Yepi a Gemeente Bukustudie opziener fu yu
1 Ibriwan fu wi e kisi furu wini fu a Gemeente Bukustudie. A mun di pasa wi ben taki fa a Gemeente Bukustudie opziener e du en wroko. Te wi e yepi en, dan wi srefi ma sosrefi den brada nanga sisa fu wi kan kisi wini. Ma san wi kan du fu yepi en?
2 Go ibri wiki: A de prenspari fu go na den bukustudie, fu di den grupu no bigi. Poti en leki wan marki fu go ibri wiki. Wan tra sani di yu kan du fu yepi na fu kon biten. Na so a bukustudie opziener kan bigin a konmakandra biten soleki fa a fiti.—1 Kor. 14:40.
3 Piki di e gi deki-ati: Wan tra fasi fa yu kan yepi na fu sreka yusrefi bun na fesi èn fu gi piki di e gi deki-ati. Furu tron den moro bun piki na piki di e taki fu wan penti nomo. Na so yu e gi trawan deki-ati fu gi piki tu. Pruberi fu no taki ala sani di de na ini a paragraaf. Efu wan sani fu a studie e naki yu ati, dan taki fu a sani dati te yu e gi piki, bika dati sa gi ala sma moro deki-ati.—1 Petr. 4:10.
4 Efu yu abi a grani fu leisi den paragraaf na a bukustudie, dan du disi nanga faya. Te yu e leisi bun dan a e meki a studie waka moro bun.—1 Tim. 4:13.
5 Preikiwroko: Den preikiwroko konmakandra e hori na furu fu den presi pe den bukustudie e hori, èn te yu e horibaka gi den seti disi, dan dati e yepi a bukustudie opziener te a e teki fesi na ini a preikiwroko. Yu musu si den seti disi leki okasi fu kon sabi yu brada nanga sisa moro bun èn leki okasi fu man gi den deki-ati.
6 Preikiwroko raportu: Wan tra fasi fa yu kan yepi na opziener, na fu gi en yu preikiwroko raportu wantewante na a kaba fu ibri mun. Yu kan gi yu raportu na en, noso yu kan poti disi na ini a boksu ini a Kownukondre zaal di den poti spesrutu gi den raportu disi. A sekretarsi fu a gemeente kan teki ala den raportu fu a boksu disi di den bukustudie opziener kisi.
7 A Gemeente Bukustudie opziener sa warderi en trutru te yu e wroko makandra nanga en. San moro prenspari na taki yu kan de seiker taki Yehovah o ’de nanga a yeye di yu e sori’.—Fil. 4:23.