Opziener di e teki fesi—Den gemeente boekoestudieleider
1 A de wan toemoesi aparti grani gi wan bekwaam owroeman noso wan dinari ini a diniwroko foe dini leki wan gemeente boekoestudieleider. A de wan serjoesoe frantiwortoe foe sorgoe gi den sani di den sma na ini en groepoe abi fanowdoe. Wi kan prati den sani di a moesoe doe na dri:
2 A moesoe man foe gi leri na wan bekwaam fasi: A gemeente boekoestudieleider moesoe sreka ensrefi heri boen foe jepi a groepoe ibri wiki foe kon froestan sani. A e proeberi foe meki a groepoe kisi moro warderi gi a materiaal di den e studeri. Na presi foe ensrefi e takitaki wan lo te a studie e hori, dan te a de fanowdoe a sa poti wan toe aksi di abi foe doe nanga a tori so taki den moro prenspari penti foe a lès kon na fesi. A de wan tjalensi gi en foe meki a studie de wan sani di sma lobi, èn di e leri den wan sani èn foe hari ala sma kon na ini a takimakandra. A abi na prakseri foe bow sma na jeje fasi, foe meki a praktis waarde foe a studie kon boen na krin èn foe meki a materiaal doro a froestan nanga na ati.—1 Tes. 2:13.
3 A e doe herderwroko di de wan jepi: A gemeente boekoestudieleider de „leki wan kibripresi gi a winti èn wan kibripresi gi a sibiboesi” (Jes. 32:2). A e broko en ede troetroe nanga ala sma na ini en groepoe èn a e sorgoe toe taki efoe wan sma na ini en groepoe lasi-ati, a sma disi e kisi jepi na jeje fasi.—Esek. 34:15, 16; 1 Tes. 2:7, 8.
4 A e doe a preikiwroko nanga faja: A gemeente boekoestudieleider e doe opregti moeiti foe seti sani na wan praktis fasi so taki ala sma na ini en groepoe kan abi wan prati na a diniwroko dorodoro. A e teki fesi na ini a preikiwroko foe di a sabi taki te a e preiki doronomo èn te a de nanga faja gi a diniwroko, dan den trawan ini a groepoe sa sori dati toe (Kol. 4:17; 2 Tes. 3:9). Baka wan pisi ten, a e proeberi foe wroko na ini a velddienst nanga ibri memre foe en groepoe. Efoe wi wani taki a fasi fa wi e preiki èn a fasi fa wi e gi leri na ini a diniwroko kon moro betre, dan a gemeente boekoestudieleider kan jepi wi foe doro a marki di wi poti gi wisrefi.—1 Tim. 4:16; 2 Tim. 4:5.
5 A de wan troetroe blesi gi wi taki wi abi den presenti disi na ini man di de klariklari foe gi wi jepi na jeje fasi èn foe horibaka gi wi na wan lobi-ati fasi (1 Tes. 5:14). Meki wi sori taki wi e warderi a moi seti disi foe Jehovah foe di wi abi wan prati dorodoro na a boekoestudie èn foe di wi e horibaka na wan getrow fasi gi a preikiwroko.—Hebr. 10:25.