A Gemeente Bukustudie — Fu san ede wi abi en fanowdu
1. Fa a seti fu a Gemeente Bukustudie bigin?
1 Na ini a yari 1895, Bijbel Ondrosukuman ben abi studie grupu di ben kon kisi a nen Dageraadkringen (Mamanten grupu). Na a ten dati Yehovah Kotoigi ben tyari a nen Bijbel Ondrosukuman. Na den okasi dati den ben e gebroiki pisi fu a buku Millennial Dawn (A bigin fu a dusun yari). Bakaten, den studie grupu disi ben nen Bereaanse kringen voor bijbelstudie (Grupu fu Bereasma di e studeri Bijbel) (Tori. 17:11). Furu tron, wan pikin grupu fu sma ben e kon makandra na ini wan oso fu wan brada, noso sisa, na wan mofoneti di ben fiti gi den sma fu a grupu. Fosi a seti fu a Gemeente Bukustudie ben kon, dan na den sortu studie grupu disi ben e hori.
2. Fa wi kan ’gi makandra deki-ati’ tapu a bukustudie?
2 Wi e kisi deki-ati èn wi e kisi yepi: Fu di sani seti na so wan fasi taki den bukustudie grupu disi kan tan pikin, meki moro okasi de gi den wan di e go na a bukustudie fu sori den bribi nanga yepi fu den piki fu den. A bakapisi na taki wi e ’gi makandra deki-ati . . . , nanga a bribi di ibriwan fu wi abi’.—Rom. 1:12.
3, 4. Fa a seti fu a bukustudie e yepi wi fu du a diniwroko fu wi?
3 Te wi e luku fa a bukustudie opziener e gi leri, dan dati kan yepi wi fu „gebroiki a wortu fu a waarheid na wan reti fasi” (2 Tim. 2:15). Luku fa a e poti krakti tapu den tekst di e horibaka gi a pisi tori di unu e studeri. Efu a fiti na a buku san wi e studeri dan na a kaba fu a studie, a bukustudie opziener kan poti prakseri baka na den moro prenspari penti, aladi a e gebroiki Bijbel wawan. A bun eksempre fu na opziener kan yepi wi fu kon tron moro bun leriman na ini a Kresten diniwroko.—1 Kor. 11:1.
4 Boiti taki na opziener e hori a studie ibri wiki, a e teki fesi tu na ini a preikiwroko. Nanga yepi fu a dienstopziener, a e seti sani na so wan fasi taki a grupu kan go na ini a preikiwroko. A e meki muiti fu yepi ala sma na ini a grupu fu du a frantwortu di den abi leki Kresten, namku fu preiki a bun nyunsu èn fu meki disipel.—Mat. 28:19, 20; 1 Kor. 9:16.
5. Fa a bukustudie kan yepi ibriwan fu wi?
5 A bukustudie opziener e broko en ede nanga a yeye fasi fu ibri sma na ini a grupu. A e sori disi na den gemeente konmakandra èn te a e wroko makandra nanga trawan na ini a preikiwroko. Te a e fisiti den brada nanga sisa na oso, dan a e gebroiki den okasi disi fu gi den deki-ati na yeye fasi. Ala sma musu firi fri fu go na a bukustudie opziener fu suku yepi na yeye fasi te dati de fanowdu.—Yes. 32:1, 2.
6. (a) Fa den brada nanga sisa fu wi na ini son kondre kisi krakti na den konmakandra di den ben hori na ini pikinpikin grupu? (b) Fa yusrefi kisi wini fu a seti fu a bukustudie?
6 Gi makandra krakti: Na ini kondre pe lanti tapu a wroko fu a pipel fu Gado, furu tron den brada nanga sisa e kon makandra na ini pikinpikin grupu. Wán brada ben taki: „Aladi a Kresten diniwroko fu wi ben tapu, toku wi ben e hori wi alawiki konmakandra na ini grupu fu 10 te go miti 15 sma. Den konmakandra disi ben e gi wi krakti na yeye fasi fu di wi ben e studeri Bijbel èn fu di wi ben abi bun demakandra baka a studie. Wi ben e agersi den ondrofenitori fu wi nanga makandra, èn disi ben e yepi wi fu frustan taki wi alamala ben abi den srefi problema” (1 Petr. 5:9). Meki wi gi makandra krakti na a srefi fasi, fu di wi e horibaka dorodoro gi a seti fu a Gemeente Bukustudie.—Ef. 4:16.