Dri sani di kan yepi yu fu gi leri moro bun
1. Fu san ede wi musu pruberi fu gi leri na wan moro bun fasi?
1 Ala Kotoigi na sma di e gi leri. Awinsi na a fosi leisi wi preiki gi wan sma, awinsi wi e tyari wan gobaka, noso wi e hori wan Bijbelstudie, wi e leri sma wan sani. Den sani di wi e leri sma prenspari. Wi e meki sma kon sabi „den sani di skrifi na ini den Santa Buku” di kan meki den ’kon koni, so taki den kan kisi frulusu’ (2 Tim. 3:15). Dati na wan bigi grani trutru! Now wi o taki fu dri sani di kan yepi wi fu gi leri moro bun.
2. Fa wi kan gi leri na wan makriki fasi?
2 Gi leri na wan makriki fasi: Te wi sabi wan tori bun, dan a kan pasa makriki taki wi e frigiti o muilek dati kan de gi wan sma di no sabi a tori. Fu dati ede, te wi e hori wan Bijbelstudie, dan wi no musu taki fu tumusi furu sani di no de fanowdu. Na presi fu dati, poti prakseri na den moro prenspari sani. A no te wi e taki furu, dan wi e gi leri na wan bun fasi (Odo 10:19). Nofo tron a moro bun te wi e leisi soso den moro prenspari Bijbeltekst. Baka te yu leisi wan Bijbeltekst, dan poti prakseri na a pisi di abi fu du nanga a tori di unu e taki. A Bergitaki di skrifi na ini Mateyus kapitel 5 te go miti 7 e taki fu prenspari tru tori. Ma toku Yesus ben gi leri na wan makriki fasi èn a no ben gebroiki furu wortu.
3. Fu san ede a prenspari fu gebroiki agersitori nanga prenki, èn sortuwan moro bun?
3 Gebroiki agersitori nanga prenki: Agersitori nanga prenki e yepi wan sma fu denki fu a tori, den abi krakti tapu den firi fu en, èn den e yepi en fu no frigiti a tori. No denki taki yu musu de wan sma di sabi fruteri tori bun fu man gebroiki bun agersitori. Nofo tron Yesus ben gebroiki syatu agersitori di no ben muilek fu frustan (Mat. 7:3-5; 18:2-4). A kan de wan yepi tu fu teken wan sani na tapu wan pisi papira. Te yu e sreka yusrefi bun, dan yu kan feni wan tu bun agersitori.
4. Fa wi kan poti aksi na wan bun fasi?
4 Poti aksi: Te yu e poti aksi, dan dati e meki taki a studenti musu denki fu a tori. Dati meki yu musu abi pasensi te yu poti wan aksi. Te yu gaw tumusi fu piki na aksi yusrefi, dan yu no o sabi san a studenti fu yu e frustan. Efu a no piki na aksi bun, dan na presi fu taigi en san na a bun piki, yu kan poti wan tu tra aksi so taki ensrefi kan feni a bun piki (Mat. 17:24-27). A no de fu taki dati wi alamala e meki fowtu te wi e gi leri. Na fu dati ede Bijbel e gi wi a deki-ati fu tan poti prakseri na den sani di wi e leri sma. Te wi e du dati, dan wi nanga den sma di e arki wi sa kisi têgo blesi.—1 Tim. 4:16.