A fasi fa a Gemeente Bukustudie e yepi wi
1. Fa den feifi konmakandra di wi abi ibri wiki, e yepi wi?
1 Ibriwan fu den feifi konmakandra di wi abi ibri wiki, e hori na wan tra fasi èn wi e leri difrenti sani. Toku den alamala prenspari, fu di den e yepi wi fu ’poti prakseri na makandra, so taki wi kan gi makandra deki-ati fu abi lobi èn fu du bun wroko’ (Hebr. 10:24, 25). San na wan tu aparti sani fu a Gemeente Bukustudie, èn san na wan tu winimarki fu a seti disi?
2. Sortu wini wi e kisi fu di wi e kon makandra na ini wan pikin grupu na a Bukustudie?
2 A Bukustudie e yepi wi fu go na fesi na ini na anbegi: Nofo tron a de so taki den sma di e go na wan Bukustudie no de so furu leki den sma di e go na den tra gemeente konmakandra. Fu di furu sma no de na a Bukustudie, meki a de moro makriki gi wi fu tron mati fu sma di kan gi wi deki-ati fu go na fesi na ini na anbegi (Odo 18:24). Yu e pruberi fu kon leri sabi ibri sma fu yu Bukustudie? Kande yu kan aksi ibriwan fu den fu wroko makandra nanga yu na ini a preikiwroko. A seti fu a Bukustudie e gi a Bukustudie-opziener na okasi fu kon leri sabi ibriwan fu den sma fu a grupu. Na so fasi a man sabi a situwâsi fu den èn a man gi den deki-ati.—Odo 27:23.
3. Fu san ede a seti fu a Bukustudie e meki en moro makriki gi bijbelstudenti fu kon na a konmakandra disi èn fu gi piki?
3 Yu gi den bijbelstudenti fu yu wan kari fu kon nanga yu na a Bukustudie? Sma de di no e studeri so langa ete èn di e draidrai fu go na den gemeente konmakandra, fu di den e syensyen fu miti furu sma. Kande den sma disi no o syen so furu fu miti wan pikin grupu di e kon makandra na ini na oso fu wan sma. Fu di den sma na a Bukustudie e sori switifasi, meki a de makriki gi yonguwan èn gi den sma di no e studeri so langa ete, fu gi piki. Fu di a grupu pikin, meki wi e kisi furu okasi fu gi piki èn fu prèise Yehovah.—Ps. 111:1.
4. Fu san ede a bun taki a Bukustudie de krosibei?
4 Nofo tron den Bukustudie e hori na presi di de na ini a birti pe den preikiman e tan. A no de so taki wi alamala man go na wan Bukustudie di de krosibei, ma te wi e go na a Bukustudie di den brada taigi wi fu go, dan nofo tron a no de so fara leki a presi pe wi e hori den tra gemeente konmakandra. A presi pe a Bukustudie e hori, kan de wan bun presi tu fu hori den preikiwroko konmakandra.
5. Fa a Bukustudie-opziener kan yepi wi fu du a preikiwroko moro bun?
5 Wi e kisi yepi fu du a preikiwroko moro bun: A Bukustudie-opziener de klariklari fu yepi ibri sma fu a grupu fu go doronomo na ini a preikiwroko, fu preiki moro bun, èn fu abi prisiri na ini a wroko dati. Fu dati ede a e meki muiti fu wroko nanga ibriwan sma fu a grupu, so taki a kan yepi den fu preiki na difrenti fasi. Efu a de so taki yu e feni en muilek fu tyari gobaka, noso fu du wan tra sani na ini a preikiwroko, dan yu kan fruteri yu Bukustudie-opziener dati. Kande a kan seti sani na so wan fasi taki yu e wroko makandra nanga wan preikiman na ini a grupu, di abi furu ondrofeni. Te yu e luku na sortu bun fasi a Bukustudie-opziener e gi leri na a Bukustudie, dan dati kan yepi yu fu gi den bijbelstudie fu yu leri na wan moro bun fasi.—1 Kor. 4:17.
6. Fu san ede wi musu du muiti fu kisi wini dorodoro fu a Bukustudie?
6 A Gemeente Bukustudie na wan tumusi bun seti! A lobi-ati seti disi fu Yehovah, e yepi wi fu no fadon komoto na bribi na ini a ten disi di muilek srefisrefi.—Ps. 26:12.