A fasi fa Gemeente Bukustudie opziener kan poti prakseri na trawan
1 A Gemeente Bukustudie seti fu „poti moro prakseri na a fasi fa ibriwan sma e gro na yeye fasi . . . Disi e sori wi a lobi bun-ati nanga a switifasi di Yehovah abi gi en pipel” (om–O blz. 77; Yes. 40:11). A Bukustudie opziener e prei wan prenspari rol ini a fasi fa a e poti prakseri na trawan.
2 Na a Bukustudie: Fu di furu tron a bukustudie grupu no musu abi furu sma, meki a Bukustudie opziener abi na okasi fu leri sabi ibri memre fu en grupu bun (Odo 27:23). Moro furu, okasi de fu abi demakandra bifo èn baka a Bukustudie fu ibri wiki. Na ini wan mun ten, dan a man abi na okasi fu taki nanga pikinmoro ala sma fu en grupu. Disi e yepi den memre fu a Bukustudie fu firi densrefi fri fu go na en te den abi fu du nanga problema èn te den abi deki-ati fanowdu.—Yes. 32:2.
3 A Bukustudie opziener e pruberi fu gi ala sma na ini a grupu a deki-ati fu abi wan prati na a studie. Wan fasi fa a kan du disi na fu sori switi fasi te a e hori a studie (1 Tes. 2:7, 8). A e suku fasi fu meki ala sma, srefi den yonguwan, abi wan prati na a takimakandra. Efu sonwan e syen fu gi piki, dan a kan gi yepi na den wan disi fu di a e meki wan mofo na fesi nanga den so taki den kan leisi wan bijbeltekst noso kan gi piki tapu wan spesrutu paragraaf. Kande a kan sori den fa fu gi piki nanga den eigi wortu.
4 Efu na assistent fu a Bukustudie opziener na wan dinari ini a diniwroko, na opziener kan seti sani na so wan fasi taki a kan hori a Bukustudie wan leisi ibri tu mun. Na so wan fasi na opziener e si fa a e hori a Bukustudie èn a kan gi en rai di kan yepi en. Disi na wan moi seti fu yepi brada go na fesi na ini a fasi fa den e gi leri!—Tit. 1:9.
5 Ini a preikiwroko: Wan fu den prenspari frantwortu fu a Bukustudie opziener na fu teki fesi ini a preikiwroko (Num. 27:16, 17). A e seti sani so taki a grupu kan gi kotoigi èn a e pruberi fu yepi ala sma na ini a grupu fu feni prisiri ini den diniwroko (Ef. 4:11, 12). Fu man du disi, a e poti a marki fu wroko nanga ibri memre fu a grupu ini a preikiwroko. A e wroko makandra nanga a dienstopziener fu seti sani sosrefi gi den wan di wani fu du son pisi fu den diniwroko moro bun, kisi yepi fu wan preikiman di abi moro ondrofeni.
6 Leki wan lobi-ati skapuman: A Bukustudie opziener e poti prakseri na den wan di no man abi so wan bigi prati na a preikiwroko fu a situwâsi ede di den de na ini. A e sorgu taki den wan di no man du so furu fu di den kon owru, malengri èn no man gowe libi oso, noso den wan di siki fu wan pisi ten noso den wan di kisi wan seryusu mankeri, sabi taki wan seti de gi den. Den sortu sma disi kan skrifi ibri 15 miniti na tapu den preikiwroko raportu fu di den no ben man wroko wan heri yuru ini wan mun. (A Dienstkomte fu a gemeente e taki suma kan meki gebroiki fu a seti disi.) A e poti prakseri sosrefi na den wan di de ini a grupu di no e preiki moro èn a sa pruberi fu yepi den wan disi fu bigin preiki baka, makandra nanga a gemeente.—Luk. 15:4-7.
7 Wi de nanga furu tangi taki Bukustudie opziener e poti prakseri na wi na wan lobi-ati fasi! Fu di den e poti prakseri na ibri sma aparti, meki dati e yepi „wi alamala kon de wán na ini a bribi . . . , teleki wi gro kon bigi èn kon lepi na ini Krestes”.—Ef. 4:13.