Jepi njoensma foe abi prati na ini na kownoekondregro
1 Ini a ten disi foe Kownoekondregro wi e prisiri foe den foeroe njoensma di e arki boen na a boen njoensoe. O moro den sabi nanga warderi e gro, den e go fisiti komakandra èn heri esi den wani go prati na san den leri leki kownoekondreprékiman nanga trawan. Gi den wan na mindri wi di abi ondrofeni kaba ini na velddienst, disi wani taki wan tjalansi èn wan ekstra frantwortoe. Njoensma abi dek’ati nanga opleiding fanowdoe foe tron boen prékiman.
2 Ini na dienstjari 1984 63 sma dopoe na ini Sranan. Ala den njoensma disi e kisi persoonlek jepi foe tron boen bedinari?
LEI DEN OP FOE NA VELDDIENST
3 Jepi njoensma foe kan doe a dienst heri boen, de wan afersi di e aksi ala wi prakseri. Bow go doro tapoe den bigin enthousiasme nanga faja èn jepi den foe kon wroko heri boen na ini na veld. Wi no wani sref’srefi taki na enthousiasme nanga faja foe den di den ben abi biginbigin kon kowroe, èn disi no sa psa te wi e gi den na opleiding di de fanowdoe.
4 Na opleiding foe na velddienst moesoe bigin froekoe kaba. Gi joe leerling na dek’ati foe prati den sabi di den kon foe leri paspas nanga famirman, birti, mati nanga kompe. Ferteri den taki kande wawan nomo foe den sma nanga soema den e taki sa arki boen na a boen njoensoe (Matt. 7:13, 14). Jepi den tokoe na a srefi ten foe den kon ferstan sortoe prisiri a e gi na soboen na pisi di ai kan si soleki na pisi di ai no kan si foe Gado organisaatsi, efoe awasi nomo wán sma arki. — Luk. 15:10.
JOE PERSOONLEK FRANTWORTOE
5 Na a momenti disi joe e lei wan bijbelstudie? A e kon ini aanmerking foe go na ini na velddienst nanga joe? Efoe a de so taki a de tron wan sma di kon de nanga wi èn di wi e feni en boen, gi en dan dek’ati foe teki geregeld, ibri wiki, prati na a dienst. Bifo joe go na ini na dienst, gi wantoe minuut na a sreka makandra nanga en. Efoe joe e wroko nanga den tijdschrift, taki pikinso baka foe den pristeri di joe e go gebroiki noso jepi en foe abi wan boen prati na a pristeri foe a moen dati. Biginbigin kande a sa wani foe lési soso wan foe den tekst noso na ini na takmakandra a sa wani foe taki wan pikin mofo. O moro joe e gi en dek’ati èn e lei en op, a sa kisi safrisafri moro fertrow ini ensrefi èn a sa leri foe wroko tapoe ensrefi oso-foe-oso.
6 Srefi na baka te wan njoensma tron wan geregelde prékiman, a abi joe jepi fanowdoe ete. Tan sori opregti belangstelling gi en jeje go na fesi. Na go na fesi disi wani taki na kweki foe na koni foe leri trawan, nanga ala di ensrefi e kisi leri ete. Gafa en foeroetron èn opregti foe den go na fesi di a meki. Meki a si taki joesrefi e feni foeroe prisiri na ini taki joe e jepi en foe go na fesi na jeje fasi. — 1 Tim. 4:15, 16.
JEPI TRAWAN TOE
7 Kande tra sma de ooktoe di, nanga aladi den de foeroetron moro langa nanga na gemeente, no ben kisi nofo persoonlek jepi foe den tron boen leriman. Ma ooktoe foeroe trawan de di de klarklari foe bigin nanga na velddienst. Wi e prakseri foe njoen prékiman èn na den sma di fadon go na ini inactiviteit èn kande den kan kisi jepi foe bigin baka nanga na dienst. Owroeman èn ala trawan na ini na gemeente, sa prakseri serjoesoe san den kan doe foe jepi den sortoe sma dati foe bigin nanga na dienst, kande na ini januari kaba, sodati januari sa de wan boen moen foe gro. — Jes. 60:22.