Gebroiki den moro owroe boekoe na wan boen fasi
1 Libisma poti miljoenmiljoen owroe boekoe na ini bibliotheek na ibri oekoe foe grontapoe. Ma tokoe, sortoe têgo winimarki a libismafamiri kisi foe den boekoe disi? (Preik. 12:12) Poeblikâsi di e poti prakseri na tapoe a Kownoekondre foe Gado èn san a sa doe gi a libismafamiri, abi moro foeroe waarde. Moro foeroe gemeente abi difrenti foe den boekoe disi ete, di tjari kon na doro bifo 1985. Na ini januari wi sa pristeri a poebliki den moro owroe boekoe disi.
2 Den warti troetroe: Ala di son wan foe wi kan feni taki den boekoe disi kon owroe te wi teki den gersi den moro njoen poeblikâsi foe wi, tokoe wi moesoe hori na prakseri taki den abi waarheid foe bijbel na ini. A Kownoekondre boskopoe di den boekoe disi e tjari kon na krin warti ete na ini a ten disi, èn efoe sma e poti prakseri na en tapoe, a kan kibri a libi foe den (Joh. 17:3). Foe dati ede, wi moesoe doe moro moeiti foe gebroiki den moro owroe boekoe disi boen.
3 Na ondrofenitori foe wan oema di ben kisi wan lo owroe poeblikâsi foe a Waktitoren Genootschap foe en granmama, e sori krin o prenspari den boekoe disi de. Wan Kotoigi ben aksi na oema efoe a ben sabi omeni den poeblikâsi disi ben warti troetroe. Na oema ben piki: „Mi no sabi omeni den warti, ma fa mi kan kon sabi disi?” Na oema ben teki wan bijbelstudie, a ben kon na ini waarheid, èn baka dati a ben kon si a waarde foe den boekoe foe en granmama. Den moro owroe boekoe disi di a ben kisi ben sori foe de wan warti goedoe srefisrefi!
4 Prati den na sma: Boiti taki joe e pristeri den moro owroe boekoe oso foe oso, sorgoe taki joe e pristeri den te joe e go baka na sma di joe sabi foe den taki den lobi leisi den poeblikâsi foe wi, èn so srefi na den sma di abi wan abonnement foe A Waktitoren nanga Ontwaakt! èn na sma pe joe e tjari den tijdschrift go doronomo. Gi den wan di e studeri bijbel nanga joe, joe kan soekoe spesroetoe moro owroe boekoe di kan gi den moro sabi, san sa jepi den foe kon froestan waarheid moro boen. No frigiti foe teki iniwan foe den moro owroe boekoe di joe srefi no abi ete. Na so fasi, joe sa tjari warti theokrasia boekoe kon na wán, di joe kan gebroiki foe meki a studeri di joe e studeri nanga joesrefi, kon abi moro waarde.
5 Na presi taki wi e hori den moro owroe boekoe foe wi na ini wan kasi, meki wi gebroiki den boen foe gi den sma di wi e miti, deki-ati foe „frede a troe Gado èn hori den komando foe en”.—Preik. 12:13.