Wi o tan abi wan bun matifasi nanga Yehovah te wi e preiki
1. Sortu wini wi e kisi te wi e du a preikiwroko?
1 Te wi e teki prati fayafaya na a preikiwroko, dan dati kan meki wi kisi wan moro bun matifasi nanga Yehovah èn wi kan de moro koloku. A no de fu taki dati a moro prenspari reide fu san ede wi e du a preikiwroko, na fu di wi wani plisi Yehovah. Ma te wi e gi yesi na a komando fu „preiki a wortu”, dan Yehovah e blesi wi èn wi e kisi wini na tra fasi tu (2 Tim. 4:2; Yes. 48:17, 18). Ma fa a preikiwroko e gi wi deki-ati èn fa a e meki wi de koloku?
2. Na sortu fasi a preikiwroko e gi wi deki-ati?
2 Wi e kisi deki-ati nanga blesi: Te wi e preiki, dan wi no o poti so furu prakseri na den problema di wi abi na ini a ten disi. Na presi fu dati, a preikiwroko e yepi wi fu poti prakseri na den blesi di a Kownukondre o tyari kon (2 Kor. 4:18). Wi e kon kisi wan moro tranga bribi na ini den pramisi fu Yehovah èn wi e kon kisi moro warderi gi a tru anbegi, te wi e fruteri sma den sani di Bijbel e leri (Yes. 65:13, 14). Te wi e yepi trawan fu kon kisi wan moro bun matifasi nanga Yehovah so taki den „no de wan pisi fu grontapu”, dan disi o yepi wi fu tan abi a fasti bosroiti fu no de wan pisi fu grontapu tu.—Yoh. 17:14, 16; Rom. 12:2.
3. Fa a preikiwroko e yepi wi fu kon kisi moro bun fasi leki Kresten?
3 Wi e kon kisi moro bun fasi leki Kresten, te wi e teki prati na a preikiwroko. Fu eksempre, wi o du muiti fu „tron ala sani gi ala sortu sma”, èn disi o yepi wi fu kon kisi moro sakafasi (1 Kor. 9:19-23). Te wi e taki nanga den sma di ’e pina èn di e waka bruyabruya leki skapu di no abi skapuman’, dan wi e leri fu abi sari-ati gi sma èn fu firi gi den (Mat. 9:36). Wi e leri fu horidoro te wi e tan preiki aladi sma no wani arki, noso aladi den e gens wi. Wi e kon kisi moro prisiri te wi e du ala san wi man fu yepi trawan.—Tori. 20:35.
4. Fa yu e feni en fu du a preikiwroko?
4 A de wan trutru blesi fu du a preikiwroko di e meki taki a Sma di frudini taki wi anbegi en, kisi prèise! A preikiwroko e gi wi deki-ati. Den sma di e teki prati fayafaya na a wroko „fu gi kotoigi dorodoro fu a bun nyunsu”, e kisi bogobogo blesi.—Tori. 20:24.