„Waka soifri na en baka”
1. Fa wi kan kon tron bun preikiman?
1 Yesus no ben kisi skoroleri na den skoro fu den rabi, ma toku a ben de a moro bun Preikiman na ini a historia. Koloku taki den tori fu Yesus en diniwroko skrifi, so taki wi na ini a ten disi kan kisi wini fu den. Efu wi wani de bun preikiman, dan wi musu „waka soifri na en baka”.—1 Petr. 2:21.
2. San o yepi wi fu kon abi a srefi sortu lobi di Yesus ben abi gi sma?
2 Sori lobi gi sma: Fu di Yesus ben e broko en ede trutru nanga sma, meki a ben wani yepi den (Mark. 6:30-34). Furu sma na ini a kontren fu wi „abi pen” èn den abi a waarheid tranga fanowdu (Rom. 8:22). Te wi e prakseri a muilek situwâsi fu den sma disi, èn te wi e hori na prakseri taki Yehovah e broko en ede nanga den, dan dati sa yepi wi fu tan du a preikiwroko go doro (2 Petr. 3:9). Boiti dati, te sma e si taki wi e broko wi ede trutru nanga den, dan dati sa meki taki den o wani arki wi boskopu.
3. Na sortu okasi Yesus ben preiki gi trawan?
3 Gebroiki ibri okasi fu taki nanga sma: Yesus gebroiki ibri okasi fu preiki a bun nyunsu gi tra sma (Mat. 4:23; 9:9; Yoh. 4:7-10). Wi wani de srekasreka tu fu taki fu a bribi fu wi, te wi e du den sani di wi gwenti fu du ala dei. Son preikiman abi wan Bijbel nanga tra publikâsi na den, so taki den kan gi kotoigi na wrokope, na skoro, te den de na pasi fu go na wan presi, te den e go na wenkri, èn te den e du tra sani.
4. Fa wi kan sorgu taki a Kownukondre na a moro prenspari sani di wi e preiki?
4 Poti prakseri na a Kownukondre: A bun nyunsu fu a Kownukondre ben de a moro prenspari sani di Yesus ben preiki (Luk. 4:43). Kande a de so dati, te wi e taki nanga sma, wi no e taki wantewante fu a Kownukondre. Ma wi musu hori na prakseri taki na ososma musu kon si o prenspari a Kownukondre de. Srefi te wi e taki fu den ogri sani di e pasa na grontapu èn di e sori taki wi e libi na ini den lasti dei, toku a moro prenspari sani di wi musu du na fu „preiki a bun nyunsu di abi fu du nanga bun sani”.—Rom. 10:15.
5. O prenspari Bijbel de te wi wani du wi diniwroko na wan bun fasi?
5 Frutrow tapu Gado Wortu: Yesus ben gebroiki Gado Wortu ala ten fu horibaka gi den sani di a ben e leri sma. Den sani di a ben e leri sma, no ben kon fu ensrefi (Yoh. 7:16, 18). A ben e studeri Gado Wortu finifini èn a ben du den sani di a ben e leri, so taki a ben man kakafutu gi den tesi fu Satan (Mat. 4:1-4). Efu wi wani gi trawan leri na wan bun fasi, dan wi musu leisi Bijbel ibri dei èn wi musu du den sani di wi leri (Rom. 2:21). Te wi e gi piki tapu den aksi fu sma na ini a preikiwroko, dan wi musu kari bijbeltekst di e horibaka gi den sani di wi e taki èn wi musu leisi langalanga na ini Bijbel te wi e kisi na okasi fu du dati. Wi wani meki na ososma si taki den sani di wi e taki no e kon fu wisrefi, ma taki den sani di wi e taki e kon fu Gado.
6. San Yesus ben du fu doro na ati fu den arkiman fu en?
6 Doro na ati fu sma te yu e gi leri: „Noiti ete wan sma taki leki a man disi” (Yoh. 7:46). Na disi den skowtu ben taki fu Yesus, di den edeman fu den priester nanga den Fariseiman aksi den fu san ede den no grabu Yesus. Na presi taki Yesus ben taki nomo fu tru tori, a ben gi sma leri na wan fasi di ben doro na ati fu den (Luk. 24:32). A ben gebroiki agersitori di a teki puru fu na aladei libi fu sma, so taki a ben kan yepi den fu frustan a boskopu fu en (Mat. 13:34). Yesus no ben fruteri den arkiman fu en tumusi furu sani (Yoh. 16:12). A fasi fa a ben e gi leri ben meki taki sma poti prakseri na Yehovah, na presi fu poti prakseri na en. Neleki Yesus, wi kan tron bun leriman tu soso te wi e ’tan poti prakseri na a fasi fa wi e gi leri’.—1 Tim. 4:16.
7. Fu san ede Yesus ben horidoro na ini a diniwroko?
7 Tan horidoro, awansi sma no wani arki wi èn awansi den e gens wi: Yesus ben du bigi wondru, toku furu sma no ben arki en (Luk. 10:13). Srefi memre fu Yesus en eigi famiri ben denki taki a ben „lasi en frustan” (Mark. 3:21). Ma awansi fa a no fa, Yesus ben horidoro. A ben tan abi wan bun denki fu sani, fu di a ben abi a tranga overtoigi taki a abi a waarheid di ben o meki sma kon fri (Yoh. 8:32). Nanga a yepi di Yehovah e gi, wi sosrefi abi a fasti bosroiti fu no lasi-ati.—2 Kor. 4:1.
8, 9. Te a abi fu du nanga a bun nyunsu, dan san wi musu du fu de leki Yesus?
8 Du ala san de fanowdu fu du a diniwroko bun: Yesus no ben e suku fu kisi furu gudu gi ensrefi, fu di a ben wani du a diniwroko (Mat. 8:20). A ben e tan preiki gi sma sondro fu kon weri, èn son leisi a ben du dati te latilati bakadina (Mark. 6:35, 36). Yesus ben sabi taki a no ben abi furu ten moro fu du a preikiwroko. Neleki Yesus, wi tu musu gi Yehovah wi ten, wi krakti, nanga den sani di wi abi, fu di „a ten di tan abra kon syatu”.—1 Kor. 7:29-31.
9 Den fosi yarihondro Kresten ben de bun preikiman, fu di den ben kisi leri fu Yesus (Tori. 4:13). Wi sosrefi kan du wi diniwroko na wan bun fasi te wi e teki na eksempre fu a moro bun Preikiman na ini a historia.—2 Tim. 4:5.