Paradijs De Krosibei!

Den ogri sani di e pasa now na grontapu e sori taki Paradijs de krosibei. Bijbel ben taki dati wi ben o si wan ogri ten leti bifo a Paradijs ben o kon. Now wi e libi na ini a ten dati! Dya na wan tu sani di Bijbel ben taki dati den ben o pasa:

Bigi feti. „Nâsi sa opo go feti nanga nâsi èn kownukondre nanga kownukondre” (Mateus 24:7). A profeititori disi kon tru. Sensi a yari 1914, yu ben abi tu grontapu feti èn furu pikinpikin feti. Milyunmilyun sma dede na ini den feti disi.

Siki na ala sei. „Na a wan presi baka a trawan pestsiki” ben o de (Lukas 21:11). Disi kon tru? Iya. Kanker, ati-siki, tuberculose, malaria, AIDS, nanga tra siki kiri milyunmilyun sma.

Sma no abi nofo fu nyan. Na heri grontapu yu abi sma di no abi nofo fu nyan. Milyunmilyun sma e dede fu angri ibri yari. Disi na ete wan marki di e sori taki Paradijs o kon dyonsro. Bijbel e taki: „Nyanyan sa mankeri.”​—Markus 13:8.

Gronseki. „Na a wan presi baka a trawan . . . bigi gronseki sa de” (Mateus 24:7). Disi kon tru so srefi na ini a ten fu wi. Moro leki wan milyun sma dede na ini gronseki sensi 1914.

Ogri sma. Sma ben o „lobi moni” èn den ben o „lobi densrefi nomo”. Den ben o de sma di „lobi prisiri moro leki den lobi Gado”. Pikin ben o „trangayesi papa nanga mama” (2 Timoteus 3:1-5). Yu no e agri taki yu abi furu fu den sma disi na ini a ten disi? Den no e lespeki Gado, èn den e tyari problema kon gi den sma di e pruberi fu leri fu Gado.

Ogridu. „Kruktudu [ben o] kon moro nanga moro” tu (Mateus 24:12). Kande yu sa agri taki den ogri di sma e du e kon moro ogri leki fa a ben de fosi. Na ala sei sma de di kan fufuru, bedrigi, noso du trawan ogri.

Ala den sani disi e sori taki Gado Kownukondre de krosibei. Bijbel e taki: „Te unu e si den sani disi e feni presi, sabi dan taki a kownukondre fu Gado de krosibei” (Lukas 21:31). San na a Kownukondre fu Gado? Dati na Gado tiri na hemel di sa tyari Paradijs kon na a grontapu disi. Gado Kownukondre sa kon ini a presi fu libisma tiri.​—Danièl 2:44.