Wan moro betre libi — Heri esi!

KON meki wi taki dati wan sma di abi a wroko foe taki fa a weer sa de, pikinmoro ala ten abi leti te a e taki fa a weer sa de. Efoe a e taki na fesi, wan neti na tapoe njoensoe, taki alen sa kon tamara, dan joe no sa tweifri foe teki joe prasoro nanga joe te joe e gowe foe oso a tra mamanten. A boen nen di a kisi foe di a ben doe en wroko boen, wini a froetrow foe joe. Joe e handri na tapoe san a e taki.

We, o foeroe wi kan froetrow a pramisi foe Jehovah gi wan moro betre libi na ini wan paradijs grontapoe? We, san den sani di a ben doe bifo e sori? A kontroe foe den bijbel profeititori e sori krinkrin a boen nen di Jehovah abi. En na wan Gado di e taki sani soifri sondro foe misi èn en na wan Gado foe waarheid (Josua 23:14; Jesaja 55:11). Den pramisi foe Jehovah Gado de foe froetrow na so wan fasi taki son tron a e taki foe sani di a pramisi èn di moesoe pasa ete, leki sani di ben pasa kaba. Foe eksempre, baka a pramisi foe en foe wan njoen grontapoe pe dede nanga low no sa de moro, wi e leisi: „Den [den blesi di a pramisi] pasa kaba!” Nanga tra wortoe: „Den feni presi troetroe!” — Openbaring 21:5, 6, foetoewortoe.

Ija, a kontroe foe den pramisi foe Jehovah na ini a ten di pasa, e meki taki wi e poti froetrow tapoe a kontroe foe a pramisi foe en gi wan moro betre libi gi a libisma famiri. Ma oten a moro betre libi disi sa kon?

Wan moro betre libi — Oten?

Wan moro betre libi sa kon heri esi! Wi kan de seiker foe dati, bikasi bijbel e taki dati foeroe takroe sani ben sa feni presi na grontapoe, leti bifo a paradijs sa tjari wan moro betre libi kon. Den takroe sani dati e feni presi now.

Foe eksempre, Jesus Krestes ben taki na fesi taki bigi feti ben sa de. A ben taki: „Nâsi sa opo go feti nanga nâsi èn kownoekondre nanga kownoekondre” (Mateus 24:7). A profeititori disi kon troe. Na ini den jari foe 1914 te go miti 1945, toe grontapoefeti ben de, èn baka dati, foeroe tra feti ben de toe pe nâsi feti nanga makandra. „Gemiddeld ibri jari, a nomroe foe sma di dede na ini feti na ini a pisi ten disi [foe sensi a di foe Toe Grontapoefeti], de moro leki toe tron den sma di ben dede na ini a di foe tina neigi jarihondro èn seibi tron moro foeroe leki na ini a di foe tina aiti jarihondro.” — World Military and Social Expenditures 1993.

A panja di siki panja na ala sei, na wan tra boeweisi foe sori o krosibei wan moro betre libi na ini a paradijs de. Jesus ben taki na fesi taki ’na a wan presi baka a trawan pestsiki’ ben sa de (Lukas 21:11). A profeititori disi kon troe? Ija, baka a Fosi Grontapoefeti, a Spanjoro Griep ben kiri moro leki 20 miljoen sma. Foe sensi a ten dati, kanker, atisiki, malaria, SIDA, nanga tra siki, kiri miljoenmiljoen sma. Na ini pôti kondre, den siki di e kon foe di sma e gebroiki watra di doti (so srefi loesbere nanga worong di sma abi na ini bere di e gi infektie) e teki miljoenmiljoen libi ibri jari.

Jesus ben taki toe: „Mankeri foe njanjan sa de” (Mateus 24:7). Soleki fa wi ben si na ini na artikel na fesi, den pôti sma na grontapoe no abi nofo foe njan. Disi na wan tra pisi foe a boeweisi taki wan moro betre libi na ini a paradijs sa kon heri esi.

„Bigi gronseki sa de”, Jesus ben taki (Lukas 21:11). Disi kon troe toe na ini wi ten. Foe sensi 1914 a pori di ben kon foe den kefalek takroe gronseki, teki a libi foe foeroe hondrodoesoen sma.

Bijbel e taki moro fara taki a kenki di sma ben sa kenki ben sa de wan marki foe „den lasti dei”. Den ben sa de „sma di lobi densrefi nomo” èn „sma di lobi moni”, èn pikin-nengre ben sa „trangajesi papa nanga mama”. Na ala sei, sma ben sa „lobi prisiri moro leki den lobi Gado” (2 Timoteus 3:1-5). Joe no e agri taki foeroe sma e fiti a fasi disi?

Kroektoedoe e kon moro foeroe foe di moro nanga moro sma e doe takroe sani. Disi na wan sani di ben taki na fesi toe. Akroederi Mateus 24:12, Jesus ben taki dati „kroektoedoe sa kon moro foeroe”. Kande joe sa agri taki ogridoe kon moro takroe, moro leki fa a ben de foeroe jari pasa. Na ala sei sma e frede taki tra sma sa foefoeroe den, bedrigi den noso doe den ogri na wan noso tra fasi.

Orlokoe, siki di panja na ala sei, mankeri foe njanjan, gronseki, ogridoe di e kon moro nanga moro, èn wan takroe kenki na ini a fasi fa libisma de nanga makandra — ala den sani disi de krin foe si na ini a ten disi soleki fa bijbel ben taki na fesi. ’Ma den sani disi no feni presi na ini a heri libisma historia kaba?’ joe e aksi joesrefi kande. ’San na a difrenti na ini a ten foe wi?’

Wan toe sani de di de prenspari srefisrefi na ini den sani di e feni presi na ini a ten disi. Bijbel no e taki dati ibri wan foe den sani disi, soleki mankeri foe njanjan, ben sa de a boeweisi taki wi de na ini a ten foe a kaba èn taki wan moro betre libi de krosibei. Den bijbel profeititori foe a ten foe a kaba, ben moesoe kon troe na ini wan ogri geslakti. — Mateus 24:34-39; Lukas 17:26, 27.

Moro fara, a no de wan gewoon sani srefisrefi taki wan toe foe den sani foe Jesus en profeititori — spesroetoe den wan foe a mankeri foe njanjan nanga a panja di siki ben sa panja na ala sei — e kon troe na ini a ten disi. Foe san ede? Bika noiti bifo den sani di sma doro na sabidensisei kon so fara. Noiti bifo, a sabi di sma abi fa foe dresi sma èn den difrenti fasi foe doe dati, meki so foeroe go na fesi noso de na ala sei. Gado wawan ben kan taki na fesi na ini en Wortoe, bijbel, taki na ini so wan ten, siki nanga angri ben sa kon moro takroe, no moro betre.

Foe di ala den bijbel profeititori di e taki foe a ten foe a kaba, noso „den lasti dei”, e kon troe, san wi kan konkloederi dan? Taki wan moro betre libi de krosibei! Ma fa a sa kon?

Wan moro betre libi — fa?

Joe denki taki libisma kan tjari a paradijs kon? Na ini a heri historia te na ini a ten disi, foeroe difrenti sortoe libisma tiri ben de. Son wan foe den proeberi serjoesoe foe sorgoe gi den fanowdoe foe den sma. Ma tokoe foeroe problema e kon moro takroe. Na ini goedoe kondre èn so srefi toe na ini pôti kondre, den tirimakti e feti nanga a fowtoe gebroiki foe drug, a de di tanpresi no de nofo, a pôti di sma pôti, ogridoe, wroko di no de nofo, nanga a feti di sma e feti.

Srefi te den tirimakti ben kan loesoe wan toe foe den problema disi, noiti den ben sa kan meki sma kon fri dorodoro foe siki; èn noiti den ben kan tjari wan kaba kon na a owroe di sma e kon owroe nanga a dede di sma e dede. A de krin taki libisma noiti sa tjari a paradijs kon na a grontapoe disi.

Bijbel e taki nanga koni: „No poti oen froetrow tapoe heisma, noso tapoe a manpikin foe libisma na grontapoe, di froeloesoe no de na en.” Tapoe soema wi moesoe poti wi froetrow dan? Bijbel e piki: „Kolokoe foe a sma di abi a Gado foe Jakob leki jepi, èn di e howpoe tapoe Jehovah en Gado” (Psalm 146:3, 5). Efoe wi e howpoe tapoe Jehovah Gado, dan noiti wi sa lasi-ati.

Foe troe, a Sma di abi a koni nanga krakti foe meki grontapoe, son, nanga den stari, kan meki grontapoe tron wan paradijs toe. A kan meki libisma njan boen foe wan moro betre libi. Awinsi san Jehovah Gado e bigin foe doe, a kan èn a sa doe en. En Wortoe en taki: „Gi Gado no wan sani di a froeklari, sa de sani di a no man doe” (Lukas 1:37). Ma fa Gado sa tjari wan moro betre libi kon?

Jehovah sa tjari wan moro betre libi kon gi a libisma famiri nanga jepi foe en Kownoekondre. Èn san na Gado Kownoekondre? A de wan troetroe tirimakti nanga wan tiriman di Gado poti, Jesus Krestes. A Kownoekondre foe Gado de na ini hemel, ma heri esi a sa tjari toemoesi moi blesi nanga wan moro betre libi kon gi den sma di sa libi na ini a paradijs grontapoe. — Jesaja 9:6, 7.

Kande joe sabi a modelbegi foe Jesus kaba, di wi e feni na ini bijbel na Mateus 6:9-13. Wan pisi foe a begi na Gado e taki: „Meki joe kownoekondre kon. Meki joe wani feni presi na grontapoe soleki na hemel.” Akroederi a begi dati, Gado Kownoekondre sa „kon” foe doe a prakseri foe Jehovah Gado gi grontapoe. Èn a de a prakseri foe en taki grontapoe moesoe tron wan paradijs.

Wan lasti aksi e opo: San joe moesoe doe foe njan boen foe wan moro betre libi na ini a paradijs di e kon?

San joe moesoe doe

Nanga lobi Jehovah Gado e gi a froewakti foe wan moro betre libi na ini a paradijs gi ala sma di e doe en wani. Bijbel e taigi wi: „Na den regtfardikiwan sa abi grontapoe, èn den sa libi na tapoe foe têgo” (Psalm 37:29). Ma san e meki taki wan sma de regtfardiki na ini Gado ai?

Foe kan plisi Jehovah wi moesoe leri moro foe san a wani wi moesoe doe. Efoe wi e teki sabi foe Gado èn e fiti dati na ini wi libi, dan wi kan libi foe têgo. Na ini wan begi na Gado, Jesus ben taki: „Disi wani taki têgo libi, foe den teki sabi doronomo na ini den foe joe, a wan-enkri troe Gado, èn foe en di joe ben seni kon, Jesus Krestes.” — Johanes 17:3.

A boekoe di e froeteri wi foe Jehovah Gado nanga Jesus Krestes, na Gado Wortoe, bijbel. A de wan foe den moro warti presenti di Jehovah gi. Bijbel de leki wan brifi foe wan lobi tata gi den pikin foe en. A e taigi wi foe a pramisi foe Gado foe tjari wan moro betre libi kon gi a libisma famiri èn a e sori fa wi kan kisi dati. Bijbel e meki wi sabi san Gado doe kaba na ini a ten di pasa èn san a sa doe na ini a ten di e kon. A e gi wi praktis rai toe fa foe handri den problema foe wi nanga boen bakapisi na ini a ten disi. Foe troe, Gado Wortoe e leri wi fa foe feni pikinso kolokoe, srefi na ini a grontapoe disi di lai nanga problema. — 2 Timoteus 3:16, 17.

Nanga prisiri den Kotoigi foe Jehovah sa wani foe sreka wan fri oso bijbelstudie gi joe. Leri fa joe kan abi wan moro kolokoe libi now, nanga a froewakti gi wan moro betre libi na ini a ten di e kon, di de krosibei.

[Prenki na tapoe bladzijde 5]

Bijbel profeititori e sori taki wan moro betre libi de krosibei

[Prenki na tapoe bladzijde 7]

Gado Kownoekondre sa meki wan moro betre libi kon gi a libisma famiri