Wi abi warti gudu fu prati nanga tra sma
1 Gado Wortu abi furu moi leri di wi e warderi trutru (Ps. 12:6; 119:11, 14). Wan leisi, Yesus ben gebroiki agersitori di ben e taki fu difrenti sani di abi fu du nanga a Kownukondre èn a ben aksi den disipel fu en: „Unu frustan san ala den sani disi wani taki?” Di den disipel ben taki dati den frustan san ala den sani wani taki, dan Yesus taigi den: „Fu dati ede, ibri leriman di e kon sabi sani fu a kownukondre fu hemel, de leki wan man, wan masra fu wan oso, di e puru owru sani nanga nyun sani na ini a maksin fu en.”—Mat. 13:1-52.
2 Den tru tori fu Bijbel di wi ben leri na a ten di wi bigin studeri, de leki owru sani na ini wan maksin. Te wi e tan studeri den dipi sani fu Gado Wortu, wi e feni tra tru tori fu Bijbel, di de leki nyun sani na ini a maksin (1 Kor. 2:7). Nanga yepi fu „a getrow èn koni srafu” wi e kon frustan nyun sani tu.—Mat. 24:45.
3 Wi abi furu warderi gi den owru nanga den nyun sani disi di wi e leri, fu di den de leki gudu. Fu dati ede wi e suku fu kisi moro leri nanga ondrofeni leki leriman fu Gado Wortu, èn wi wani prati den warti tru tori disi nanga tra sma tu.
4 Na eksempre di Yesus gi wi: Yesus ben abi warderi gi den gudu disi, èn fu dati ede a ben e du furu muiti fu prati den nanga tra sma. Srefi te a ben weri, a ben tan puru sani na ini en „maksin”.—Yoh. 4:6-14.
5 Fu di Yesus ben lobi den sma di no ben sabi Gado bun èn di no sabi san a abi na prakseri, meki a fruteri sma den tru tori di abi fu du nanga Gado èn di e gi libi (Ps. 72:13). A ben sari den sma di ben wani kon sabi moro fu Gado èn fu den sani di a abi na prakseri. Dati meki a „bigin leri den furu sani”.—Mark. 6:34.
6 Teki na eksempre fu Yesus: Te wi abi furu warderi gi den gudu di wi abi, dan neleki Yesus wi o angri fu sori sma den gudu disi na ini Bijbel (Odo 2:1-5). Aladi wi kan weri son leisi, toku wi o taki fu den tru tori fu Bijbel èn wi o du dati nanga wi heri ati (Mark. 6:34). Fu di wi abi furu warderi gi den gudu di wi abi, meki wi o du ala san wi man na ini a diniwroko, èn wi o tan pruberi fu du moro.