„Meki Gado tan lobi yu”
1. Fu san ede a buku „Meki Gado tan lobi yu” tyari kon na doro?
1 Wi breiti trutru fu studeri a nyun buku „Meki Gado tan lobi yu” na a Gemeente Bijbelstudie. A brifi di a Tiri Skin skrifi gi ala sma di lobi Yehovah, e tapu nanga den wortu disi: „Wi e howpu trutru taki a buku disi sa yepi yu fu tan hori yusrefi na den tru leri fu Bijbel. Na so ’Gado sa tan lobi yu, so taki yu kan kisi têgo libi’.—Yud. 21.”
2. Nanga sortu sani na ini wi libi, a buku disi o yepi wi?
2 San wi kan fruwakti: Fa wi kan fiti Bijbel gronprakseri te a abi fu du nanga den mati di wi o teki, a fasi fa wi o meki prisiri, a lespeki di wi musu abi gi den wan di abi wan spesrutu frantwortu, den sani di wi gwenti du, a trowlibi, den sani di wi e taki, nanga den gwenti di sma abi? Den hei markitiki di de na ini Gado Wortu o abi krakti tapu a konsensi fu wi, so taki wi kan du san reti (Ps. 19:7, 8). Te wi e kon frustan moro bun fa Yehovah e denki, dan wi o angri moro fu plisi en. Disi o meki taki wi o gi yesi na en na ini ala sani di wi e du.—Odo 27:11; 1 Yoh. 5:3.
3. Fu san ede wi musu du muiti fu gi piki ibri wiki na a Gemeente Bijbelstudie?
3 Abi a fasti bosroiti fu teki prati: Te yu e sreka yusrefi, dan poti en leki marki fu prèise Gado na mindri a pipel fu en di kon makandra (Hebr. 13:15). A heri gemeente o studeri a nyun buku disi makandra. Fu di den pisi di wi o studeri ibri wiki no furu, meki wi o man sreka wisrefi heri bun. Na so fasi wi o kisi deki-ati fu taki fu den sani di wi leri. Den moi syatu piki fu wi o gi trawan deki-ati fu abi lobi èn fu du bun wroko. Boiti dati, den o meki taki wi abi wan moi takimakandra, pe wi alamala o leri furu bun sani (Hebr. 10:24). Wi o kisi furu prisiri tu, te wi e taki fu a bribi fu wi.
4. Fu san ede a de prenspari fu hori wisrefi na den komando fu Yehovah?
4 A lasti neti di Yesus ben de na grontapu leki wan libisma, dan a tyari kon na krin taki a de prenspari fu hori wisrefi na den komando fu Yehovah, efu wi wani taki Gado tan lobi wi (Yoh. 15:10). Nanga yepi fu a Gado lobi-buku, wi o abi wan moro fasti bosroiti fu fiti Bijbel gronprakseri na ini wi aladei libi, so taki ’Gado sa tan lobi wi’.—Yud. 21.