Prèise Yehovah ibri dei

1. San den futuboi fu Gado e du, èn fu san ede?

¹ Kownu David ben sori taki a ben o tan prèise Yehovah „heri dei”, srefi fu ala ten (Ps. 145:2, 7, 21). Wi sosrefi abi bun reide fu prèise Yehovah ibri dei.—Ps. 37:10; 145:14, 18; 2 Petr. 3:13.

2. Fa osofamiri kan prèise Yehovah ibri dei?

² Te wi de na oso: Wi abi moi publikâsi di e yepi wi fu abi takimakandra, di abi fu du nanga Gado èn nanga Bijbel. Wi kan abi den takimakandra disi te wi e luku a deitekst, te wi e hori na osofamiri anbegi èn te wi e sreka wisrefi gi den gemeente konmakandra. Furu osofamiri abi a gwenti fu nyan nanga makandra, awinsi wán leisi ibri dei. A sani dati e gi den na okasi fu abi switi takimakandra sondro fu hasti densrefi, èn fu prèise Yehovah. Te papa nanga mama e bigin taki fu sani na a fasi disi, dan dati na wan prenspari fasi fa den kan kweki den pikin fu den nanga ’a leri fu Yehovah èn den kan frumane den, so taki den kan kisi a denki fu en’.—Ef. 6:4; Deut. 6:5-7.

3. Sortu okasi wi abi fu prèise Yehovah te wi de nanga wi brada nanga sisa?

³ Te wi de nanga wi brada nanga sisa: Te wi de na ini a preikiwroko noso na den gemeente konmakandra, wi abi moi okasi fu prèise Yehovah makandra nanga wi Kresten brada nanga sisa (Odo 15:30; Fil. 4:8; Hebr. 13:15). Wi alamala lobi Yehovah. Fu dati ede, te wi e taki nanga makandra, dan a musu de makriki fu taki fa wi e warderi den bun sani di Yehovah du gi wi.—Ps. 106:1.

4. Na sortu tra okasi yu kan prèise Yehovah?

⁴ Te wi e taki nanga sma di no de na bribi: Kande wi no abi na okasi fu teki prati na a preikiwroko ibri dei. Ma wi kan taki syatu nanga sma fu sani di abi fu du nanga Yehovah èn nanga den sani di a o du, te wi de na wrokope, te wi de na skoro, noso te wi e miti tra sma. Disi kan meki den reti-ati sma kisi howpu (Ps. 27:14; 1 Petr. 3:15). Di wan sisa ben de na ini wan opolani, a ben man gi kotoigi na wan uma di ben sidon na en sei. Den sani di na uma disi ben yere, ben gi en so furu trowstu nanga deki-ati, taki a skrifi en telefon-nomru nanga a presi pe a e tan, gi a sisa. A ben du dati, so taki wan tra leisi den ben kan taki baka nanga makandra. Aladi a situwâsi na grontapu e kon moro ogri, toku a pipel fu Yehovah e tan fruteri sma di wani arki, ’bun nyunsu di abi fu du nanga wan moro bun sani’. A sani disi e gi tra sma howpu èn a e meki den prèise Yehovah.—Yes. 52:7; Rom. 15:11.

5. Fu san ede wi e angri fu prèise Yehovah, èn na sortu okasi wi kan du dati?

⁵ A musu fu de so taki Yehovah e prisiri fu yere fa den futuboi fu en e prèise en ibri dei! Neleki fa a de nanga den sani na wi lontu di Yehovah meki, na so wi kan prèise Yehovah tu ibri dei na ini wi oso, na ini a gemeente, èn te wi e taki nanga tra sma di no e prèise Yehovah ete.—Ps. 19:1-4.