Prati goedoe èn meki goedoe kon moro foeroe
1 Foeroe sma e poti na kisi foe grontapoe goedoe — oso, gowtoe, solfroe, diriston nanga so moro fara — leki na moro prenspari sani a ini den libi. Gi kristensma den jeje goedoe di wi e feni na ini na bijbel abi moro waarde leki ala den sani disi. Nowan bedrag foe moni ben sa kan teki oiti gersi nanga na sabi foe Gado prakseri èn na ferwakti foe tego libi! Na ferstan di wi e ferstan na waarde foe den waarheid di wi no kan marki nanga no wan tra sani e kari ini wi wan lostoe foe prati den nanga trawan. — Teki gersi 1 Johannes 2:15-17.
2 Jehovah ben gi en pipel jeje njanjan psa marki ini boekoe nanga tra jepisani foe bijbelstudie. Na sabi foe Gado, na mene foe profétitori, na koni foe poti bijbel gronprakseri ini na ibridé libi èn na mene foe den sani di e psa na grontapoe lontoe de nomo wantoe foe den foeroe goedoe di tjari kon na krin. Foe troe ibri boekoe di tjari kon na doro ben kon de wan goedoemaksin foe jeje waarheid. Fa wi kan meki wi jeje goedoe kon moro foeroe èn prati den goedoe disi nanga trawan?
MEKI WI GOEDOE KON MORO FOEROE
3 Foe san-ede joe no sa meki gebroiki foe na okasi foe lési sonwan foe den moro owroe boekoe, soleki na boekoe „Gado tégo prakseri” èn na Santa jeje-boekoe? Wantoe jari psa kaba, di den boekoe disi ben tjari kon na doro èn kande njoen prékiman no kisi ete wan tjans foe lesi den. Den bodoi ini den boekoe disi ben meki na wanfasi na a heri grontapoe foe Jehovah Kotoigi kon moro tranga èn ben jepi foe wi gro na jejefasi (1 Kor. 1:10). Foe san-ede efoe joe no doe dati ete, joe no bai den sortoe moro owroe boekoe dati gi joe boekoeplanga?
PRATI GOEDOE NANGA TRAWAN
4 Na ini den moen mei nanga juni wi sa pristeri toe bigi boekoe nanga toe pikin boekoe foe wan totaalprijs foe Sf 5,00. Na brada baka na boekoetafra moesoe loekoe boen taki ai aksi crediet foe den bigi boekoe èn pikin boekoe di e pristeri soleki den mededeling e taki. Foe de krin wi wani taki ete wantron foe sortoe boekoe ai go, namkoe:
Bigi boekoe:
’Dan na kibritori foe Gado kon na wan kaba’
Na kon boen baka foe na Paradijs gi libisma — nanga jepi foe na Theocratie!
’Jepi gi libisma foe komoto foe grontapoe benawtoe de krosbé!’
Pikin boekoe:
Gado „tégo prakseri” e wini foe libisma égi boen
Troe vréde nanga zekerheid — Komoto foe sortoe Fonten?
A libi disi na ala san de?
Kommentaar tapoe na brifi foe Jakobus
Santa jeje — Na krakti na baka na njoen Seti di e kon!
Den wrokosani disi di komoto foe Gado ben sori den waarde kaba foe di den ben jepi foeroe sma foe reageer boen tapoe na boen njoensoe. Wi moesoe meki boen moeiti foe meki moro foe den boekoe disi kon na ini den anoe foe sma di belangstelling.
5 Efoe wan sma nanga soema wi e taki lasi wan famiri na ini dede, kande a ben sa kan kisi trowstoe nanga den prakseri ini na boekoe Na libi disi na ala san de? Kande wi e miti wan ososma di e broko en ede nanga den grontapoe situwasi foe a ten disi. Na a okasi dati, dan so wi e prakseri, a boekoe Troe vrede nanga zekerheid — Komoto foe sortoe fonten? ben sa kan de heri boen.
6 Foe kan doe en so boen leki a kan, dan gi ala okasi a de fanowdoe dati wi sreka wisrefi boen a fesi èn dati wi kan kenki koemakriki go tapoe wan trawan. Disi wani taki dati wi moesoe sabi wan spesroetoe boekoe boen nofo foe kan poeroe spesroetoe punt na ini kon na fesi. Wi sa, awasi o sortoe boekoe wi e gebroiki kisi Jehovah blesi efoe wi e pristeri a boen njoensoe opregti èn nanga fasti overtoigi.
7 Nanga aladi na grontapoe e poti moro prakseri tapoe na tjari kon na wan foe grontapoe goedoe, wi sa tan warderi na bijbel leki na troe fonten foe troe goedoe. Ini mei nanga juni wi sa prati den jeje goedoe di wi ben feni ini wi moro owroe boekoe nanga trawan èn nanga dati meki den jeje goedoe kon moro bigi.