Wroko makandra nanga oen gemeente boekoestudieleider
1 A gemeente boekoestudie e prei wan prenspari rol ini a gro foe den bekwaamfasi foe wi leki wan bedinari foe a boen njoensoe. Foe espresi den e hori den groepoe pikin nanga a marki foe meki wan waran, froetrow firi leki wan famiri de, foe studeri bijbel èn wan foe den boekoe foe a Genootschap. Den pikin studiegroepoe disi e gi boen okasi sosrefi foe oefen wi foe doe oenoe velddienst moro boen. Nanga a boekoestudie seti a gi foe persoonlijk deki-ati nanga a poti foe prakseri tapoe aparti sma kan doe moro esi. Fa wi kan wroko makandra dorodoro nanga a leider èn abi wini foe na moi seti disi?
2 Wan fajafaja prati ini a velddienst: Wan foe den moro prenspari frantiwortoe foe a boekoestudieleider na foe jepi ibri memre foe a groepoe foe abi wan serjoesoe prati na a diniwroko. Nanga na sani disi na prakseri oen Diniwroko-boekoe e memre wi tapoe bladzijde 45, 46 taki, a go di a e go doronomo, a faja nanga prisiri di a e sori gi den aktiviteit ini a veld sa de foe si baka na den preikiman.” Ten na ten a leider sa wroko ini a dienst nanga memre foe en eigi famiri, ma a sa feni en so srefi wan prisiri foe wroko makandra nanga trawan na difrenti kontren foe a diniwroko so leki fa en situwâsi e gi pasi foe dati. Joe kan horibaka doronomo gi velddienst konmakandra? Efoe joe doe so a boekoestudieleider nanga tra preikiman sa warderi disi srefisrefi.
3 Velddienst konmakandra e seti na presi di fiti so taki ala sma kan abi wan fajafaja prati na a preikiwroko. Ala di den e hori rekening nanga a situwâsi foe a presi srefi, ala groepoe sa wani bigin froekoe ini a velddienst. Foeroe preikiman nanga pionier abi boen bakapisi te na a kaba foe a wiki den e tan ini a dienst te pasa twarfoe joeroe a dei.
4 Joe ben sa wani kisi jepi na wan foe den kontren foe a diniwroko? Kande joe boekoestudieleider kan meki mofo nanga wan lepi preikiman foe a groepoe foe wroko nanga joe. Na a kaba foe a moen, de seiker taki joe gi joe velddienstraport biten. A boekoestudieleider èn so toe a sekretarsi sa warderi a wrokomakandra foe joe tapoe a prenspari kontren disi toe foe a wroko. — Teki gersi Lukas 16:10.
5 Te a Dienstopziener e fisiti a groepoe: Leki fa a gwenti de dan ibri moen a dienstopziener e fisiti wán boekoestudie groepoe foe gi deki-ati foe doe moro foeroe èn foe na aktiviteit ini a velddienst doe nanga moro boen bakapisi. Poti boen prakseri na a 15-miniti lezing di a e hori na a kaba pisi foe a boekoestudie, foe di a sa gi spesroetoe rai di sa jepi a groepoe foe go na fesi na difrenti kontren foe a preikiwroko. A dienstopziener wani foe wroko so srefi sote nanga difrenti memre foe a boekoestudie groepoe na a kaba foe a wiki. Sorgoe taki joe meki gebroiki foe a spesroetoe seti disi so taki joe kan njanboen foe den ondrofeni nanga den bekwaamheid foe en ini a velddienst.
6 Oenoe eigi eksempel foe wroko makandra nanga a wani di wi wani foe asisteri trawan di no abi so foeroe ondrofeni, sa jepi foe meki wan waran, matifasi firi de tapoe a gemeente boekoestudie, ala di „wi e doe boen gi alasma, ma spesroetoe na den wan di abi a srefi bribi leki wi.”—Gal. 6:10.