A seti foe na gemeenteboekoestudie
Pisi 1: Na frantiwortoe foe na studieleider
1 Na gemeenteboekoestudie e prei wan toemoesi prenspari ròl ini a go na fesi na jejefasi foe a pipel foe Jehovah. Na ini den moen di e kon wi sa ondrosoekoe difrenti pisi foe a gemeenteboekoestudie seti èn loekoe fa wi kan feni wini foe dati. Na ini a nomroe disi wi sa wani poti na prakseri tapoe a fasi fa na boekoestudie leider kan meki a studie e gi deki-ati èn e tranga a bribi.
2 Foe kan abi boen bakapisi na ini a gi leri foe en, na studieleider moesoe sreka ensrefi boen. Leki wan serjoesoe studenti foe a Wortoe foe Gado a no moesoe sabi soso na piki tapoe ibri aksi ma a moesoe man froestan toe foe san-ede a piki dati de joisti. A moesoe proeberi foe jepi ala sma tapoe a studie foe sabi den reide foe den piki (1 Petr. 3:15). Disi sa meki den warderi gi na stòf kon moro dipi.
MARKI DI WI WANI DORO TE WI HORI A STUDIE
3 Wan foe den marki di a studieleider wani doro na foe gebroiki a stòf di wi moesoe studeri na so wan fasi taki a bribi foe ala den sma di de drape e meki kon tranga èn foe boeweigi den foe doe a wani foe Gado srefisrefi (Ps. 110:3; 2 Tes. 1:3-5). Foe doro disi, na studieleider moesoe hori pause na presi di fiti foe meki ‘sma kan si’ den penti ‘krin’ di e bow opregti froetrow ini Jehovah, en Wortoe nanga en organisâsi’. (Gal. 6:6, Stud., vtn.) Nanga jepi foe aksi di poti na wan koni fasi, den spesroetoe penti disi di e tranga a bribi, kan tjari kon a krin moro fara efoe a ten e gi pasi.
4 Ete wan marki na foe jepi ala sma foe si fa den kan gebroiki a materiaal ini den ala dei libi. Fa den kan gebroiki en ini a velddienst? Te den e gi deki-ati na brada nanga sisa èn sosrefi njoen sma? Te den e gi tranga na den osofamiri nanga densrefi? Te den Gemeenteboekoestudie leider e sreka ibriwan foe den les, dan den sa proeberi foe si fa spesroetoe penti ini a studie kan gebroiki ini na ala dei libi.
5 Bepaalde informatie kan gebroiki foe jepi famirimemre di no de na bribi, skoro kompe ofoe kompe wrokoman. Tra materiaal kan de wan jepi gi den wan di de ini osofamiri di prati ofoe di de kande ini wan osofamiri pe soso wàn papa ofoe wàn mama de nanga pikin. Na studieleider kan sorgoe taki den arkiman gi piki foe di a e jepi den foe denki foe na stòf di den ben taki foe en èn foe go loekoe fa den kan gebroiki dati ini a ala dei libi. Na studieleider moesoe proeberi foe hori na studie na wan span fasi meki a de moro leki wan aksi nanga piki takimakandra.—Teki gersi 1 Korente sma 14:9, 19.
SORI PERSOONLIJK BELANGSTELLING
6 Te a abi persoonlijk belangstelling gi ibri sma foe a groepoe, dan a studieleider kan gi a deki-ati foe ibri sma teki prati. Sma di e sjensjen kan kisi na fesi wan prati foe leisi wan tekst, ofoe den kan kisi na fesi wan aksi pe den kan sreka densrefi a tapoe foe gi wan piki. Ala sma moesoe doe moeiti foe gi komentaar nanga en eigi wortoe. Te a studieleider e arki den piki boen, a kan sabi efoe wantoe abi persoonlijk jepi fanowdoe. A kan aksi tra sma foe a groepoe di abi ondrofeni foe jepi ini a gi foe persoonlijk belangstelling dati.
7 A gemeenteboekoestudie de wan blesi gi wi. Disi e gi wi na okasi foe kon ini pikin groepoe na wan èn foe kisi moro persoonlijk prakseri. Noiti wi moesoe si na boekoestudie leki moro mendri prenspari leki den tra konmakandra. Joe gemeenteboekoestudieleider e teki en frantiwortoe leki wan serjoesoe sani foe gebroiki ibri studie foe tranga joe bribi ini Jehovah èn foe bow joe warderi gi jeje sani di Gado seti.