meki den bun bakapisi fu wi ini a meki fu disipri kon moro bigi èn feni moro prisiri na ini wi diniwroko.