Aksi di opo kon

◼ Efu tu sma di o trow, wani gebroiki a Kownukondre zaal tapu a trowdei fu den, dan fu sortu sani den musu taki nanga den owruman?

Te tu sma e trow soleki fa Bijbel e taki, dan dati e meki Yehovah kisi grani. Disi de so spesrutu te a abi fu du nanga trow di e hori na a Kownukondre zaal. Den sma na ini a birti drape e si sortu sma wi de, te den e luku fa sani e waka na ini na organisâsi fu wi. Te tu sma wani gebroiki a Kownukondre zaal fu hori a trow fu den, dan a ben o fiti te den taki nanga den owruman fu spesrutu sani di abi fu du nanga a trow fu den. Na so fasi den kan meki „ala sani pasa na wan fasi di fiti èn soleki fa sani seti”.—1 Kor. 14:40.

Te sma wani gebroiki a Kownukondre zaal fu hori a trow fu den, dan den musu aksi dati na ini wan brifi di den o skrifi gi a diniwroko komte fu a gemeente di e hori konmakandra na ini a zaal dati. Den musu seni a brifi dati wan moi pisi ten na fesi, èn den musu skrifi tapu sortu dei èn na sortu yuru den wani gebroiki a zaal. Den musu hori na prakseri taki den owruman no sa kenki a dei noso yuru te konmakandra e hori, so taki a trow kan hori. Boiti dati, a trowmasra nanga a trowmisi musu abi wan bun nen, a fasi fa den e libi musu kruderi nanga Bijbel wet èn nanga den regtfardiki wet fu Yehovah.

A trow musu hori na wan wartifasi di o meki Gado kisi glori. Fu sorgu taki sani e waka na a fasi dati, dan den sma di o trow musu fruteri a diniwroko komte sortu sani den seti gi a trow fu den, fosi den o go du den sani dati. Den owruman no o pruberi fu meki den tu sma du sani na a fasi fa den owruman srefi wani. Ma efu den owruman no e agri nanga wan fu den sani di seti gi a trow, dan den sma di o trow musu kenki dati. Soso Kownukondre poku noso den poku fu wi singi buku mag plèi na ini a Kownukondre zaal. Den owruman musu gi primisi tu efu den sma wani poti wan tu moimoi sani na ini a Kownukondre zaal noso efu den wani seti den sturu tra fasi. Efu sma o meki fowtow noso felem, dan disi no musu meki a wartifasi fu na okasi disi lasi gowe. Karta fu gi sma wan kari gi a trow, no mag poti na tapu a bord pe den e meki sani bekènti. Ma den owruman mag meki wan syatu sani bekènti na a Diniwroko Konmakandra, pe den e taigi a gemeente taki wan trow o hori na ini a Kownukondre zaal.

Wan owruman musu hori a trowlezing, efu dati kan. Owruman na leriman di sabi fa fu gebroiki Gado Wortu. Fu dati ede, a moro bun taki wan owruman e taki fu den rai di Bijbel e gi te a abi fu du nanga a prenspari okasi disi.—1 Tim. 3:2.

Fu di na owruman kan kisi porinen tu te sani no e waka bun na a trow, meki den sma di o trow musu taigi en sortu sani seti gi a trow fu den. Na owruman disi sa abi wan takimakandra nanga den sma di o trow, fu kon sabi efu den ben tyari densrefi na wan fasi di fiti di den ben e hori nanga makandra. A no de fu taki dati den sma di o trow, o taki krin nanga na owruman fu den sani dati. Efu a trowmasra noso a trowmisi ben trow kaba wan leisi, dan te a o go trow now, a musu buweisi taki a no e handri teige Bijbel wet èn teige lanti wet (Mat. 19:9). Disi wani taki dati a o sori na owruman wan kopi fu a papira di e sori taki a fosi trow fu en broko.

Te den sma di o trow e taki krin nanga den owruman èn te den e wroko makandra nanga den owruman, dan a trow fu den sa de wan prisiri okasi gi ala sma.—Odo 15:22; Hebr. 13:17.