A Gemeente boekoestudie e jepi a leri di sma e leri
1 A Gemeente boekoestudie e plèi wan prenspari ròl ini a leri programa foe na organisâsi foe Jehovah. Den boekoestudie groepoe panja na ini a kontren, èn dati e meki en makriki foe alasma fisiti en. Te wan studie e hori ini den eigi birti, dan sma di abi belangstelling, kan teki moro esi wan kari foe fisiti a boekoestudie.
2 Wi e meki moeiti foe hori ibri groepoe pikin. Disi e gi a sma di e hori a boekoestudie, na okasi foe jepi ibriwan foe den persoonlijk. A no ala sma man foe leri esi-esi. Efoe wan sma abi moeiti foe froestan wan penti, srefi baka di a studeri a les na fesi, dan a sma di e hori a boekoestudie, kan takimakandra moro fara baka a studie. Boiti dati, nanga wan pikin groepoe, moro okasi de foe gi komentaar èn foe abi wan prati ini a leisi foe den bijbeltekst. Joe e jepi a takimakandra di wi abi, foe di joe e gi komentaar dorodoro? Joe e proeberi foe gi piki nanga joe eigi wortoe? A sreka di joe sreka foe teki prati, kan gi joe nanga trawan wini. Te joe e sreka joesrefi, gebroiki dan a koni foe joe, foe man si fa joe persoonlijk kan gebroiki wan toe penti ini a lès. — Heb. 5:14.
3 Foe di joe e loekoe a fasi fa a sma di e hori a boekoestudie e gi leri, meki joe kan leri fa foe hori wan bijbelstudie na wan fasi di e wiki moro belangstelling, èn di e meki sma kisi moro boen leri. Baka te wan brada di sabi leisi boen, leisi den paragraaf, dan den e taki makandra foe den aksi. A sma di e hori a studie, e gi alasma deki-ati foe taki nanga wan krakti sten. Efoe ten de, dan a e doe moeiti foe meki den sma gi komentaar tapoe den bijbeltekst di den taki foe den ini a materiaal, foe jepi wi froestan fa foe gebroiki den. (Teki gersi Nehemia 8:8.) Sontron, ensrefi kan gi wan sjatoe komentaar di e tjari sani kon na krin noso a kan gebroiki aksi di e jepi foe tjari wan prenspari penti kon na krin. Wan eksempre noso wan agersitori kan jepi wi foe si fa a bodoi abi foe doe nanga wi libi.
4 A fisiti di sma e fisiti son Gemeente boekoestudie, lagi srefisrefi. Joe e fisiti a boekoestudie doronomo? Efoe dati no de so, dan joe e misi wan prenspari sani di seti gi wi. A seti foe a boekoestudie na wan foe den fasi fa Jehovah e sori en sorgoe gi wi (1 Petr. 5:7). A wani dati wi e go na fesi na ini sabi nanga koni, so taki wi sa de tranga na jejefasi. Na a tra sei, Satan ben sa wani foe meki a gro di wi e gro na jejefasi, go na baka èn dati wi kon swaki, so taki Jehovah nanga En organisâsi no kan gebroiki wi moro. No meki a sani disi pasa nanga joe! Meki a waran, lobi sfeer ini a groepoe disi foe krosibei matifasi, naki joe ati èn boeweigi joe foe tan gi Jehovah prèise. — Teki gersi Psalm 111:1.
5 Konmakandra gi a velddienst pe den preikiman kan go makriki, seti na foeroe presi pe den boekoestudie e hori. Disi kan de na mindri wiki, na a kaba foe a wiki, noso na a kotoigi di wi e gi te neti. A sma di e hori a boekoestudie, e sorgoe taki nofo gebied de èn taki wan sma sa de foe teki fesi ini a velddienst. Konmakandra gi a velddienst no moesoe hori moro langa leki 10-15 miniti. A sma di e hori a konmakandra disi, kan loekoe a dagtekst sjatoe efoe a abi foe doe nanga wi preikiwroko èn a kan gi wán noso toe spesroetoe rai gi a velddienst noso a kan gi wan sjatoe demonstrâsi foe a poeblikâsi di wi e pristeri now ini a velddienst.
6 A sma di e hori a boekoestudie, e doe moeiti foe wroko persoonlijk nanga ibriwan ini en groepoe baka wan pisi ten, èn a e gi den deki-ati nanga leri di fiti. — Teki gersi Markus 3:14; Lukas 8:1.