O ten Gado Kownukondre o bigin tiri grontapu?

SAN NA DEN SANI DI BEN O PASA SOLEKI FA YESUS BEN TAKI?

Yesus ben taki: „A wan pipel o go feti nanga a tra pipel, èn a wan kownukondre o go feti nanga a tra kownukondre. Bigi gronseki o de, èn takru siki di e kiri ipi-ipi sma nanga angriten o de na ini a wan presi baka a trawan” (Lukas 21:10, 11). Ala den sani disi di ben o pasa wantronso ben o sori krin taki „a Kownukondre fu Gado de krosibei”. A de so taki den sani disi pasa wantronso èn na heri grontapu? Luku den buweisi.

1. FETI

Na ini 1914, wan bun bigi feti broko na heri grontapu. Noiti ete wan feti ben de di tyari so furu pina nanga problema kon. Furu tron historiaman e taki dati bigi kenki kon na ini a yari 1914, fu di a Fosi Grontapufeti bigin na ini a yari dati. A feti dati ben de a fosi feti pe legre gebroiki bun furu tank, opolani di ben e trowe bom, nanga gas di kan kiri sma. Baka ten, a Di Fu Tu Grontapufeti bigin pe sma gebroiki atoom bom. Sensi a yari 1914, moro nanga moro feti e pasa na grontapu èn milyunmilyun sma lasi den libi na ini den feti dati.

2. GRONSEKI

Ala yari sowan 100 gronseki e pasa di hebi nofo fu tyari „bigi pori kon” (Britannica Academic). „Soleki fa raportu e sori langa ten kaba (sensi a ten fu 1900), dan ala yari wi kan fruwakti sowan 16 bigi gronseki” (United States Geological Survey). Kande son sma feni taki na fu di sabiman man si moro makriki efu wan gronseki o kon, meki a gersi leki moro gronseki e pasa. Ma toku den bigi gronseki di e pasa na heri grontapu e meki taki noiti ete so furu sma pina èn dede leki now.

3. ANGRITEN

Te feti e pasa na ini wan kondre, te sma e du wan lo kruka sani, te na ekonomia no e drai bun, noso te den gron no e gi nofo nyanyan, dan nofo tron den sani disi e tyari angriten kon. Wan organisâsi fu den Verenigde Naties di ben meki wan raportu fu 2018, ben taki: „Na heri grontapu 821 milyun sma de nanga angribere èn 124 milyun fu den de fu dede” (The World Food Programme). Fu di sma no e nyan gosontu nyanyan, meki sowan 3,1 milyun pikin e dede ala yari. Na ini a yari 2011, dati ben de sowan 45 procent fu ala den pikin di e dede na heri grontapu.

4. SIKI DI E KIRI FURU SMA

Na organisâsi fu gosontu afersi na heri grontapu, e taki: „Na ini den 20 yari di pasa, siki di kiri bun furu sma panya na grontapu. Owru siki soleki cholera, pest-siki nanga gele koorts kon baka èn nyun siki soleki SARS, hebi griep di e panya na ala sei, MERS, Ebola nanga Zika opo kon” (World Health Organization). A COVID-19 siki di ben panya na heri grontapu, na wan fu den moro nyun siki di opo kon. Aladi sabiman nanga datra feni nyun fasi fu dresi siki, toku den no ben man feni dresi gi ala den siki disi.

5. SMA BEN O PREIKI NA HERI GRONTAPU

Yesus ben taki fu ete wan sani di ben o pasa. A ben taki: „A bun nyunsu disi fu a Kownukondre o preiki gi sma na heri grontapu, so taki sma fu ala kondre kan yere dati, èn dan a kaba o kon” (Mateyus 24:14). Aladi bigi problema de na grontapu na ini a ten disi, toku moro leki aiti milyun sma fu ala kondre e preiki a bun nyunsu fu Gado Kownukondre na ini 240 kondre. Den e du dati na ini moro leki 1000 tongo. Noiti ete a sani disi ben pasa.

SAN DEN SANI DISI WANI TAKI GI WI?

A de krin taki ala den sani di Yesus ben taki e pasa na ini a ten disi. Fu san ede wi musu si a sani disi leki wan prenspari sani? Fu di Yesus ben taki: „Te unu e si den sani disi e pasa, dan un musu sabi taki a Kownukondre fu Gado de krosibei.”​—Lukas 21:31.

Te wi e luku o ten den sani di Yesus ben taki bigin pasa èn fa sani ben o waka soleki fa Bijbel e sori, dan wi e frustan taki Gado seti a Kownukondre fu en na hemel na ini 1914.a Na ini a yari dati Gado poti en Manpikin, Yesus Krestes, leki Kownu (Psalm 2:2, 4, 6-9). Heri esi, Gado Kownukondre o bigin tiri grontapu èn a o puru ala tra regering. A o kenki grontapu kon tron wan paradijs pe libisma o man tan fu têgo.

Heri esi, den wortu disi fu a begi di Yesus ben leri sma o kon tru: „Meki yu Kownukondre kon. Meki yu wani pasa na grontapu soleki fa a e pasa na hemel” (Mateyus 6:10). Ma san a Kownukondre du sensi di a bigin tiri na ini 1914? Èn san wi kan fruwakti te a Kownukondre o tiri ala libisma?