Gi sma leri na wan makriki fasi
1. San na wan prenspari sani di de fanowdu fu man gi sma bun leri?
1 Te yu wani de wan bun leriman, dan a prenspari fu gi leri na wan makriki fasi. Te wi e luku a fasi fa a Bigi Leriman, Yesus, ben gi leri, dan disi sa yepi wi fu kisi moro „koni fu gi sma leri”.—2 Tim. 4:2; Yoh. 13:13.
2. San de fanowdu fu man gi leri na wan makriki fasi, èn sortu bakapisi disi abi?
2 Taki na wan makriki fasi: A Bergitaki abi wan tu fu den moro dipi tru tori na ini di wan sma ben taki. Ala den tori disi Yesus ben taki na wan makriki fasi (Mat. kap. 5-7). Den sma di ben e arki Yesus, ben „fruwondru fu a fasi fa a ben gi leri”. Den skowtu di sma ben seni fu grabu Yesus, ben taki: „Noiti ete wan sma taki leki a man disi” (Mat. 7:28, 29; Yoh. 7:46). Te wi e gi leri, a no de fanowdu fu gebroiki kefalek hebi wortu, fu taki furu muilek sani, noso fu kari finifini sani fu wan agersitori fu overtoigi trawan fu a waarheid. Wi kan fruklari a waarheid krin, aladi wi e gebroiki wortu di sma sabi.
3. Fu san ede son sma wani fruteri tumusi furu sani te den e gi leri, èn fa wi kan sorgu taki wi no e du disi?
3 Luku omeni sani yu o leri a sma: Te Yesus ben e gi leri, dan a ben hori den arkiman fu en na prakseri. A ben sabi omeni sani a ben musu fruteri den na ini wán leisi (Yoh. 16:12). Wi musu man si omeni sani wi kan fruteri sma èn wi musu fiti wisrefi na den sma di e arki wi. Wi musu du disi spesrutu te wi e gi kotoigi na famiriman, nyun sma di wani sabi moro fu Bijbel, noso pikin-nengre. Wi musu luku bun taki wi no e fruteri den tumusi furu sani wantronso, srefi efu a gersi leki den e arki bun. Den sma di abi wan krin ati o tan leri sabi a tru Gado, Yehovah.—Yoh. 17:3; 1 Kor. 3:6.
4. Fu san ede a moro bun fu poti prakseri na den moro prenspari sani, na presi fu tra finifini tori?
4 Poti prakseri na den moro prenspari sani: Yesus no ben fruteri tumusi furu finifini tori, fu di dati ben o meki taki sma no frustan den sani di a ben leri. Di a ben taki dati „ala den sma di de na ini den grebi o . . . komopo drape”, dan a no ben de a ten fu taki finifini fu den tu sortu opobaka (Yoh. 5:28, 29). Te wi e studeri Bijbel nanga sma, dan wi musu poti prakseri na den moro prenspari sani, èn wi musu luku bun fu no taki fu wan lo tra sani di no de na ini a pisi di unu e studeri.
5. Sortu blesi wi kan kisi te wi e gi leri na wan makriki fasi?
5 Wi de nanga bigi tangi taki na wan makriki fasi, Yehovah leri wi ala den sani di wi musu sabi! (Mat. 11:25) Meki a de so taki wi e tan du muiti fu gi sma leri na wan makriki fasi, èn dati o gi wi prisiri fu di wi o abi bun bakapisi na ini a diniwroko.