Leri trawan fu lobi Yehovah
1. San e meki taki son sma wani kon krosibei na Yehovah?
1 Yu e memre a fosi leisi di yu yere fu Yehovah? San ben meki taki yu wani kon krosibei na en? Furu reti-atisma o taigi yu taki den ben wani kon krosibei na wi Mekiman fu di den kon sabi den tumusi moi fasi fu en, spesrutu a sari-ati nanga a lobi fu en.—1 Yoh. 4:8.
2, 3. Fa wi kan gebroiki a Bijbel leri-buku fu yepi bijbelstudenti fu kon abi moro lobi gi Yehovah?
2 „Disi na wi Gado”: A Bijbel leri-buku e taki dati a de prenspari fu lobi Yehovah èn fu kon abi wan bun matifasi nanga en. Fa wi kan gebroiki a buku disi fu leri trawan fu kon lobi Gado moro? Te wi e taki fu wan nyun tori nanga a sma, dan wi kan poti aksi gi en di o meki taki a denki fu a tori. Wi kan poti aksi soleki: „San a tru tori disi e tyari kon na krin fu Yehovah?”noso „Na sortu fasi a tori disi e sori taki Yehovah na a moro bun Papa di wan sma kan abi?” Te wi e gi leri na a fasi disi, dan dati kan yepi a studenti fu bigin abi wan bun matifasi nanga Yehovah en heri libi langa.
3 Te wi e yepi bijbelstudenti fu frustan taki a de wan grani fu teki sabi fu a wan-enkri tru Gado di de na libi, dan neleki Yesaya den o taki: „Disi na wi Gado” (Yes. 25:9). Te wi e tyari kon na krin san skrifi na ini Gado Wortu, dan wi musu sori krin taki libisma o kisi blesi te Yehovah o gebroiki en Kownukondre pe Krestes Yesus e tiri leki Kownu, fu du san A abi na prakseri.—Yes. 9:6, 7.
4, 5. San a wani taki fu lobi Yehovah?
4 Sori lobi gi Yehovah: Wi sabi taki te wi lobi Yehovah nanga wi heri ati, sili, nanga frustan, dan dati no abi fu du nanga wan firi nomo. Wi musu kon abi a srefi denki leki Yehovah (Ps. 97:10). Wi e sori taki wi lobi Gado te wi e gi yesi na ala den komando fu en. Boiti dati, wi musu tan ’tyari wisrefi na wan santa fasi èn wi musu du sani di e sori taki wi e dini Gado na wan getrow fasi’, srefi te wi e kisi tesi nanga gens.—2 Petr. 3:11; 2 Yoh. 6.
5 A de wan prisiri sani fu du a wani fu Gado fu di wi lobi en (Ps. 40:8). A bijbelstudenti musu kon frustan taki ala den komando fu Gado de gi a bun fu den futuboi fu En (Deut. 10:12, 13). Te wan sma e libi soleki fa Yehovah wani, dan a e sori taki a abi bigi warderi gi ala den tumusi moi sani di A e du. Yepi a studenti fu kon frustan taki te a e handri soleki fa Yehovah wani, dan dati sa yepi en fu wai pasi gi furu problema.
6. Sortu blesi wan sma kan kisi te a lobi Yehovah?
6 Blesi gi den sma di lobi Gado: Yehovah abi trutru lobi gi den sma di abi sakafasi, èn di lobi en. A e tyari kon na krin gi den sma dati san na „den dipi sani fu Gado” (1 Kor. 2:9, 10). Te den sabi kaba san Yehovah abi na prakseri, dan den o sabi soifri san o pasa na ini a ten di e kon, èn den o de seiker taki a howpu di den abi o kon tru (Yer. 29:11). Den sma di lobi Yehovah e kisi a bun-ati fu en di de aparti trutru (Ex. 20:6). Den de koloku fu di a lobi di Yehovah abi gi den e meki taki den abi a howpu fu libi fu têgo.—Yoh. 3:16.
7. Fa yu e feni en fu leri trawan fu lobi Yehovah?
7 O moro wi e kon leri sabi wi Papa na hemel, o moro wi o fruteri trawan fu en (Mat. 13:52). A de wan tumusi bigi grani fu leri trawan, spesrutu den pikin fu wi, fu lobi Yehovah! (Deut. 6:5-7) Meki a de so taki wi nanga den bijbelstudenti fu wi, tan prèise Yehovah fayafaya te a e sori wi a ’bunfasi fu en di de pasa marki’.—Ps. 145:7.